ຫຼັງຈາກການຄັດເລືອກໃນຫຼາຍຂັ້ນຕອນມີທັງໝົດ 19 ໂຄງການດີເດັ່ນຈາກ ຈີນ, ກຳປູເຈຍ, ອິນໂດເນເຊຍ, ລາວ, ມາເລເຊຍ, ຟີລິບປິນ, ສິງກະໂປ ແລະ ປະເທດໄທ ທີ່ໄດ້ຜ່ານເຂົ້າໄປຮອບຊີງຊະນະເລີດ. ໃນງານຮອບຊີງຊະນະເລີດມີການແຂ່ງຂັນແບ່ງເປັນ 2 ປະເພດຄື: ກຸ່ມທີມ ແລະ ກຸ່ມບໍລິສັດ ໂດຍໃຊ້ຮູບແບບ “7+5” ໃນການນຳສະເໜີ (7 ນາທີ ນຳສະເໜີໂຄງການ + 5 ນາທີ ຕອບຄຳຖາມຈາກຄະນະກຳມະການ). ໂຄງການໄດ້ສະແດງໃຫ້ເຫັນເຖິງຈຸດເດັ່ນຂອງນະວັດຕະກຳ ແລະ ສັກກະຍະພາບທາງການຕະຫຼາດ.
ຜົນການປະກວດ ໄດ້ມີການມອບລາງວັນອັນດັບ 1, 2, 3 ໃຫ້ແກ່ກຸ່ມທີມ ແລະ ກຸ່ມບໍລິສັດ, ລວມທັງ 8 ລາງວັນ “ດາວເຮັດວຽກແບບຮ່ວມມື” ແລະ 7 ລາງວັນ “ດາວຄວາມຄິດສ້າງສັນ”. ໃນນັ້ນ, ມີໂຄງການຈຳນວນໜຶ່ງທີ່ເນັ້ນໃນເລື່ອງປັນຍາປະດິດທີ່ຊ່ວຍຍົກລະດັບອຸດສາຫະກຳດັ່ງເດີມ ແລະ ການໃຊ້ພະລັງງານຂຽວໄດ້ຢ່າງມີປະສິດທິພາບໄດ້ສ້າງຄວາມໂດດເດັ່ນຢ່າງໜ້າປະທັບໃຈ.
ງານຄັ້ງນີ້ໄດ້ຮັບການຈັດຂຶ້ນໂດຍກົມການຮ່ວມມືລະຫວ່າງປະເທດ, ກະຊວງວິທະຍາສາດ ແລະ ເຕັກໂນໂລຊີຂອງຈີນ ແລະ ສຳນັກງານເລຂາທິການອາຊຽນ ພ້ອມດ້ວຍການສົ່ງເສີມຈາກຫົວໜ່ວຍຕ່າງໆເຊັ່ນ: ຄະນະກຳມະການວິທະຍາສາດ – ນະວັດຕະກຳອາຊຽນ ແລະ ກົມວິທະຍາສາດແຂວງກວງຊີ ລວມທັງສູນຖ່າຍທອດເຕັກໂນໂລຊີ ຈີນ–ອາຊຽນ. ງານຄັ້ງນີ້ໄດ້ສ້າງເວທີໃຫ້ນັກປະດິດສ້າງ ແລະ ນັກຄິດຄົ້ນຈາກຈີນ–ອາຊຽນ ໄດ້ມາແລກປ່ຽນ ແລະ ຮ່ວມມືກັນ ເພື່ອສົ່ງເສີມຄວາມກ້າວໜ້າດ້ານວິທະຍາສາດ ແລະ ສ້າງໂອກາດໃໝ່ໆ ໃນການຮ່ວມພັດທະນາດ້ານເສດຖະກິດຂອງພາກພື້ນ.
ຄໍາເຫັນ