ຂ່າວລະບຸວ່າ: ບົດບັນທຶກຄວາມເຂົ້າໃຈດັ່ງກ່າວຈະກວມເອົາການສົ່ງເສີມການລົງທຶນຂອງຍີ່ປຸ່ນໃນຂະແໜງຕໍ່ເຮືອຂອງສະຫະລັດ ອາເມຣິກາ, ໂດຍການເພີ່ມກຳລັງການຜະລິດ, ການຖ່າຍທອດເຕັກໂນໂລຊີການອອກແບບເຮືອຂັ້ນສູງ ແລະ ການສ້າງຕັ້ງໂຄງການຝຶກອົບຮົມຮ່ວມກັນສຳລັບຊ່າງເຕັກນິກອູ່ຕໍ່ເຮືອ.
ເອກະສານດັ່ງກ່າວ ຊຶ່ງຈະລົງນາມໂດຍທ່ານ ຍາຊຸຊິ ຄາເນໂກະ ລັດຖະມົນຕີກະຊວງຂົນສົ່ງຍີ່ປຸ່ນ ແລະ ທ່ານ ຈອດ ກລາສ ເອກອັກຄະລັດຖະທູດສະຫະລັດ ອາເມຣິກາ ປະຈຳຍີ່ປຸ່ນ, ໂດຍຈະເນັ້ນໜັກເຖິງຄວາມຈຳເປັນໃນການຂະຫຍາຍກຳລັງການຜະລິດຂອງອູ່ຕໍ່ເຮືອ ສະຫະລັດ ອາເມຣິກາ ເພື່ອແກ້ໄຂຄວາມແຕກຕ່າງດ້ານຄວາມສາມາດໃນການຕໍ່ເຮືອລະຫວ່າງຜູ້ຜະລິດທົ່ວໂລກ.
ກ່ອນໜ້ານີ້, ທ່ານ ທຣໍາ ໄດ້ປະກາດແຜນການທີ່ຄົບຖ້ວນເພື່ອຟື້ນຟູ ແລະ ສ້າງອຸດສາຫະກຳທາງທະເລພາຍໃນປະເທດ ແລະ ກຳລັງແຮງງານ, ຫຼັງຈາກສ່ວນແບ່ງຕະຫຼາດເຮືອການຄ້າຂອງສະຫະລັດ ອາເມຣິກາ ຫຼຸດລົງຕໍ່າກວ່າ 1%, ໃນຂະນະທີ່ຈີນຜະລິດເຮືອປະມານເຄິ່ງໜຶ່ງຂອງໂລກ.
ນອກຈາກນີ້, ທັງສອງປະເທດຍັງຈະລົງນາມໃນ MOU ແຍກຕ່າງຫາກກ່ຽວກັບການຮ່ວມມືດ້ານເຕັກໂນໂລຊີ ຊຶ່ງກວມເອົາການພັດທະນາ AI, ເຕັກໂນໂລຊີການສື່ສານ, quantum ແລະ ພະລັງງານລຸ້ນໃໝ່.
ໃນເດືອນກໍລະກົດ ຜ່ານມາ, ຍີ່ປຸ່ນ ແລະ ສະຫະລັດ ອາເມຣິກາ ໄດ້ບັນລຸຂໍ້ຕົກລົງການຄ້າຫຼັງຈາກການເຈລະຈາພາສີເປັນເວລາຫຼາຍເດືອນ, ໂດຍຍີ່ປຸ່ນໄດ້ໃຫ້ຄຳໝັ້ນສັນຍາວ່າຈະລົງທຶນ 550 ຕື້ໂດລາໃນອຸດສາຫະກຳທີ່ສຳຄັນຂອງສະຫະລັດ ອາເມຣິກາ.
ຄໍາເຫັນ