 |
ກອງປະຊຸມຄັ້ງນີ້, ສະຫາຍ ພອນແກ້ວ ຂຸນພົນ ຮອງເລຂາພັກແຂວງວຽງຈັນ ໄດ້ໃຫ້ກຽດເຜີຍແຜ່ມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ ຊຶ່ງມີເນື້ອໃນສຳຄັນປະກອບມີ: ໂຄງການ ການເມືອງສະບັບທີ 3 ຂອງພັກ, ຮ່າງລາຍງານການເມືອງ, ມະຕິກອງປະຊຸມໃຫຍ່ ຄັ້ງທີ XII ຂອງພັກ. ພ້ອມນີ້, ສະຫາຍ ພູວົງ ບຸນຊູ ຮອງເລຂາພັກແຂວງ ປະທານຄະນະກຳມະການປົກຄອງແຂວງ ໄດ້ເຜີຍແຜ່ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X (2026-2030).
 |
ໃນໂອກາດນີ້, ສະຫາຍ ພູທະນູເພັດ ໄຊສົມບັດ ໄດ້ມີຄຳເຫັນຊີ້ນຳບາງດ້ານເປັນຕົ້ນ: ຕ້ອງສຸມໃສ່ຍົກສູງຄວາມສາມາດ ໃນການຫັນເປັນນິຕິກໍາ, ໂດຍຫັນມະຕິ ໃຫ້ອອກເປັນກົດໝາຍຢ່າງທັນການ ແລະ ຮັດກຸມ; ຕ້ອງຮີບຮ້ອນປັບປຸງລະບຽບວິໄນ ແລະ ວິທີການຈັດຕັ້ງປະຕິບັດແບບໃໝ່; ການພັດທະນາໃດໆ ຕ້ອງຖືເອົາປະຊາຊົນເປັນກົກ, ເອົາຊົນນະບົດເປັນເປົ້າໝາຍ ຕ້ອງຄໍານຶງເຖິງຄວາມເພິ່ງພໍໃຈຂອງປະຊາຊົນເປັນໄມ້ຫຼາວັດແທກ; ສ້າງຖັນແຖວພະນັກງານໃຫ້ມີຄວາມສາມາດ ຈັດຕັ້ງປະຕິບັດມະຕິ, ແນວທາງນະໂຍບາຍ, ແຜນພັດທະນາເສດຖະກິດ-ສັງຄົມ ຂອງປະເທດໃຫ້ໄດ້ ນັບມື້ນັບຫຼາຍ, ນັບມື້ນັບເຂັ້ມແຂງ, ມີຄຸນທາດການເມືອງ, ຄຸນສົມບັດສິນທໍາປະຕິວັດ ແລະ ຫັນເປັນມືອາຊີບ, ຕ້ອງແກ້ໄຂພະນັກງານເລືອກວຽກ, ພະນັກງານ ທີ່ຂັດເອົາແຕ່ວຽກທີ່ຕົນມັກ ຕົນຢາກໄດ້. ພ້ອມນີ້, ສະພາປະຊາຊົນແຂວງ ຕ້ອງເສີມຂະຫຍາຍບົດບາດ ເປັນອົງການນິຕິບັນຍັດ, ອົງການຕິດຕາມກວດກາສູງສຸດທີ່ແຂງແຮງ, ທັງການຫັນເປັນນິຕິກຳໃຫ້ທັນການ, ແກ້ໄຂສິ່ງກີດຂວາງ, ກວດກາສູງສຸດ ເປີດທາງໃຫ້ແກ່ການພັດທະນາ, ບໍ່ສ້າງຂັ້ນຕອນເພີ່ມຕື່ມ ທີ່ບໍ່ຈຳເປັນ. ແນວລາວສ້າງຊາດ, ບັນດາອົງການຈັດຕັ້ງການເມືອງ, ສັງຄົມ ແລະ ອົງການຈັດຕັ້ງມະຫາຊົນ ຕ້ອງຍູ້ແຮງການເສີມຂະຫຍາຍບົດບາດຂອງການຕິດຕາມ, ກວດກາໄປພ້ອມໆກັບການຂົນຂວາຍການເຂົ້າຮ່ວມຈັດຕັ້ງປະຕິບັດບັນດາແຜນນະໂຍບາຍຂອງພັກ ແລະ ລັດວາງອອກ; ອໍານາດການປົກຄອງທ້ອງຖິ່ນທຸກຂັ້ນ ຕ້ອງຖືວ່າຕົນເປັນແນວໜ້າ ໃນການຈັດຕັ້ງປະຕິບັດຢ່າງແທ້ຈິງ. ພ້ອມນີ້, ສະຫາຍເລຂາພັກແຂວງຍັງໄດ້ເນັ້ນໃຫ້ອຳນາດການປົກຄອງທຸກຂັ້ນ ນຳເນື້ອໃນເອກະສານຂອງກອງປະຊຸມຄັ້ງນີ້ໄປຈັດຕັ້ງຜັນຂະຫຍາຍ, ເຜີຍແຜ່ດ້ວຍຫຼາຍຮູບການ, ກວ້າງຂວາງ ແລະ ມີປະສິດທິຜົນ. ມອບໃຫ້ຄະນະໂຄສະນາອົບຮົມແຂວງ, ໂຮງຮຽນການເມືອງ ແລະ ການປົກຄອງແຂວງ ສືບຕໍ່ນຳເອົາເອກະສານກອງປະຊຸມຄັ້ງນີ້ໄປຄັດຈອນ ເພື່ອສືບຕໍ່ໂຄສະນາດ້ວຍຫຼາຍຮູບການ ເຮັດເປັນຫົວຂໍ້ຝຶກອົບຮົມເຂົ້າໃນສະຖາບັນໂຮງຮຽນການເມືອງ ແລະ ການປົກຄອງແຂວງ ອາດເປັນໄລຍະສັ້ນ ຫຼື ຫົວຂໍ້ສະເພາະ ໄປຕາມລະບົບກົນໄກຍົກສູງສະຕິຂອງພະນັກງານຢູ່ແຕ່ລະທ້ອງຖິ່ນໃຫ້ສອດຄອງຕາມແຕ່ລະຫົວຂໍ້.
(ແຫຼ່ງຂ່າວ: ແຂວງວຽງຈັນ)
ຄໍາເຫັນ