 |
ກອງປະຊຸມໄດ້ດໍາເນີນໄປດ້ວຍບັນຍາການອັນສະໜິດສະໝົມ, ເຊື່ອໝັ້ນເຊິ່ງກັນ ແລະ ກັນ ບົນຈິດໃຈແຫ່ງມິດຕະພາບອັນຍິ່ງໃຫຍ່, ຄວາມສາມັກຄີພິເສດ ຮ່ວມມືຮອບດ້ານ ແລະ ຫຸ້ນສ່ວນຍຸດທະສາດ ລະຫວ່າງ ສອງພັກ ແລະ ສອງລັດຖະບານ. ທັງສອງຝ່າຍໄດ້ຮ່ວມກັນທົບທວນຄືນການຈັດຕັ້ງປະຕິບັດນິຕິກໍາຊາຍແດນ ທີ່ທັງສອງຝ່າຍໄດ້ຮ່ວມກັນລົງນາມໃນປີ 2016 ຈໍານວນ 2 ສະບັບຄື: 1) ອະນຸສັນຍາ ວ່າດ້ວຍ ເສັ້ນຊາຍແດນ ແລະ ຫຼັກໝາຍຊາຍແດນ ແລະ 2) ສັນຍາ ວ່າດ້ວຍ ລະບຽບການຄຸ້ມຄອງຊາຍແດນ ແລະ ດ່ານຊາຍແດນ ລະຫວ່າງ ສປປ ລາວ ແລະ ສສ ຫວຽດນາມ. ພ້ອມກັນນີ້, ກໍໄດ້ສະຫຼຸບ, ສັງເກດຕີລາຄາ ການຈັດຕັ້ງປະຕິບັດເນື້ອໃນບົດບັນທຶກກອງປະຊຸມສາມັນປະຈໍາປີ ຄັ້ງທີ 34 ຂອງຄະນະຜູ້ແທນຊາຍແດນ ລາວ-ຫວຽດນາມ ໃນໄລຍະ 6 ເດືອນຕົ້ນປີ 2026 ທີ່ຜ່ານມາ. ອົງການຊາຍແດນສອງຝ່າຍນັບທັງຂັ້ນສູນກາງ-ທ້ອງຖິ່ນ ກໍໄດ້ສືບຕໍ່ຄວາມພະຍາຍາມໃນການປະສານສົມທົບ, ຮັກສາ ແລະ ເສີມຂະຫຍາຍຢ່າງບໍ່ຢຸດຢັ້ງ ເພື່ອປະກອບສ່ວນເຂົ້າໃນການຮັກສາສະຖຽນລະພາບທາງການເມືອງ, ຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ຄວາມປອດໄພຂອງສັງຄົມ ສ້າງເງື່ອນໄຂສະດວກໃນການພັດທະນາເສດຖະກິດ-ສັງຄົມ, ຮັບປະກັນດ້ານປ້ອງກັນຊາດ-ປ້ອງກັນຄວາມສະຫງົບ ໃນບໍລິເວນຊາຍແດນ ປະກອບສ່ວນສໍາຄັນໃນການເສີມຂະຫຍາຍ, ເພີ່ມທະວີສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ. ທັງສອງຝ່າຍໄດ້ປະສານສົມທົບກັນຢ່າງແໜ້ນແຟ້ນໃນວຽກງານປົກປັກຮັກສາຄວາມສະຫງົບຢູ່ຕາມບໍລິເວນຊາຍແດນ, ເຈົ້າໜ້າທີ່ຂອງທັງສອງຝ່າຍໄດ້ຈັດຕັ້ງການລາດຕະ ເວນຮ່ວມກັນ 60 ຄັ້ງ, ລວມມີ ພະນັກງານ ແລະ ນັກຮົບ ທີ່ກ່ຽວຂ້ອງເຂົ້າຮ່ວມ ຈໍານວນ 1,716 ຄົນ. ສາມາດຮັກສາໄດ້ສະຖຽນລະພາບຢູ່ຕາມບໍລິເວນຊາຍແດນ ແລະ ສ້າງເງື່ອນໄຂອໍານວຍຄວາມສະດວກໃຫ້ແກ່ການເຄື່ອນໄຫວການຄ້າ ລະຫວ່າງ ສອງຝ່າຍ ຊຶ່ງໃນໄລຍະ 6 ເດືອນຕົ້ນປີ ລວມຍອດການ ນໍາເຂົ້າ-ສົ່ງອອກ ລະຫວ່າງ ລາວ-ຫວຽດນາມ ບັນລຸໄດ້ 1,305 ຕື້ໂດລາ.
 |
ວຽກງານອັນພົ້ນເດັ່ນຂອງສອງຄະນະວິຊາການປະສົມຊາຍແດນໃນໄລຍະ 6 ເດືອນຜ່ານມາ, ສອງຝ່າຍໄດ້ລົງກວດກາຢູ່ພື້ນທີ່ຕົວຈິງຮ່ວມກັນ 3 ຄັ້ງ ເພື່ອແກ້ໄຂບັນຫາຊາຍແດນ ໂດຍສະເພາະແມ່ນກວດກາຫຼັກໝາຍທີ່ຖືກເປ່ເພເຊາະເຈື່ອນຈາກໄພທໍາມະຊາດ, ຊອກຫາວິທີເສີມສ້າງຄວາມໝັ້ນຄົງໃຫ້ແກ່ລະບົບຫຼັກໝາຍຊາຍແດນ ແລະ ແກ້ໄຂບັນຫາການກໍ່ສ້າງກິດຈະການຢູ່ໃນຂອບເຂດ 100 ແມັດ ຫ່າງຈາກເສັ້ນຊາຍແດນຂອງທັງສອງຝ່າຍ.
ໃນກອງປະຊຸມ, ສອງຝ່າຍຍັງໄດ້ວາງທິດທາງແຜນການເຄື່ອນໄຫວ ໃນໄລຍະ 6 ເດືອນ ທ້າຍປີ 2026 ຮ່ວມກັນ. ໃນນັ້ນ, ນອກຈາກສືບຕໍ່ວຽກງານປົກປັກຮັກສາຄວາມສະຫງົບເປັນລະບຽບຮຽບຮ້ອຍຢູ່ຕາມບໍລິເວນຊາຍແດນ ແລະ ປົກປັກຮັກສາເສັ້ນຊາຍແດນ ແລະ ລະບົບຫຼັກໝາຍຊາຍແດນໃຫ້ມີຄວາມໝັ້ນຄົງແລ້ວ, ທັງສອງຝ່າຍຍັງຈະໄດ້ປະສານສົມທົບກັນຈັດຕັ້ງກອງປະຊຸມເຜີຍແຜ່ບັນດານະໂຍບາຍ ແລະ ລະບຽບກົດໝາຍ ທີ່ກ່ຽວກັບວຽກງານຊາຍແດນ ໃຫ້ແກ່ບັນດານາຍບ້ານດີເດັ່ນຢູ່ບໍລິເວນສອງຟາກຊາຍແດນ ຊຶ່ງຄາດວ່າຈະໄດ້ຈັດຂຶ້ນທີ່ແຂວງສະຫວັນນະເຂດ, ສປປ ລາວ ໃນທ້າຍເດືອນ ກັນຍາ 2026 ນີ້. ທັງສອງຝ່າຍເຫັນດີ ນໍາເອົາເນື້ອໃນບົດບັນທຶກກອງປະຊຸມທີ່ໄດ້ເອກະພາບຮ່ວມກັນ ລາຍງານຕໍ່ຫົວໜ້າຄະນະຜູ້ແທນຊາຍແດນຂອງຕົນ ເພື່ອມີທິດຊີ້ນໍາສືບຕໍ່ຈັດຕັ້ງປະຕິບັດໃນຕໍ່ໜ້າ.
ໃນໂອກາດເຂົ້າຮ່ວມກອງປະຊຸມ ຄະນະຜູ້ແທນຊາຍແດນຂອງສອງຝ່າຍຍັງໄດ້ເຄື່ອນໄຫວຢ້ຽມຢາມບູຮານສະຖານທີ່ເກົ່າແກ່ ແລະ ແຫຼ່່ງທ່ອງທ່ຽວທໍາມະຊາດຈໍານວນໜຶ່ງຂອງແຂວງຫຼວງພະບາງອີກດ້ວຍ.
(ຂ່າວ: ກຕທ)
ຄໍາເຫັນ