ກົມຂໍ້ມູນຂ່າວສານ ແລະ ສຳເນົາເອກະສານຂອງພັກ ສະຫຼຸບປະຈຳປີ 2023

ກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານປະຈຳປີ 2023 ແລະ ວາງທິດທາງແຜນການປະຈຳປີ 2024 ຂອງກົມຂໍ້ມູນຂ່າວສານ ແລະ ສຳເນົາເອກະສານຂອງພັກ ໄດ້ຈັດຂຶ້ນໃນວັນທີ 21 ທັນວາ ຜ່ານມາ ທີ່ຫ້ອງວ່າການສູນກາງພັກ ໂດຍມີ ທ່ານ ກິ່ງເພັດ ມົງຄົນວິໄລ ຄະນະປະຈຳພັກ ຮອງຫົວໜ້າຫ້ອງວ່າການສູນກາງພັກ ຜູ້ຊີ້ນຳວຽກງານຂໍ້ມູນຂ່າວສານ ແລະ ສຳເນົາເອກະສານຂອງພັກ, ມີບັນດາຫົວໜ້າກົມ, ຮອງກົມ, ຫົວໜ້າພະແນກ, ຮອງພະແນກ ຈະຫຼອດຮອດພະນັກງານລັດຖະກອນເຂົ້າຮ່ວມ.
ທ່ານ ຄໍາພອນ ສອນທະວົງ ເລຂາໜ່ວຍພັກ  ຫົວໜ້າກົມຂໍ້ມູນຂ່າວສານ ແລະ ສໍາເນົາເອກະສານຂອງພັກ ຫ້ອງວ່າການສູນກາງພັກ ໄດ້ກ່າວເປີດກອງປະຊຸມ ແລະ ຜ່ານບົດສະຫຼຸບໂດຍສັງເຂບກ່ຽວກັບການຈັດຕັ້ງປະຕິບັດວຽກງານຂໍ້ມູນຂ່າວສານ ແລະ ສຳເນົາເອກະສານຂອງພັກ ປະຈຳປີ 2023 ແລະ ທິດທາງແຜນການປະຈຳປີ 2024 ຊຶ່ງໄດ້ຍົກໃຫ້ເຫັນສະພາບການເຄື່ອນໄຫວວຽກງານຮອບດ້ານ, ຜົນງານທີ່ກົມຂໍ້ມູນຂ່າວສານ ແລະ ສຳເນົາເອກະສານຂອງພັກຍາດມາໄດ້ ແລະ ຂໍ້ຄົງຄ້າງໃນໄລຍະຜ່ານມາ.    
     ຈາກນັ້ນ, ທ່ານ ສົມໄພວັນ ແສງສຸຣິຍະ ຮອງຫົວໜ້າກົມຂໍ້ມູນຂ່າວສານ ແລະ ສໍາເນົາເອກະສານຂອງພັກໄດ້ສະເໜີກ່ຽວກັບແຜນພັດທະນາຫັນເປັນດີຈີຕອນ ແລະ ແຜນກະກຽມປັບປຸງຫ້ອງມູນເຊື້ອ ຂອງຫ້ອງວ່າການສູນກາງພັກ ເພື່ອຫັນວຽກງານຫ້ອງວ່າການສູນກາງພັກເປັນທັນສະໄໝ ແລະ ເປັນຕົວຢ່າງໃຫ້ບັນດາອົງການຈັດຕັ້ງພັກ-ລັດ ໃນການຫັນເປັນທັນສະໄໝໃນຮູບແບບດີຈີຕອນ.
ນອກນັ້ນ, ທ່ານ ແສງເດືອນເພັງ ໂຄດລືຊາ ຮອງຫົວໜ້າກົມຂໍ້ມູນຂ່າວສານ ແລະ ສຳເນົາເອກະສານຂອງພັກຍັງໄດ້ຖືໂອກາດຂື້ນກ່າວເປີດຂະບວນການແຂ່ງຂັນຮັດຊາດ ແລະ ພັດທະນາ ຂອງກົມຮອດປີ 2025.
ໃນໂອກາດດັ່ງກ່າວ ທ່ານ ກິ່ງເພັດ ມົງຄົນວິໄລ ໄດ້ສະແດງຄວາມຍ້ອງຍໍຊົມເຊີຍບັນດາຜົນສໍາເລັດທີ່ກົມຂໍ້ມູນຂ່າວສານ ແລະ ສໍາເນົາເອກະສານຂອງພັກ ຍາດມາໄດ້, ພ້ອມທັງເນັ້ນບາງບັນຫາທີ່ກົມຂໍ້ມູນຂ່າວສານ ແລະ ສຳເນົາເອກະສານຂອງພັກ ຕ້ອງໄດ້ສຸມໃສ່ປະຕິບັດໃນປີ 2024 ດັ່ງນີ້:
1.    ກ່ຽວກັບລະບົບກອງປະຊຸມທາງໄກຕ້ອງໄດ້ສຶບຕໍ່ຄົ້ນຄວ້າ ແລະ ພັດທະນາໃຫ້ໄດ້ມາດຕະຖານ, ຮັບປະກັນການນຳໃຊ້ໃນການຈັດກອງປະຊຸມຕ່າງໆຂອງການນຳ ລະຫວ່າງປະເທດ, ສູນກາງກັບແຂວງ, ແຂວງກັບເມືອງ ໃຫ້ມີປະສິດທິພາບ ແລະ ຍືນຍົງໂດຍການສົມທົບກັບພາກສ່ວນທີ່ກ່ຽວຂ້ອງໃນການກະກຽມຄວາມພ້ອມທາງດ້ານວັດຖຸ, ເຕັກນິກ, ພ້ອມທັງຕິດຕາມກວດກາ ແລະ ຖອດຖອນບົດຮຽນໃນແຕ່ລະໄລຍະ, ນັບທັງສຶບຕໍ່ຄົ້ນຄວ້າ, ຂື້ນແຜນປັບປຸງ ແລະ ພັດທະນາອຸປະກອນ LED ຢູ່ແຕ່ລະຫ້ອງປະຊຸມ ໃຫ້ມີປະສິດທິພາບ ແລະ ຍືນຍົງ.
2.    ການປັບປຸງລະບົບເຄື່ອງຈັກແມ່ (Server) ຫັນໄປສູ່ລະບົບ Cloud, ຫັນເປັນລວມສູນ, ພ້ອມທັງຂຶ້ນແຜນປັບປຸງໃນແຕ່ລະໄລຍະ, ສົມທົບກັບທ້ອງຖິ່ນຮາກຖານກວດກາຄືນລະບົບ Server ຂອງວຽກງານກົມກອງ, ທ້ອງຖິ່ນຮາກຖານໃຫ້ຮັບປະກັນມາດຕະຖານ ແລະ ຄົ້ນຄວ້າພັດທະນາເພື່ອຂະຫຍາຍໄປນຳໃຊ້ຢູ່ບັນດາແຂວງ, ເມືອງ ແລະ ຕາແສງຕໍ່ໄປ.
3.    ລະບົບຄຸ້ມຄອງເອກະສານຫັນນຳໃຊ້ລະບົບທັນສະໄໝ ໃນການຄຸ້ມຄອງເອກະສານ ຂອງ ຫສພ ສາມາດເຊື່ອມໂຍງເອກະສານ ທົ່ວ ຫສພ ໄດ້ຢ່າງສະດວກ ແລະ ວ່ອງໄວ, ໂດຍຄົ້ນຄວ້ານຳໃຊ້ລະບົບ e-office ຫຼື Lotunote; ຄົ້ນຄວ້າ, ພັດທະນາລະບົບຫໍສະໝຸດ (e-Library) ໃຫ້ມີຄວາມທັນສະໄໝ, ພ້ອມທັງ ກວດກາຄືນປື້ມ ຫຼື ເອກະສານ ທີ່ບໍ່ຈຳເປັນ ແລະ ບໍ່ກ່ຽວຂ້ອງກັບວຽກງານ, ພາລະບົດບາດ ຂອງ ຫສພ ແມ່ນໃຫ້ເອົາອອກ ຈາກຫ້ອງສະໝຸດ. ພ້ອມທັງຄົ້ນຄວ້າຂຶ້ນແຜນສ້າງ ແລະ ພັດທະນາລະບົບສຳເນົາ ຂອງ ຫສພ ໃຫ້ທັນສະໄໝ (e-archives).
4.    ການເຊື່ອມໂຍງຂໍ້ມູນຂ່າວສານລະຫວ່າງ ຫສພ ກັບອົງການຈັດຕັ້ງຕ່າງໆ ທັງຂັ້ນສູນກາງ ລົງຮອດທ້ອງຖິ່ນໄລຍະສັ້ນ: ຕ້ອງຄົ້ນຄວ້າຂຶ້ນແຜນສ້າງ ແລະ ພັດທະນາລະບົບຖານຂໍ້ມູນ ເພື່ອໃຫ້ບັນດາອົງການຈັດຕັ້ງ ທັງຂັ້ນສູນກາງ ແລະ ທ້ອງຖິ່ນ ໄດ້ປ້ອນຂໍ້ມູນເຂົ້າໃນລະບົບ ໃຫ້ສູນກາງພັກ ກໍຄື ຫສພ ແລະ ຄົ້ນຄວ້າ ອອກແບບ ແບບສອມຖາມ ເພື່ອເກັບກຳຂໍ້ມູນ ຕ່າງໆ. ໄລຍະຍາວ: ໃຫ້ສົມທົບກັບພາກສ່ວນກ່ຽວຂ້ອງ ເພື່ອຄົ້ນຄວ້າຄວາມເປັນໄປໄດ້ໃນການພັດທະນາ ລະບົບເຊື່ອມໂຍງ ຖານຂໍ້ມູນຂ່າວສານກັບພາກສ່ວນຕ່າງໆ.
5.    ເອົາໃຈໃສ່ ປະຕິບັດແຜນພັດທະນາຫັນເປັນ ດີຈີຕອນ ທົ່ວ ຫສພ ຄວບຄູ່ກັບການຜັນຂະຫຍາຍເນື້ອໃນບົດບັນທຶກຄວາມເຂົ້າໃຈ MOU ລະຫວ່າງ ຫສພ ກັບ ກະຊວງເຕັກໂນໂລຊີ ແລະ ການສື່ສານໃຫ້ເປັນໂຄງການລະອຽດ ແລະ ຈັດຕັ້ງປະຕິບັດຮ່ວມກັນ ຢ່າງມີປະສິດທິພາບ ແລະ ເປັນຮູບປະທຳ. ໂດຍບັນດາກົມຕ່າງໆ ຕ້ອງສ້າງຄວາມເຂົ້າໃຈ ເປັນເອກະພາບ ພ້ອມກັນຈັດຕັ້ງປະຕິບັດ ບັນລຸຕາມ ແຜນຫັນເປັນທັນສະໄໝທີ່ວາງໄວ້ ແລະ ບັນຫາອື່ໆອີກ.