ປະກາດໂຮມກະຊວງພາຍໃນຂຶ້ນກັບຄະນະຈັດຕັ້ງສູນກາງພັກ

ສະຫາຍ ວິໄລວົງ ບຸດດາຄຳ ກຳມະການສູນກາງພັກ ລັດຖະມົນຕີກະຊວງພາຍໃນໄດ້ຂຶ້ນລາຍງານສະພາບລວມແລະ ການຈັດຕັ້ງປະຕິບັດວຽກງານປັບປຸງກົງຈັກການຈັດຕັ້ງ ໂດຍປະຕິບັດຕາມມະຕິຂອງຄະນະບໍລິຫານງານສູນກາງພັກວ່າດ້ວຍການປັບປຸງກົງຈັກການຈັດຕັ້ງສະບັບເລກທີ 03/ຄບສພ, ລົງວັນທີ 12 ມີນາ 2025, ມະຕິກອງປະຊຸມຂອງສະພາແຫ່ງຊາດວ່າດ້ວຍການຮັບຮອງການປັບປຸງການຈັດຕັ້ງຂອງລັດຖະບານສະບັບເລກທີ 05/ສພຊ, ລົງວັນທີ 20 ມີນາ 2025 ຊຶ່ງໄດ້ຮັບຮອງເອົາການປັບປຸງກົງຈັກການຈັດຕັ້ງຂອງກະຊວງ-ອົງການ. ໃນນີ້, ໂຮມເອົາກະຊວງພາຍໃນຂຶ້ນກັບຄະນະຈັດຕັ້ງສູນກາງພັກ. ດ້ານໂຄງປະກອບການຈັດຕັ້ງພາຍຫຼັງໂຮມເຂົ້າກັນປະກອບມີ 12 ຫົວໜ່ວຍຂັ້ນກົມ.

ໃນພິທີດັ່ງກ່າວ, ສະຫາຍ ນາງ ລີວົງ ລາວລີ ຮອງລັດຖະມົນຕີກະຊວງພາຍໃນໄດ້ຂຶ້ນຜ່ານລັດຖະດຳລັດແຕ່ງຕັ້ງ ແລະ ໄດ້ປະກາດຄະນະຈັດຕັ້ງສູນກາງພັກຊຸດໃໝ່ຊຶ່ງປະກອບມີ 4 ທ່ານຄື: 1. ສະຫາຍນາງ ສີໃສ ລືເດດມູນສອນ ຫົວໜ້າຄະນະຈັດຕັ້ງສູນກາງພັກ; 2. ສະຫາຍ ວິໄລວົງ ບຸດດາຄຳ ຮອງຫົວໜ້າຄະນະຈັດຕັ້ງສູນກາງພັກ; 3. ສະຫາຍນາງບຸດສະດີ ທະນະເມືອງ ຮອງຫົວໜ້າຄະນະຈັດຕັ້ງສູນກາງພັກ;4. ສະຫາຍ ວິສຸກ ພົມພິທັກ ຮອງຫົວໜ້າຄະນະຈັດຕັ້ງສູນກາງພັກ.

ພ້ອມດຽວກັນນີ້, ຄະນະຈັດຕັ້ງສູນກາງພັກຊຸດໃໝ່ນີ້ ກໍປະກອບດ້ວຍຫົວໜ້າກົມມີ 12 ສະຫາຍຄື: 1. ສະຫາຍ ວັນນະບຸບຜາ ຫົວໜ້າຫ້ອງການ; 2. ສະຫາຍ ວຽນທອງ ສິງຄຳພັນ ຫົວໜ້າກົມຈັດຕັ້ງ ແລະ ພະນັກງານ; 3. ສະຫາຍ ຕ໋ອງ ພູມມີພັນ ຫົວໜ້າກົມກວດກາ; 4. ສະຫາຍ ພູຂົງ ພິລາເພັດ ຫົວໜ້າກົມກໍ່ສ້າງພັກ; 5. ສະຫາຍ ພອນສະຫວັນ ໄຊຊະນະ ຫົວໜ້າກົມກົງຈັກການຈັດຕັ້ງພັກ; 6. ສະຫາຍ ສຸລິຍາ ພົມມິສິດ ວ່າການຫົວໜ້າກົມຄຸ້ມຄອງພະນັກງານ; 7. ສະຫາຍ ວຽງເພັດ ແສງທອງ ຫົວໜ້າກົມກໍ່ສ້າງພະນັກງານ; 8. ສະຫາຍ ທອງສະຫວັນ ປັນຍາວິຈິດ ຫົວໜ້າກົມຄຸ້ມຄອງລັດຖະກອນ ແລະ ພາລະກອນ; 9. ສະຫາຍ ບຸນຈັນ ນິຍະວົງ ຫົວໜ້າກົມປົກຄອງທ້ອງຖິ່ນ; 10. ສະຫາຍ ຄຳກອງ ລາວລີ ຫົວໜ້າກົມແຂ່ງຂັນ-ຍ້ອງຍໍ; 11. ສະຫາຍ ສຸລິວັນ ອ່ອນຕາວົງ ຫົວໜ້າກົມພັດທະນາການບໍລິຫານລັດ; 12. ສະຫາຍນາງ ຈັນທາ ອ່ອນໄຊວຽງ ຫົວໜ້າສະຖາບັນຄົ້ນຄວ້າວຽກງານຈັດຕັ້ງແລະການປົກຄອງ.

(ແຫຼ່ງຂ່າວ: ຂ່າວສານພາຍໃນ)