ຄວາມຄືບໜ້າຂອງວຽກງານບໍລິການດ້ານສຸຂະພາບຈະເລີນພັນແມ່ ເດັກເກີດໃໝ່ ເດັກນ້ອຍ ແລະ ໄວໜຸ່ມ ໃນ ສປປ ລາວ

ໃນລະຫວ່າງການຢ້ຽມຢາມ, ຄະນະຜູ້ແທນໄດ້ພົບປະກັບການນຳຂະແໜງສາທາລະນະສຸກຂັ້ນ ແຂວງ ແລະ ທີມງານແພດໃນຂັ້ນທ້ອງຖິ່ນ, ພ້ອມທັງໄດ້ຕິດຕາມເບິ່ງການບໍລິການຕົວຈິງຢູ່ບັນດາໂຮງໝໍ ແລະ ສຸກສາລາ ຊຶ່ງລວມມີການເບິ່ງແຍງຮັກສາສຸຂະພາບແມ່, ເດັກເກີດໃໝ່, ເດັກນ້ອຍ ແລະ ການບໍລິການທີ່ເປັນມິດສຳລັບໄວໜຸ່ມ; ການລົງຢ້ຽມຢາມໃນຄັ້ງນີ້ແມ່ນເປັນສ່ວນໜຶ່ງຂອງແຜນງານຮ່ວມ ຂອງອົງການສະຫະປະຊາຊາດ (UNJP) ໃນວຽກງານສຸຂະພາບຈະເລີນພັນ, ແມ່, ເດັກເກີດໃໝ່, ເດັກນ້ອຍ ແລະ ໄວໜຸ່ມ ຊຶ່ງນຳພາໂດຍກະຊວງສາທາລະນະສຸກ ໂດຍໄດ້ຮັບທຶນສະໜັບສະໜູນຈາກ ຣາຊະອານາຈັກລຸກຊໍາບວກ ແລະ ຈັດຕັ້ງປະຕິບັດຮ່ວມກັບອົງການ UNFPA, UNICEF ແລະ WHO ຊຶ່ງມາຮອດປັດຈຸບັນ, ແຜນງານດັ່ງກ່າວໄດ້ຊ່ວຍສະໜັບສະໜູນປະກອບສ່ວນໃນການຫຼຸດຜ່ອນອັດຕາການ ເສຍຊີວິດຂອງແມ່ໄດ້ເຖິງ 82% ໃນໄລຍະສອງທົດສະວັດທີ່ຜ່ານມາ.

ທ່ານ ໄພວັນ ແກ້ວປະເສີດ ຮອງລັດຖະມົນຕີ ກະຊວງສາທາລະນະສຸກ ກ່າວວ່າ: “ການສ້າງຄວາມເຂັ້ມແຂງໃຫ້ແກ່ການບໍລິການສຸຂະພາບຈະເລີນພັນ, ແມ່, ເດັກເກີດໃໝ່, ເດັກນ້ອຍ ແລະ ໄວໜຸ່ມ ທີ່ມີຄຸນນະພາບ ແມ່ນສິ່ງສຳຄັນໃນການຮັບປະກັນວ່າ ແມ່ຍິງ, ເດັກເກີດໃໝ່, ເດັກນ້ອຍ ແລະ ໄວໜຸ່ມທຸກຄົນ ສາມາດເຂົ້າເຖິງການບໍລິການສຸຂະພາບຢ່າງທ່ວງທັນ ແລະ ໄດ້ຮັບ ການດູແລດ້ວຍຄວາມນັບຖືໃນເຂດໃກ້ບ້ານຂອງພວກເຂົາ”. ການຢ້ຽມຢາມຮ່ວມກັນໃນຄັ້ງນີ້ແມ່ນເປັນ ໂອກາດໜຶ່ງເພື່ອຖອດຖອນບົດຮຽນໂດຍກົງຈາກທີມງານສາທາລະນະສຸກຂັ້ນແຂວງ, ຂັ້ນເມືອງ ແລະ ຊຸມຊົນ, ເພື່ອຊອກຫາຂໍ້ຄົງຄ້າງຕົວຈິງ ແລະ ເລັ່ງປັບປຸງການບໍລິການໃນທຸກລະດັບຂອງລະບົບ ສາທາລະນະສຸກ.”; ປັດຈຸບັນ, ແຜນງານຮ່ວມນີ້ (UNJP) ໄດ້ກ້າວເຂົ້າສູ່ປີທີ 15 ຊຶ່ງໄດ້ຊ່ວຍສ້າງ ຄວາມເຂັ້ມແຂງໃຫ້ແກ່ລະບົບສາທາລະນະສຸກໂດຍການສະໜອງອຸປະກອນໃຫ້ແກ່ສະຖານທີ່ບໍລິການສາ ທາລະນະສຸກ, ການຝຶກອົບຮົມບຸກຄະລາກອນການແພດ ແລະ ອາສາສະໝັກສາທາລະນະສຸກຂັ້ນບ້ານ, ພ້ອມທັງສະໜັບສະໜູນຊຸດການບໍລິການສຸຂະພາບຈະເລີນພັນ, ແມ່, ເດັກເກີດໃໝ່, ເດັກນ້ອຍ ແລະ ໄວໜຸ່ມ ແບບເຊື່ອມສານ (RMNCAH) ເພື່ອປັບປຸງການເຂົ້າເຖິງ ແລະ ຄຸນນະພາບຂອງການ ບໍລິການໃນທົ່ວ ສປປ ລາວ.

ທ່ານ ໂທມັສ ລາມມາ ອຸປະທູດລຸກຊຳບວກ ປະຈຳ ສປປ ລາວ ກ່າວວ່າ: “ລຸກຊຳບວກ ມີຄວາມພາກພູມໃຈທີ່ໄດ້ສະໜັບສະໜູນຄວາມພະຍາຍາມຂອງ ສປປ ລາວ ໃນການສ້າງຄວາມເຂັ້ມແຂງໃຫ້ແກ່ການບໍລິການສາທາລະນະສຸກ, ໂດຍສະເພາະແມ່ນສຳລັບແມ່, ເດັກ ເກີດໃໝ່, ເດັກນ້ອຍ ແລະ ໄວໜຸ່ມ,”. “ຜ່ານການຮ່ວມມືກັບກະຊວງສາທາລະນະສຸກ ແລະ ຄູ່ຮ່ວມງານ ຈາກອົງການສະຫະປະຊາຊາດ, ພວກເຮົາມີເປົ້າໝາຍທີ່ຈະຊ່ວຍສ້າງຜົນສຳເລັດທີ່ຍືນຍົງ-ເປັນຕົ້ນແມ່ນ ລະບົບທີ່ເຂັ້ມແຂງຂຶ້ນ, ຄຸນນະພາບຂອງການບໍລິການທີ່ດີຂຶ້ນ ແລະ ການເຂົ້າເຖິງການບໍລິການສຸຂະພາບ ທີ່ສະເໝີພາບຫຼາຍຂຶ້ນສຳລັບຄອບຄົວຕ່າງໆ, ລວມທັງຜູ້ທີ່ອາໄສຢູ່ໃນເຂດຫ່າງໄກສອກຫຼີກ.”

ຄູ່ຮ່ວມງານຈາກອົງການສະຫະປະຊາຊາດໄດ້ເນັ້ນໜັກເຖິງຄວາມສຳຄັນຂອງການປະສານງານ ເພື່ອຊ່ວຍເຫຼືອໃນການສ້າງຄວາມເຂັ້ມແຂງໃຫ້ແກ່ການບໍລິການ ໃນສະຖານທີ່ບໍລິການສາທາລະນະສຸກ ແລະ ໃນຂັ້ນຊຸມຊົນ; ທ່ານ ບິລາລ ອູແຣັງ ເຊັບ ດູຣານີ ຜູ້ຕາງໜ້າອົງການອຸຍນີເຊັບ ປະຈຳ ສປປ ລາວ ກ່າວວ່າ: “ຍ້ອນການສະໜັບສະໜູນທີ່ຍາວນານຈາກ ລັດຖະບານ ລຸກຊໍາບວກ ແລະ ການຮ່ວມມືຢ່າງໃກ້ຊິດກັບ ລັດຖະບານ ສປປ ລາວ, ແຜນງານຮ່ວມນີ້ແມ່ນກຳລັງຫັນປ່ຽນການລົງທຶນ ໃຫ້ກາຍເປັນການປັບປຸງຕົວຈິງ ສຳລັບສຸຂະພາບ ຂອງຄອບຄົວຕ່າງໆ ຢູ່ໃນ ສປປ ລາວ,”; ທ່ານ ບາກທີອໍ ຄາດິຣົຟ ຜູ້ຕາງໜ້າອົງການ UNFPA ປະຈໍາ ສປປ ລາວ ກ່າວວ່າ: “ສິ່ງທີ່ພວກເຮົາໄດ້ເຫັນຢູ່ ແຂວງສະຫວັນນະເຂດ ແມ່ນສະທ້ອນໃຫ້ເຫັນເຖິງຄວາມເຂັ້ມແຂງຂອງການລົງທຶນ ແບບມີການປະສານ ງານໃນໄລຍະຍາວ ເຂົ້າໃນລະບົບສາທາລະນະສຸກ,” “ໂດຍການສ້າງຄວາມເຂັ້ມແຂງດ້ານທັກສະໃຫ້ ແກ່ບຸກຄະລາກອນການແພດ, ການປັບປຸງຄວາມພ້ອມຂອງສະຖານທີ່ບໍລິການ ແລະ ການເຊື່ອມຕໍ່ຂອງ ການບໍລິການສຸຂະພາບຈະເລີນພັນ, ແມ່, ເດັກເກີດໃໝ່, ເດັກນ້ອຍ ແລະ ໄວໜຸ່ມ (RMNCAH) ແຕ່ລະດັບຊຸມຊົນຈົນເຖິງລະດັບສົ່ງຕໍ່, ແຜນງານຮ່ວມນີ້ແມ່ນກຳລັງຊ່ວຍສ້າງລະບົບທີ່ສາມາດສະໜອງ ການບໍລິການທີ່ມີຄຸນນະພາບໃຫ້ແກ່ ແມ່ຍິງ, ເດັກເກີດໃໝ່, ເດັກນ້ອຍ ແລະ ໄວໜຸ່ມທຸກຄົນ-ທັງໃນມື້ນີ້ ແລະ ໃນປີຕໍ່ໆໄປ.”; ທ່ານ ດຣ. ຄຣິສໂຕເຟີ ຟິສແພັດທຣິກ ຮອງຜູ້ຕາງໜ້າອົງການ WHO ປະຈໍາ ສປປ ລາວ ກ່າວວ່າ: “ໂດຍຜ່ານແຜນງານຮ່ວມຂອງອົງການສະຫະປະຊາຊາດ, ອົງການອະນາໄມໂລກ (WHO) ມີຄວາມພາກພູມໃຈທີ່ໄດ້ສະໜັບສະໜູນຄວາມຄືບໜ້າທີ່ໂດດເດັ່ນຂອງ ສປປ ລາວ ໃນວຽກງານສຸຂະພາບຈະເລີນພັນ, ແມ່, ເດັກເກີດໃໝ່, ເດັກນ້ອຍ ແລະ ໄວໜຸ່ມ ຊຶ່ງລວມມີ ການຫຼຸດຜ່ອນອັດຕາການເສຍຊີວິດຂອງແມ່ລົງເຖິງ 82% ໃນໄລຍະສອງທົດສະວັດທີ່ຜ່ານມາ,” “ໃນຂະນະທີ່ພວກເຮົາກ້າວເຂົ້າສູ່ໄລຍະທີ 4, ຈຸດສຸມຂອງພວກ ເຮົາແມ່ນການດໍາເນີນງານໃນໄລຍະສຸດ ທ້າຍ ເພື່ອຮັບປະກັນໃຫ້ການບໍລິການສຸຂະພາບຈະເລີນພັນ, ແມ່, ເດັກເກີດໃໝ່, ເດັກນ້ອຍ ແລະ ໄວໜຸ່ມ (RMNCAH) ມີຄວາມຕໍ່ເນື່ອງ, ສະເໝີພາບ ແລະ ມີຄຸນນະພາບສູງ ສາມາດຕອບສະໜອງຕໍ່ ຄວາມຕ້ອງການຂອງແມ່ຍິງ, ເດັກເກີດໃໝ່ ແລະ ເດັກນ້ອຍ ຢູ່ໃນ ສປປ ລາວ. ດ້ວຍການຮ່ວມມືຢ່າງ ຕໍ່ເນື່ອງກັບລັດຖະບານລຸກຊຳບວກ, ພວກເຮົາມີຄວາມມຸ່ງໝັ້ນທີ່ຈະຊຸກຍູ້ຜົນສຳເລັດນີ້ ໃຫ້ມີຄວາມຍືນຍົງ.”

ການຢ້ຽມຢາມໄດ້ສິ້ນສຸດລົງດ້ວຍການເຂົ້າພົບກັບການນໍາຂັ້ນແຂວງ ແລະ ທົບທວນຄືນຜົນຂອງ ການຢ້ຽມຢາມຮ່ວມກັນ ເພື່ອເປັນຂໍ້ມູນໃຫ້ແກ່ຂັ້ນຕອນຕໍ່ໄປ ໃນການສ້າງຄວາມເຂັ້ມແຂງໃຫ້ແກ່ ລະບົບ ສາທາລະນະສຸກ.

(ຂ່າວ: ອຸຍນີເຊບ)