ສະຫາຍ ພັນໂທ ທອງສະຫວັດ ສີສົງຄາມ ຮອງຫົວໜ້າຫ້ອງການເມືອງ ກອງບັນຊາການທະຫານອາກາດໄດ້ຜ່ານບົດສະຫຼຸບຂະບວນການແຂ່ງຂັນປະຈໍາປີ 2024 ຍົກໃຫ້ເຫັນເນື້ອໃນຂະບວນການແຂ່ງຂັນຮັກຊາດ ແລະ ພັດທະນາໃນໄລຍະຜ່ານມາມີຜົນສໍາເລັດຫຼາຍດ້ານ ທີ່ປັບປຸງກໍ່ສ້າງກົມກອງໃຫ້ເຕີບໃຫຍ່ເຂັ້ມແຂງທາງດ້ານເມືອງ, ການທະຫານ, ດ້ານວຽກງານວິຊາສະເພາະ ແລະ ສ້າງກົມກອງມີແບບແຜນທັນສະໄໝ ໂດຍສະເພາະຄະນະພັກ-ຄະນະບັນຊາແຕ່ລະຂັ້ນໄດ້ສຸມໃສ່ຍົກສູງໜ້າທີ່ການເມືອງ, ການຈັດຕັ້ງ, ດ້ານລະບຽບແບບແຜນທີ່ຖືກຕ້ອງຂອງພັກ-ລັດພ້ອມທັງເຮັດໜ້າທີ່ສຶກສາອົບຮົມການເມືອງ-ນໍາແນວຄິດໃຫ້ພະນັກງານ-ນັກຮົບພາຍໃນກົມກອງເຊື່ອມຊຶມກໍາແໜ້ນແນວທາງນະໂຍບາຍຂອງພັກ, ກົດໝາຍຂອງລັດ, ບັນດາມະຕິ, ຄໍາສັ່ງ ແລະ ລະບຽບການຂອງກອງທັບໄດ້ຢ່າງເຂັ້ມງວດໂດຍປິ່ນອ້ອມ 4 ໜ້າທີ່ໃຫຍ່ 26 ແຜນງານຂອງຂັ້ນເທິງ ສາມາດບັນລຸຜົນສໍາເລັດຕາມເນື້ອໃນແຂ່ງຂັນຂອງກົມກອງວາງອອກໄດ້ຢ່າງຈົບງາມ.ພ້ອມນັ້ນໄດ້ສຸມໃສ່ຈັດຕັ້ງປະຕິບັດການແກ້ໄຂປະກົດການຫຍໍ້ທໍ້ທີ່ເກີດຂຶ້ນພາຍໃນກົມກອງ ແລະ ເປັນເຈົ້າການເກັບກໍາສະພາບການໃນເຂດຕັ້ງທັບຂອງກົມກອງໃຫ້ມີຄວາມສະຫງົບໂດຍພື້ນຖານ.
ຈາກນັ້ນ, ສະຫາຍ ພັນໂທ ວັນນະກອນ ກໍຜາສຸກ ຫົວໜ້າພະແນກນະໂຍບາຍຫ້ອງການເມືອງ ກອງບັນຊາການທະຫານອາກາດໄດ້ຜ່ານຂໍ້ຕົກລົງວ່າດ້ວຍການມອບຫຼຽນກຽດຕິຄຸນກອງທັບປະຊາຊົນລາວໃຫ້ນາຍທະຫານກອງບັນຊາການທະຫານອາກາດຈໍານວນ 19 ສະຫາຍ, ມອບໃບຍ້ອງຍໍກົມກອງລວມໝູ່ຈໍານວນ 9 ກົມກອງ, ບຸກຄົນ 315 ສະຫາຍ ແລະ ມອບໃບຊົມເຊີຍໃຫ້ບຸກຄົນ 107 ສະຫາຍຕື່ມອີກ.
ໂອກາດດັ່ງກ່າວ, ຕາງໜ້າບັນດາຫ້ອງ, ກອງພັນ, ກອງຮ້ອຍ ແລະ ອົງການຈັດຕັ້ງມະຫາຊົນໄດ້ລົງນາມ ເຊັນບົດບັນທຶກຮັບເອົາເນື້ອໃນຂໍ້ແຂ່ງຂັນ 7 ຂໍ້ເພື່ອພ້ອມກັນນໍາໄປຈັດຕັ້ງປະຕິບັດຜັນຂະຫຍາຍຢູ່ບັນດາກອງຕົນໃຫ້ມີຜົນສໍາເລັດ.
ແຫຼ່ງຂ່າວ: ກອງບັນຊາການທະຫານອາກາດ
ຄໍາເຫັນ