 |
ໃນກອງປະຊຸມ, ສອງຝ່າຍໄດ້ປຶກສາຫາລືແລກປ່ຽນຄວາມຄິດເຫັນ ແລະ ຕີລາຄາການປະຕິບັດບົດບັນທຶກກອງປະຊຸມຄັ້ງຜ່ານມາ ທີ່ໄດ້ຮ່ວມລົງນາມກັນ, ສອງຝ່າຍໄດ້ຕີລາຄາສູງ, ພ້ອມທັງຊົມເຊີຍຕໍ່ຄວາມເອົາໃຈໃສ່ ແລະ ການຮ່ວມມືອັນດີງາມ ລະຫວ່າງເຈົ້າໜ້າທີ່ກ່ຽວຂ້ອງ ໂດຍສະເພາະ ບັນດາເມືອງທີ່ມີຊາຍແດນຕິດຈອດກັນຂອງສອງແຂວງ ທີ່ໄດ້ຮ່ວມກັນຮັກສາຄວາມສະຫງົບສຸກ, ຄວາມເປັນລະບຽບຮຽບຮ້ອຍຕາມບໍລິເວນຊາຍແດນ ເຊັ່ນ: ການເຮັດຜິດກົດໝາຍຕາມບໍລິເວນຊາຍແດນ, ການຂ້າມແດນເຂົ້າ-ອອກຢ້ຽມຢາມຂອງປະຊາຊົນ ແລະ ຮ່ວມກັນແກ້ໄຂປະກົດການຫຍໍ້ທໍ້ຕ່າງໆ ແລະ ການພົວພັນກັນຂອງປະຊາຊົນທີ່ອາໃສຢູ່ຕາມບໍລິເວນຊາຍແດນ ໂດຍປະຕິບັດຕາມກົດໝາຍຂອງສອງປະເທດ ໃຫ້ມີປະສິດທິພາບສູງ.
ກອງປະຊຸມໃນຄັ້ງນີ້ ໄດ້ປຶກສາຫາລື ແລະ ເປັນເອກະພາບສືບຕໍ່ຈັດຕັ້ງປະຕິບັດການຮ່ວມມືໃນດ້ານຕ່າງໆ ເຊັ່ນ: ການຮ່ວມມືຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍ ຕາມຊາຍແດນ, ສອງຝ່າຍສືບຕໍ່ຮ່ວມມືໃນການປ້ອງກັນ, ສະກັດກັ້ນທຸກການເຄື່ອນໄຫວ, ການກໍ່ການຮ້າຍ ແລະ ອາຊະຍາກຳຂ້າມແດນ, ຮ່ວມມືປ້ອງກັນ ແລະ ສະກັດກັ້ນຢາເສບຕິດ ຕາມບໍລິເວນຊາຍແດນ; ສອງຝ່າຍເອກະພາບສະໜັບສະໜູນໃຫ້ແກ່ຫ້ອງການປະສານງານ, ຄວບຄຸມຢາເສບຕິດຕາມຊາຍແດນ (BLOs.), ຮ່ວມມືວຽກງານຕ້ານການຄ້າມະນຸດ, ຄວາມເປັນລະບຽບຮຽບຮ້ອຍ ແລະ ການເຂົ້າ-ອອກຜ່ານຊາຍແດນ. ນອນນັ້ນ, ຍັງໄດ້ຮ່ວມມືດ້ານເສດຖະກິດ-ສັງຄົມ ແລະ ມະນຸດສະທຳ, ວຽກງານການຂົນສົ່ງ, ວຽກງານວັດທະນະທຳ ແລະ ທ່ອງທ່ຽວ ສອງຝ່າຍເອກະພາບ ຮ່ວມມືຍົກສູງ ຄຸນນະພາບດ້ານ ການທ່ອງທ່ຽວ ແລະ ຜະລິດຕະພັນ ແລະ ການບໍລິການ ການທ່ອງທ່ຽວ ດ້ວຍການໂຄສະນາແລກປ່ຽນຂໍ້ມູນຂ່າວສານ ແລະ ຈັດກິດຈະກຳຕ່າງໆ ເພື່ອດຶງດູດນັກທ່ອງທ່ຽວໃນການເດີນທາງ ເຂົ້າ-ອອກ ຜ່ານແດນເຊິ່ງກັນ ແລະ ກັນ; ສອງແຂວງເຮັດໜ້າທີ່ພົວພັນແລກປ່ຽນ ແລະ ສົ່ງເສີມໃຫ້ ທຸລະກິດທ່ອງທ່ຽວຮ່ວມມືກັນ ເພື່ອຍົກສູງດ້ານການທ່ອງທ່ຽວຂອງສອງແຂວງ ແລະ ມີການແລກປ່ຽນ; ການແລກປ່ຽນດ້ານສຶກສາ ແລະ ກິລາ. ດ້ານສາທາລະນະສຸກ ສອງຝ່າຍເອກະພາບໃຫ້ມີການຮ່ວມມື ແຈ້ງຂໍ້ມູນຂ່າວສານກ່ຽວກັບພະຍາດລະບາດ ເຫດສຸກ ເສີນຕ່າງໆ ແລະ ອື່ນໆ
 |
ກອງປະຊຸມຄັ້ງນີ້, ສອງຝ່າຍ ຍັງໄດ້ຮ່ວມລົງນາມນຳກັນ, ຝ່າຍແຂວງຈໍາປາສັກ ລົງນາມໂດຍ ທ່ານ ອາລຸນໄຊ ສູນນະລາດ ແລະ ຝ່າຍແຂວງເປຣະວີເຣຍ ລົງນາມໂດຍ ທ່ານ ກິມ ເຣິດທີ ຊຶ່ງມີຜູ້ແທນຂອງສອງຝ່າຍ ເຂົ້າຮ່ວມ ເປັນສັດຂີພະຍານ.
(ຂ່າວ: ທັດຊະນະ)
ຄໍາເຫັນ