ວັນທີ 21 ກັນຍາ ປີ 2021, ທ່ານ ສີຈິ້ນຜິງ ປະທານປະເທດຈີນ ໄດ້ສະເໜີຂໍ້ລິເລີ່ມການພັດທະນາທົ່ວໂລກ ຊຶ່ງໄດ້ຮັບການສະໜັບສະໜູນຈາກປະຊາຄົມໂລກຢ່າງກວ້າງຂວາງ. ໃນສອງປີຜ່ານມາ, ຂໍ້ລິເລີ່ມການພັດທະນາທົ່ວໂລກ ໄດ້ສະແດງໃຫ້ເຫັນເຖິງຄວາມມີຊີວິດຊີວາທີ່ແຂງແຮງ ແລະ ແຮງດຶງດູດທີ່ເຂັ້ມແຂງ, ໄດ້ເພີ່ມພະລັງແຮງຂອງຈີນເຂົ້າໃນການພັດທະນາຂອງໂລກ.
ໃນຖານະທີ່ເປັນໂຄງການທຳອິດຂອງຂໍ້ລິເລີ່ມພັດທະນາທົ່ວໂລກທີ່ໄດ້ຮັບການປະຕິບັດຢູ່ ສປປ ລາວ, ໃນເດືອນພະຈິກ 2022, ຈີນໄດ້ຊ່ວຍເຫຼືອອົງການອາຫານໂລກ(FAO) ແລະ ໂຄງການອາຫານທ່ຽງໂຮງຮຽນໃຫ້ກະຊວງສຶກສາທິການ ແລະ ກິລາ ລາວ ດ້ວຍເຂົ້າສານ 930 ໂຕນ ແລະ ປາກະປ໋ອງ 120 ໂຕນ, ເພື່ອສະໜອງອາຫານໃຫ້ແກ່ນັກຮຽນຫຼາຍກວ່າ 130.000 ຄົນ ຂອງໂຮງຮຽນປະຖົມ 1.400 ກວ່າແຫ່ງໃນ 8 ແຂວງຂອງລາວ, ເພື່ອສະໜັບສະໜູນການພັດທະນາການສຶກສາຂັ້ນພື້ນຖານ ແລະ ໂພຊະນາການເດັກໃນລາວ.
ໂຮງຮຽນປະຖົມສົມບູນນາຫອຍ ຕັ້ງຢູ່ເມືອງສັງທອງ ນະຄອນຫຼວງວຽງຈັນ ຫ່າງຈາກຕົວເມືອງ 50 ກວ່າກິໂລແມັດ, ເປັນໂຮງຮຽນໜຶ່ງທີ່ໄດ້ຮັບຜົນປະໂຫຍດຈາກໂຄງການນີ້. ນາງ ຊົມພູ ນັກຮຽນຊັ້ນປະຖົມ ປ.4 ບອກວ່າ: ກ່ອນບໍ່ທັນມີໂຄງການອາຫານທ່ຽງ, ລາວມັກຫິວເຂົ້າໃນເວລາຮຽນຕອນບ່າຍ ແລະ ບາງເທື່ອ ພໍ່ແມ່ຂອງລາວຈະມາໂຮງຮຽນເພື່ອຮັບໄປກິນເຂົ້າຕອນທ່ຽງ. ແຕ່ຫຼັງຈາກໂຄງການອາຫານໃນໂຮງຮຽນໄດ້ຖືກສ້າງຕັ້ງຂຶ້ນ, ລາວໄດ້ກິນເຂົ້າທ່ຽງກັບເພື່ອນຮ່ວມຫ້ອງຮຽນໃນແຕ່ລະມື້, ບາງຄັ້ງເປັນເຂົ້າປຽກເຂົ້າ, ບາງຄັ້ງເປັນປາກະປ໋ອງ, ບາງຄັ້ງແມ່ນຂົ້ວໝາກຫຸ່ງ, ເວລາຮຽນໃນຕອນບ່າຍ ລາວກໍ່ຮູ້ສຶກມີແຮງຫຼາຍຂຶ້ນ.
ບົນເສັ້ນທາງການພັດທະນາ, ປະເທດໃດກໍບໍ່ໃຫ້ຕົກຫຼົ່ນ ແລະ ຄົນໃດກໍບໍ່ໃຫ້ປະຖິ້ມ, ນີ້ແມ່ນຈຸດປະສົງເບື້ອງຕົ້ນຂອງຂໍ້ລິເລີ່ມພັດທະນາທົ່ວໂລກ.
ເມື່ອບໍ່ດົນມານີ້, ຈີນໄດ້ປະກາດຈະເປີດກອງທຶນພິເສດ 10 ຕື້ໂດລາ ເພື່ອປະຕິບັດຂໍ້ລິ ເລີ່ມການພັດທະນາທົ່ວໂລກ. ທຶນເຫຼົ່ານີ້ຈະສຸມໃສ່ 8 ຂົງເຂດຮ່ວມມືທີ່ສຳຄັນຂອງຂໍ້ລິເລີ່ມການພັດທະນາທົ່ວໂລກເຊັ່ນ: ການຫຼຸດຜ່ອນຄວາມທຸກຍາກ, ການປ່ຽນແປງຂອງດິນຟ້າອາກາດ ແລະການພັດທະນາສີຂຽວ, ສະໜັບສະໜູນການຊຸກຍູ້ການປະຕິບັດໂຄງການຕ່າງໆທີ່ວາງໄວ້, ເພີ່ມພະລັງແຮງໃໝ່ ແລະ ຊີວິດຊີວາໃໝ່ໃຫ້ແກ່ວຽກງານການພັດທະນາທົ່ວໂລກ.
ມາຮອດປັດຈຸບັນ, ມີ 70 ກວ່າປະເທດ ໄດ້ເຂົ້າຮ່ວມ "ກຸ່ມເພື່ອນມິດແຫ່ງຂໍ້ລິເລີ່ມການພັດທະນາທົ່ວໂລກ". ມີ 41 ປະເທດ, ເຂດແຄ້ວນ ແລະ ອົງການຈັດຕັ້ງສາກົນ ໄດ້ຮ່ວມກັນຊຸກຍູ້ການສ້າງ "ເຄືອຂ່າຍສູນສົ່ງເສີມການພັດທະນາທົ່ວໂລກ" ແລະ ເກືອບ 30 ປະເທດ ແລະ ອົງການຈັດຕັ້ງສາກົນໄດ້ລົງນາມໃນບົດບັນທຶກຄວາມເຂົ້າໃຈກ່ຽວກັບການຮ່ວມມືກັບຈີນ, ຊຸກຍູ້ຂໍ້ລິເລີ່ມເຊື່ອມໂຍງເຊື່ອມຈອດຢ່າງເລິກເຊິ່ງກັບຍຸດທະສາດການພັດທະນາທີ່ສຳຄັນຂອງບັນດາປະເທດ ແລະ ພາກພື້ນທີ່ກ່ຽວຂ້ອງ. ເກືອບ 200 ໂຄງການຮ່ວມມືກັນໃນພາກປະຕິບັດຕົວຈິງຖືກຈັດເຂົ້າເປັນໂຄງການຂໍ້ລິເລີ່ມການພັດທະນາທົ່ວໂລກ ຊຶ່ງໄດ້ກວມເອົາ 60 ກວ່າປະເທດທີ່ກຳລັງພັດທະນາ.
ຂໍ້ລິເລີ່ມການພັດທະນາທົ່ວໂລກບໍ່ພຽງແຕ່ໄດ້ຮັບການສະໜັບສະໜູນຢ່າງກວ້າງຂວາງຈາກປະຊາຄົມສາກົນເທົ່ານັ້ນ, ຫາກຍັງໄດ້ຮັບການບັນທຶກເຂົ້າໃນບັນດາເອກະສານຮ່ວມມືລະຫວ່າງຈີນກັບອາຊຽນ, ອາຊີກາງ, ອາຟຣິກາ, ອາເມຣິກາລາຕິນ ແລະ ປະເທດໝູ່ເກາະປາຊີຟິກ ຊຶ່ງໄດ້ສະແດງໃຫ້ເຫັນເຖິງຄວາມມີຊີວິດຊີວາທີ່ແຂງແຮງ ແລະ ແຮງດຶງດູດທີ່ເຂັ້ມແຂງ.
ຂ່າວ: ຊີອາໄອ
ຄໍາເຫັນ