ຂປລ. ກອງປະຊຸມເຈົ້າໜ້າທີ່ອາວຸໂສຂົນສົ່ງອາຊຽນ ຄັ້ງທີ 56 ແລະກອງປະຊຸມປິ່ນອ້ອມ ທີ່ ສປປ ລາວເປັນເຈົ້າພາບຈັດຂຶ້ນໃນລະຫວ່າງ ວັນທີ 7-8 ພະຈິກ ນີ້ທີ່ນະຄອນ-ຫຼວງພະບາງ ແຂວງຫຼວງພະບາງ ໂດຍການເປັນປະທານຂອງ ທ່ານ ງາມປະສົງ ເມືອງມະນີ ລັດຖະມົນຕີກະຊວງ ໂຍທາທິການ ແລະ ຂົນສົ່ງ, ມີບັນດາເຈົ້າໜ້າທີ່ອາວຸໂສຂົນສົ່ງອາຊຽນ 10 ປະເທດອາຊຽນ, ຕີມໍແລັດສະເຕ ແລະ ບັນດາປະເທດຄູ່ຮ່ວມມື ກັບອາຊຽນ ເຊັ່ນ: ສປ ຈີນ, ສ ເກົາຫຼີ, ຍີ່ປຸ່ນ ແລະ ສະຫະພາບເອີຣົບ ເຂົ້າຮ່ວມ.
ກອງປະຊຸມໄດ້ປຶກສາຫາລື, ທົບທວນ ແລະ ຮັບຮອງບັນຫາຈາກກອງປະຊຸມເຈົ້າໜ້າທີ່ອາວຸດໂສຂົນສົ່ງອາຊຽນ ຄັ້ງທີ 55 ທີ່ຈັດຂຶ້ນໃນລະຫວ່າງ ວັນທີ 6-7 ມິຖຸນາ ຜ່ານມາ ທີ່ນະຄອນຫຼວງວຽງຈັນ ໂດຍມີບັນດາໜ້າວຽກປະກອບມີ: ທົບທວນການຈັດຕັ້ງປະຕິບັດບັນດາໜ້າວຽກ, ກິດຈະກໍາ ແລະ ບັນດາແຜນງານ ທີ່ໄດ້ຕົກລົງຮ່ວມກັນ ໃນກອງປະຊຸມລັດຖະມົນຕີຂົນສົ່ງອາຊຽນຄັ້ງທີ 28 ແລະ ບັນດາກອງປະຊຸມປິ່ນອ້ອມ ທີ່ຈັດຂຶ້ນຢູ່ບາລີ ປະເທດອິນໂດເນເຊຍໃນ ປີ 2022 ຜ່ານມາ; ລາຍງານຄວາມຄືບໜ້າການຈັດຕັ້ງແຜນງານ 2022-2023 ພາຍໃຕ້ແຜນຍຸດທະສາດຂົນສົ່ງອາຊຽນ 2016-2025 ແລະ ທົບທວນທ້າຍສະໄໝຂອງແຜນຍຸດທະສາດ ສະບັບປັດຈຸບັນ ເພື່ອຮ່າງຍຸດທະສາດສະບັບຕໍ່ໄປ; ຕິດຕາມຜົນກອງປະຊຸມຂອງ 4 ໜ່ວຍງານ ຢູ່ໃນແຜນຍຸດທະສາດການຂົນສົ່ງອາຊຽນຄື: ໜ່ວຍງານການຂົນສົ່ງທາງອາກາດ, ໜ່ວຍງານການຂົນສົ່ງທາງບົກ, ໜ່ວຍງານການຂົນສົ່ງທາງທະເລ, ການຂົນສົ່ງແບບຍືນຍົງ ແລະ ໜ່ວຍງານການອໍານວຍຄວາມສະດວກດ້ານການຂົນສົ່ງ; ທັງກະກຽມເອກະສານ ທີ່ຈະສະເໜີຮັບຮອງໃນກອງປະຊຸມລັດຖະມົນຕີຂົນສົ່ງອາຊຽນຄັ້ງທີ 29 ທີ່ ສປປ ລາວ ເປັນເຈົ້າພາບ, ພ້ອມທັງໄດ້ເຊີນປະເທດ ຕີມໍແລັດສະເຕ ເຂົ້າເປັນຜູ້ສັງເກດການໃນກອງປະຊຸມລະດັບວິຊາການ, ລະດັບໜ່ວຍງານ ແລະ ອື່ນໆ ຂອງຂະ
ແໜງການຂົນສົ່ງ ຕື່ມອີກ.
ຂ່າວ: ທະນູສິນ
ຄໍາເຫັນ