ນອກຈາກນີ້, ກໍໄດ້ຈັດຕັ້ງປະຕິບັດພາລະບົດບາດ ຕາມທີ່ກໍານົດໄວ້ໃນກົດໝາຍວ່າດ້ວຍສະພາປະຊາຊົນຂັ້ນແຂວງ ແລະ ກົດໝາຍວ່າດ້ວຍການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຊຶ່ງໄລຍະ 6 ເດືອນຕົ້ນປີນີ້ໄດ້ລົງເຄື່ອນໄຫວຕິດຕາມກວດກາ ຊຸກຍູ້ ແລະ ເກັບກໍາຂໍ້ມູນຢູ່ບັນດາອົງການຈັດຕັ້ງພະແນກການອ້ອມຂ້າງນະຄອນຫຼວງ ແລະ ອົງການປົກຄອງເມືອງໄດ້ທັງໝົດ 44 ຈຸດ, ຕິດຕາມກວດກາບັນດາໂຄງການລົງທຶນຂອງລັດ ແລະ ໂຄງການພັດທະນາຕ່າງໆທີ່ຈັດຕັ້ງປະຕິບັດຢູ່ ນວ ເປັນຕົ້ນໂຄງການສຶກສາສໍາຫຼວດ ແລະ ຂຸດຄົ້ນແຮ່ເກືອໂປຕາສ, ການຂຸດຄົ້ນແຮ່ທາດ, ໂຄງການກໍ່ສ້າງສາຍສົ່ງໄຟຟ້າ 230 ກິໂລໂວນ, ໂຄງການທາງລົດໄຟລາວ-ຈີນ, ໂຄງການທ່າບົກ-ທ່ານາແລ້ງ ແລະ ໂລຈີສຕິກ, ໂຄງການຂົນສົ່ງແບບຍືນຍົງ ໃນຕົວເມືອງນະຄອນຫຼວງ ລົດເມດ່ວນ BRT ແລະ ອື່ນໆ. ພ້ອມນີ້, ຍັງຄົ້ນຄວ້າພິຈາລະນາຄໍາຮ້ອງຂໍຄວາມເປັນທໍາ ແລະ ຄໍາສະເໜີຂອງປະຊາຊົນ ທັງໝົດ 79 ເລື່ອງ; ເອົາໃຈໃສ່ການເຄື່ອນໄຫວວຽກງານຂອງ ສະມາຊິກ ສປນວ ຕາມພາລະບົດບາດ, ສິດ ແລະ ໜ້າທີ່ໃນເປັນຖານະຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນຊາວ ນວ; ຄຽງຄູ່ກັນນັ້ນ, ກໍໄດ້ສ້າງຄວາມເຂັ້ມແຂງໃຫ້ແກ່ ສປນວ ອີກດ້ວຍ.
ສຳລັບທິດທາງແຜນການຕໍ່ໜ້າ, ຈະຊຸກຍູ້ ແລະ ປະສານສົມທົບກັບອົງການປົກຄອງ ພະແນກການກ່ຽວຂ້ອງປັບປຸງຄືນບັນດານິຕິກໍາທີ່ຖືກຮັບຮອງເອົາໃນກອງປະຊຸມສະໄໝສາມັນ ເທື່ອທີ 9 ຂອງ ສປນວ ປະສານສົມທົບກັບອົງການປົກຄອງ ແລະ ພາກສ່ວນກ່ຽວຂ້ອງໃນຄົ້ນຄວ້າສ້າງນິຕິກໍາຢ່າງໜ້ອຍ 1 ສະບັບ ແລະ ຄົ້ນຄວ້ານິຕິກໍາທີ່ຜ່ານການຮັບຮອງຈາກກອງປະຊຸມ ສປນວ ໃນໄລຍະຜ່ານມາ ເພື່ອດໍາເນີນການປະເມີນຜົນການຈັດຕັ້ງປະຕິບັດ ສືບຕໍ່ເອົາໃຈໃສ່ຕິດຕາມກວດກາ ແລະ ປະເມີນຄືນນິຕິກໍາພາຍໃນ ສປນວ ເພື່ອປັບປຸງໃຫ້ສອດຄ່ອງກັບການເຄື່ອນໄຫວວຽກງານຕົວຈິງຂອງກົງຈັກການຈັດຕັ້ງໂດຍສະເພາະນິຕິກໍາທີ່ຕິດພັນກັບການເຄື່ອນໄຫວວຽກງານຂອງຄະນະສະມາຊິກ ສປນວ ປະຈໍາເຂດເລືອກຕັ້ງເມືອງເພື່ອໃຫ້ສອດຄ່ອງກັບການປັບປຸງກົງຈັກການຈັດຕັ້ງຂອງທ້ອງຖິ່ນ.
ຈາກນັ້ນ, ສສຊ ປະຈໍາເຂດເລືອກຕັ້ງທີ 1 ນວ, ສະມາຊິກ ສປນວ ກໍໄດ້ປະກອບຄຳເຫັນໃສ່ບົດສະຫຼຸບດັ່ງກ່າວ ເພື່ອໃຫ້ມີເນື້ອໃນຄົບຖ້ວນ, ສົມບູນ ແລະ ສາມາດຈັດຕັ້ງປະຕິບັດໄດ້. ກອງປະຊຸມກໍໄດ້ຮັບຮອງເອົາບົດລາຍງານດັ່ງກ່າວຢ່າງເປັນເອກະສັນ.
(ຂ່າວ: ແສງຈັນ)
ຄໍາເຫັນ