ທ່ານ ຜູ້ວ່າການ ທຫລ ກ່າວວ່າ: ພາຍຫຼັງທີ່ສະພາແຫ່ງຊາດໄດ້ມີມະຕິເລກທີ 140/ສພຊ, ທຫລໄດ້ອອກແຈ້ງການໄປຫາບັນດາກົມແລະທະນາຄານທຸລະກິດທີ່ກ່ຽວຂ້ອງໃນການຄົ້ນຄວ້າແກ້ໄຂ. ຜ່ານການຈັດຕັ້ງປະຕິບັດເຫັນວ່າມີຄວາມຄືບໜ້າດັ່ງນີ້:
ມາດຕະການທີ 1 ໃຫ້ທຫລສ້າງນິຕິກຳຫຼືຄຳແນະນຳກ່ຽວກັບການຄຸ້ມຄອງແລະນຳໃຊ້ຄັງຂະຫຍາຍການຜະລິດໄດ້ດຳເນີນການແກ້ໄຂສຳເລັດ. ໂດຍໃນເດືອນສິງຫາ 2025, ທຫລ (ກົມບັນຊີແລະການເງິນ) ໄດ້ສໍາເລັດແຍກເລກໝາຍບັນຊີແລະແຍກຈໍານວນເງິນທີ່ໄດ້ນໍາໃຊ້ໄປບັນທຶກຕິດຕາມເປັນອັນສະເພາະ.
ມາດຕະການທີ 2 ໃຫ້ທະນາຄານສົ່ງເສີມກະສິກຳ(ທສກ) ດຳເນີນຂັ້ນຕອນການຈັດຊື້-ຈັດຈ້າງໃຫ້ຖືກຕ້ອງຕາມກົດໝາຍ ແມ່ນໄດ້ດຳເນີນການແກ້ໄຂແຕ່ຍັງບໍ່ສາມາດແກ້ໄຂສໍາເລັດ; ທສກ,ກໍາລັງຄົ້ນຄວ້າປັບປຸງລະບຽບວ່າດ້ວຍການຈັດຊື້-ຈັດຈ້າງຄາດຄະເນຈະສຳເລັດພາຍໃນທ້າຍປີ 2025;ພ້ອມກັນນັ້ນ, ໃນຕໍ່ໜ້າທສກຈະຈັດຝຶກອົບຮົມເພື່ອເພີ່ມຂີດຄວາມສາມາດໃຫ້ພະນັກງານກໍາແໜ້ນກ່ຽວກັບລະບຽບການຈັດຊື້-ຈັດຈ້າງແລະຂໍ້ກຳນົດການປະຕິບັດຕາມລະບຽບການໂດຍການວ່າຈ້າງບໍລິສັດຫຼືພາກສ່ວນທີ່ກ່ຽວຂ້ອງໃຫ້ສໍາເລັດໃນໄຕມາດI/2026,ພ້ອມທັງເພີ່ມທະວີຄວາມເຄັ່ງຄັດໃນການຈັດຊື້-ຈັດຈ້າງໃນຕໍ່ໜ້າໃຫ້ສອດຄ່ອງກັບລະບຽບການນັບແຕ່ປີ 2026 ເປັນຕົ້ນໄປ.
ມາດຕະການທີ 3 ໃຫ້ທະນາຄານນະໂຍບາຍແລະທສກເອົາໃຈໃສ່ການຕິດຕາມກວດກາລະບົບຄວບຄຸມພາຍໃນໃຫ້ຮັດກຸມແລະສະກັດກັ້ນໄດ້ຄວາມສ່ຽງທີ່ຈະເກີດຂຶ້ນໃນຕໍ່ໜ້າ ແມ່ນໄດ້ດຳເນີນການແກ້ໄຂສໍາເລັດ ຊຶ່ງປັດຈຸບັນທະນາຄານນະໂຍບາຍສໍາເລັດຄົ້ນຄວ້າອອກຂໍ້ກໍານົດສະບັບເລກທີ 416/ທນບ,ລົງວັນທີ 26 ກຸມພາ 2025 ກ່ຽວກັບການຄຸ້ມຄອງພາຍໃນແລະປັບປຸງການແບ່ງຄວາມຮັບຜິດຊອບແລະລະບຽບການຕິດຕາມກວດກາພາຍໃນໃຫ້ເປັນລະບົບທີ່ຮັດກຸມແລະສອດຄ່ອງໄລຍະໃໝ່;ສໍາເລັດການຄົ້ນຄວ້າລະບຽບແລະຂໍ້ກຳນົດໃນການຄຸ້ມຄອງບໍລິຫານໄດ້ປັບປຸງສິດຂອງຄະນະກວດກາພາຍໃນກວດກາປະຈຳສາຂາໃນເມື່ອກ່ອນມາຂຶ້ນໂດຍກົງກັບສຳນັກງານໃຫຍ່ (ພະແນກກວດກາ) ຊຶ່ງຈະປະກາດນຳໃຊ້ພາຍຫຼັງສຳເລັດການຫັນເປັນທະນາຄານພັດທະນາຊົນນະບົດ.ສ່ວນ ທສກ,ໄດ້ເອົາໃຈໃສ່ໃນການຄວບຄຸມປ້ອງກັນ, ສະກັດກັ້ນ, ເພື່ອປິດຊ່ອງວ່າງບັນຫາຕ່າງໆໂດຍອີງໃສ່ບົດຮຽນຜ່ານມາແລະຜົນການກວດກາພາຍໃນແລະພາຍນອກໃນແຕ່ລະໄລຍະເພື່ອປະເມີນບັນຫາທີ່ມີຄວາມສ່ຽງແລະປິດຊ່ອງວ່າງດັ່ງກ່າວ, ທສກໄດ້ສ້າງແລະປັບປຸງບັນດານິກຳພາຍໃນໃຫ້ມີຄວາມຮັດກຸມແລະສອດຄ່ອງກັບສະພາບຕົວຈິງໃນແຕ່ລະໄລຍະເຊັ່ນ: ທສກໄດ້ມີການປັບປຸງນະໂຍບາຍການກວດກາພາຍໃນສະບັບເລກທີ 20/ທສກ, ລົງວັນທີ 30 ເມສາ 2024, ນະໂຍບາຍການບໍລິຫານຄວາມສ່ຽງເລກທີ 08/ສພ.ທສກ, ລົງວັນທີ 28 ເມສາ 2021, ນະໂຍບາຍວ່າດ້ວຍການຕ້ານ,ສະກັດກັ້ນການຟອກເງິນເລກທີ 07/ສພ.ທສກ, ລົງວັນທີ 26 ເມສາ 2023. ນອກນັ້ນ,ທສກຍັງໄດ້ສ້າງຄູ່ມືການກວດກາພາຍໃນ, ລະບຽບການຕ່າງໆທີ່ຕິດພັນກັບວຽກງານວິຊາສະເພາະແລະຄູ່ມືຕ່າງໆຫຼາຍສະບັບ. ນອກຈາກລະບຽບແລ້ວ,ຍັງໄດ້ອອກແຈ້ງການຕ່າງໆໃນແຕ່ລະໄລຍະ ຊຶ່ງນັບແຕ່ປີ 2024 ຮອດປັດຈຸບັນທສກສາມາດສະກັດກັ້ນບໍ່ໃຫ້ເກີດມີປະກົດການຫຍໍ້ໄດ້.
ມາດຕະການທີ 4 ໃຫ້ທະນາຄານສົ່ງເສີມກະສິກຳປັບປຸງລະບຽບການປ່ອຍກູ້ໃຫ້ສອດຄ່ອງກັບມາດຕາ 512 ຂອງປະມວນກົດໝາຍແພ່ງສະບັບເລກທີ 55/ສພຊ, ລົງວັນທີ 6 ທັນວາ 2018 ແມ່ນໄດ້ດຳເນີນການແກ້ໄຂແຕ່ຍັງບໍ່ທັນສຳເລັດ. ທສກກໍາລັງດໍາເນີນການຄົ້ນຄວ້າປັບປຸງລະບຽບວ່າດ້ວຍຫຼັກຊັບຄໍ້າປະກັນສະບັບເລກທີ 384/ທສກ, ລົງວັນທີ 28 ມິຖຸນາ 2022 ຄາດຄະເນຈະສໍາເລັດການປັບປຸງໃນທ້າຍປີ 2025.
ຜ່ານການຈັດຕັ້ງປະຕິບັດການແກ້ໄຂຂໍ້ຄົງຄ້າງຕາມຜົນການກວດສອບ-ກວດກາມີຂໍ້ຫຍຸ້ງຍາກຄືການແກ້ໄຂຂໍ້ຄົງຄ້າງຂອງທະນາຄານທຸລະກິດແມ່ນຕິດພັນກັບຫຼາຍພາກສ່ວນແລະມີຫຼາຍຂັ້ນຕອນ-ຂະບວນການໃນການແກ້ໄຂຈຶ່ງຍັງບໍ່ທັນສາມາດແກ້ໄຂໄດ້ສໍາເລັດຂາດຕົວ ຊຶ່ງທິດທາງໃນການແກ້ໄຂຄະນະນໍາທຫລແລະຄະນະຜູ້ບໍລິຫານທະນາຄານທຸລະກິດແຕ່ລະຂັ້ນຕ້ອງເພີ່ມທະວີເອົາໃຈໃສ່ໃນການແກ້ໄຂຂໍ້ຄົງຄ້າງຂອງຕົນດ້ວຍຄວາມຮັບຜິດຊອບສູງຂຶ້ນໂດຍສ້າງເປັນແຜນການແກ້ໄຂຢ່າງລະອຽດແລະມີຈຸດສຸມ, ພ້ອມທັງເອົາໃຈໃສ່ໃນການແກ້ໄຂຂໍ້ຄົງຄ້າງເປັນປົກກະຕິ-ຕໍ່ເນື່ອງເພື່ອເຮັດໃຫ້ຂໍ້ຄົງຄ້າງໄດ້ຮັບການແກ້ໄຂຢ່າງຂາດຕົວ, ທັງເປັນການຕີຖອຍບັນດາດ້ານອ່ອນ-ຂໍ້ຄົງຄ້າງໃນເຄື່ອນໄຫວວຽກງານໃນຂະແໜງການທະນາຄານໃຫ້ຫຼຸດໜ້ອຍຖອຍລົງໃນຕໍ່ໜ້າ.
(ຂ່າວ: ສຸກສະຫວັນ, ພາບ: ບຸນຕອມ)
ຄໍາເຫັນ