ກິດຈະການວຽກງານແຮ່ທາດບາງວຽກຍັງບໍ່ທັນກົມກຽວກັນ

ແລະ ຄວາມຮັບຜິດຊອບຂອງຂະແໜງການທີ່ກ່ຽວຂ້ອງຂອງອົງ ການຈັດຕັ້ງລັດຂັ້ນສູນກາງ ບາງດ້ານຍັງມີການທັບຊ້ອນ ແລະ ເປັນຊ່ອງວ່າງ.

ທ່ານ ຄຳໂສ້ ກຸໂພຄຳ ຫົວໜ້າຫ້ອງການ ກະຊວງພະລັງງານ - ບໍ່ແຮ່ (ພບ) ມີຄຳເຫັນ ຕໍ່ກອງປະຊຸມປຶກສາຫາລື ຖອດຖອນບົດຮຽນການຈັດຕັ້ງປະຕິບັດວຽກງານຄຸ້ມຄອງບໍ່ແຮ່ ປະຈຳປີ 2024 ແລະ ທິດທາງແຜນການ ປີ 2025 ວ່າ: ການປະສານສົມທົບລະຫວ່າງຂະແໜງການພະລັງງານ ແລະ ບໍ່ແຮ່ ດ້ວຍກັນ, ຂະແໜງການພະລັງງານ ແລະ ບໍ່ແຮ່ ກັບອົງການປົກຄອງທ້ອງຖິ່ນ ໃນກິດຈະການກ່ຽວກັບວຽກງານແຮ່ທາດ ເຫັນວ່າບາງວຽກຍັງບໍ່ທັນກົມກຽວກັນດີເປັນຕົ້ນ: ສິດ ແລະ ໜ້າທີ່ໃນການຄຸ້ມຄອງວຽກງານແຮ່ທາດ ໂດຍສະເພາະແຮ່ທາດອະໂລຫະ, ບໍລິມາດການຂຸດຄົ້ນໜ້ອຍກວ່າໜຶ່ງແສນແມັດກ້ອນລົງ ມາ, ເນື້ອທີ່ບໍ່ເກີນ 4 ເຮັກຕາ, ອາຍຸບໍ່ເກີນ 5 ປີ, ຈໍາໜ່າຍພາຍໃນປະເທດ ແລະ ບໍ່ອະນຸຍາດສົ່ງອອກຕ່າງປະເທດ ຂອງໂຄງການທີ່ຂັ້ນທ້ອງຖິ່ນໄດ້ອອກອະນຸຍາດໃນໄລຍະຜ່ານມາ ບາງໂຄງການຂອງບາງທ້ອງຖິ່ນ ແມ່ນບໍ່ໄດ້ສະເໜີຜ່ານສູນກາງ ເພື່ອກວດກາ ແລະ ມີຄໍາເຫັນດ້ານເນື້ອທີ່ເຂດສໍາປະທານ ເຮັດໃຫ້ມີຫຼາຍໂຄງການທັບຊ້ອນກັນ, ການສະເໜີຂອງບາງທ້ອງຖິ່ນໃຫ້ສູນກາງເປັນຜູ້ອອກອະນຸຍາດສໍາຫຼວດ ຫຼື ຂຸດຄົ້ນແຮ່ທາດອະໂລຫະ ຫຼື ໂລຫະ, ເນື້ອທີ່ເກີນ 4 ເຮັກຕາ ເຫັນວ່າ ການຄົ້ນຄວ້າພາຍໃນທ້ອງຖິ່ນຍັງບໍ່ທັນມີ ຄວາມເປັນເອກະພາບກັນ (ອົງການປົກຄອງແຂວງ, ເມືອງ ແລະ ບ້ານ) ແລະ ຍັງຂາດການກວດກາພື້ນທີ່ຢ່າງລະອຽດລວມທັງແຜນການພັດທະນາໃນເຂດດັ່ງກ່າວ ຈຶ່ງເຮັດໃຫ້ເນື້ອທີ່ຂອງບາງໂຄງ ການມີການທັບຊ້ອນກັບການອອກອະນຸຍາດຂອງຂະແໜງການອື່ນ. ການອອກອະນຸຍາດຂອງຂັ້ນທ້ອງຖິ່ນ ແມ່ນເພື່ອສະໜອງໃຫ້ຕະຫຼາດພາຍໃນປະເທດ ແຕ່ພາກປະຕິບັດຕົວຈິງ ເຫັນວ່າ ຕະຫຼາດພາຍໃນປະເທດ ມີ ຄວາມຈຳກັດ ຈຶ່ງໄດ້ສະເໜີມາຍັງຂັ້ນສູນກາງ ເພື່ອພິຈາລະນາສົ່ງແຮ່ທາດອອກຂາຍຕ່າງປະເທດ.

ທ່ານກ່າວຕື່ມວ່າ: ການກຳນົດຂອບເຂດສິດ ແລະ ຄວາມຮັບຜິດຊອບຂອງຂະແໜງການທີ່ກ່ຽວຂ້ອງຂອງອົງການຈັດຕັ້ງລັດຂັ້ນສູນກາງ ເຫັນວ່າ ບາງດ້ານຍັງມີການທັບຊ້ອນກັນ ແລະ ບາງດ້ານຍັງເປັນຊ່ອງວ່າງ ເປັນຕົ້ນ: ການຄຸ້ມຄອງໂຮງງານປຸງແຕ່ງແຮ່ທາດ, ການຄຸ້ມຄອງບັນຫາສິ່ງແວດລ້ອມດ້ານບໍ່ແຮ່, ການຈັດເກັບລາຍຮັບດ້ານບໍ່ແຮ່, ການຄຸ້ມຄອງ ແລະ ອອກອະນຸຍາດຂຸດຄົ້ນຫີນແຮ່-ຊາຍ, ດິນດໍາ-ດິນແດງ ແລະ ບັນຫາອື່ນໆ ເມື່ອມີບັນຫາເກີດຂຶ້ນ ສັງເກດເຫັນວ່າ ບໍ່ມີພາກສ່ວນໃດຮັບຜິດຊອບ ຫຼື ແກ້ໄຂ ພ້ອມທັງມີການໂຍນວຽກງານ (ຖິ້ມວຽກ) ໃຫ້ພາກສ່ວນອື່ນ ໂດຍຂາດຄວາມຮັບຜິດຊອບ. ການຄົ້ນຄວ້າ, ສ້າງ ແລະ ປັບປຸງ ເຄື່ອງມືນິຕິກຳ ເພື່ອຄຸ້ມຄອງວຽກງານແຮ່ທາດຂອງຂະແໜງການພະລັງງານ ແລະ ບໍ່ແຮ່ ຍັງບໍ່ທັນຄົບຖ້ວນ ແລະ ຮັດກຸມ ເປັນຕົ້ນ: ໃນໄລຍະຊອກຄົ້ນ, ສໍາຫຼວດ ແລະ ຂຸດຄົ້ນແຮ່ທາດ ຜູ້ລົງທຶນຈະຕ້ອງເຮັດຫຍັງແດ່ (SOP), ເອກະສານມີຫຍັງແດ່ ລວມທັງການກຳນົດເວລາຂອງແຕ່ລະໜ້າວຽກຢ່າງລະອຽດ ແລ້ວຈຶ່ງຕິດຕາມ ກວດກາໄປຕາມນັ້ນໄດ້, ຖ້າບໍ່ສໍາເລັດຕາມແຜນການທີ່ຖືກຮັບຮອງ ຫຼື ສັນຍາສໍາປະທານ ໂດຍບໍ່ມີເຫດຜົນ ຫຼື ບໍ່ມີການເຄື່ອນໄຫວວຽກງານຂອງໂຄງການ ຕ້ອງໄດ້ນໍາໃຊ້ມາດຕະການ ຕາມແຕ່ລະກໍລະນີ. ການບັງຄັບໃຊ້ກົດໝາຍ ແລະ ລະບຽບການຂອງຂະ ແໜງການທີ່ກ່ຽວຂ້ອງ ຍັງບໍ່ທັນເຄັ່ງຄັດ, ເຂັ້ມງວດ, ເດັດຂາດ ແລະ ທົ່ວເຖິງ (ໂດຍສະເພາະບັນດາບໍລິສັດທີ່ຈັດຢູ່ປະເພດອ່ອນ ແມ່ນຍັງມີການແກ່ຍາວ ໃນການຍົກເລີກສັນຍາ), ບາງໂຄງການຍັງມີການນໍາໃຊ້ຊ່ອງວ່າງຂອງກົດໝາຍ ແລະ ລະບຽບການ ຈຶ່ງນໍາໄປສູ່ການລັກລອບຂຸດຄົ້ນແຮ່ທາດທີ່ມີຄ່າສູງ (ແຮ່ຄໍາ), ໃນເບື້ອງຕົ້ນໄດ້ຮັບອະນຸຍາດລົງທຶນສໍາຫຼວດແຮ່ທາດອະໂລຫະ ຕໍ່ມາໄດ້ມີການຂໍເພີ່ມແຮ່ທາດໂລຫະເຂົ້າໃນສັນຍາ (ອັນນີ້ ກໍເປັນການສວຍໃຊ້ຊ່ອງວ່າງ ເພາະວ່າ ລັດຖະບານໄດ້ມີແຈ້ງການໂຈະການລົງທຶນໃໝ່ ສໍາລັບແຮ່ທາດໂລຫະ), ບາງໂຄງການຢູ່ໃນໄລຍະສໍາຫຼວດແຮ່ທາດທີ່ມີເນື້ອທີ່ຕິດຈອດກັນໃນໂຄງການດຽວກັນ ແຕ່ເຮັດເປັນສອງສັນຍາ ຕໍ່ມາໄດ້ມີການໂຮມສອງສັນຍາເຂົ້າເປັນສັນຍາດຽວກັນ ແລ້ວມາຂໍຂະຫຍາຍເນື້ອທີ່ຕາມກົດໝາຍວ່າດ້ວຍແຮ່ທາດ (ສາມາດຂະຫຍາຍເນື້ອທີ່ໄດ້ 10% ຂອງເນື້ອທີ່ອະນຸຍາດ, ອັນນີ້ກໍເປັນຊ່ອງວ່າງໜຶ່ງ ເຮັດໃຫ້ໄດ້ຮັບເນື້ອທີ່ຂະຫຍາຍເພີ່ມຂຶ້ນ), ການດໍາເນີນວຽກງານຂ້າມຂັ້ນຕອນ. ມີການລັກລອບຂຸດຄົ້ນ ແລະ ປຸງແຕ່ງແຮ່ທາດທີ່ບໍ່ໄດ້ຮັບອະນຸຍາດຂອງບໍລິສັດຈໍານວນ ໜຶ່ງຍັງເກີດຂຶ້ນຢູ່ບາງແຂວງ ຫຼື ທ້ອງຖິ່ນ, ການດໍາເນີນການຊອກຄົ້ນ, ສໍາຫຼວດ ມີລັກສະນະເບົາບາງ ແລະ ບໍ່ສອດຄ່ອງກັບມາດຕະຖານເຕັກນິກ, ມີໜີ້ຄ້າງຈ່າຍພັນທະທາງດ້ານການເງິນຕາມສັນຍາສຳປະທານ ແລະ ກົດໝາຍ ຕໍ່ ພາກລັດ ຍັງມີຈໍານວນຫຼາຍພໍສົມຄວນ, ການປະຕິບັດຫຼັກການສະຫຼຸບບັນຊີຍັງມີບາງບໍລິສັດປະຕິບັດບໍ່ໄດ້ດີ ເຮັດໃຫ້ການປະຕິບັດພັນທະອາກອນບໍ່ສອດຄ່ອງຕາມຄວາມເປັນຈິງ, ການປ້ອງກັນ ແລະ ປະຕິບັດ ມາດຕະການຄວາມປອດໄພຍັງບໍ່ທັນໄດ້ດີ (ຍັງມີການເສຍຊີວິດຂອງແຮງງານ, ເກີດມີດິນຍຸບ, ດິນເຊາະ ເຈື່ອນ, ເສັ້ນທາງບາງເສັ້ນມີການເປ່ເພ, ມີຂີ້ໃງ່, ແມ່ນໍ້າຂຸ່ນ ເຮັດໃຫ້ຊັບພະຍາກອນນໍ້າຖືກທໍາລາຍ, ສັດນໍ້າ, ພືດຢູ່ໃນນໍ້າຖືກທໍາລາຍ, ນໍ້າບໍ່ສາມາດນໍາໃຊ້ເຂົ້າໃນຊີວິດປະຈຳວັນ ຫຼື ຄົວເຮືອນໄດ້). ນອກນັ້ນ, ບາງບໍລິສັດມີການລັກລອບຕັດໄມ້-ທຳລາຍປ່າເພື່ອນຳໃຊ້ເຂົ້າໃນໂຄງການ, ບາງບໍລິສັດເມື່ອໄດ້ຮັບອະນຸຍາດແລ້ວເມີນເສີຍໃນການຈັດຕັ້ງປະຕິບັດວຽກງານຂອງຕົນໂດຍບໍ່ມີການລາຍງານສະພາບການເຄື່ອນໄຫວໃຫ້ພາກລັດຮັບຮູ້, ມີບໍລິສັດຈຳນວນໜຶ່ງເປັນພຽງນາຍໜ້າອອກຊື່ໃນເອກະສານດ້ານນິຕິກຳເທົ່ານັ້ນ, ແຕ່ການດຳເນີນວຽກງານຕົວຈິງແມ່ນບໍລິສັດອື່ນໂດຍບໍ່ແຈ້ງໃຫ້ພາກລັດຮັບຮູ້, ເມື່ອມີບັນຫາແລ້ວຈຶ່ງແຈ້ງພາຍຫຼັງ.