 |
ກອງປະຊຸມໃນຄັ້ງນີ້ ແມ່ນເພື່ອປະເມີນຄວາມຄືບໜ້າ ແລະ ກຳນົດການດຳເນີນຂັ້ນຕອນຕໍ່ໄປ ເພື່ອເສີມສ້າງຄວາມເຂັ້ມແຂງໃຫ້ແກ່ການຄຸ້ມຄອງໜີ້ສິນ ແລະ ການບໍລິຫານຄວາມສ່ຽງດ້ານງົບປະມານຢູ່ ສປປ ລາວ. ເພື່ອແນໃສ່ຜັນຂະຫຍາຍຍຸດທະສາດ ທີ່ເພີ່ມທະວີຄວາມເຂັ້ມແຂງດ້ານປະສິດຕິພາບ ຄວາມໂປ່ງໃສ ແລະ ຄວາມຍືນຍົງໃນໄລຍະຍາວ ຂອງການຄຸ້ມຄອງໜີ້ສິນສາທາລະນະຂອງ (ສປປ ລາວ).
ທ່ານ ສຸລິວັດ ສຸວັນນະຈູມຄຳ ໄດ້ກ່າວວ່າ: ລັດຖະບານ ສປປ ລາວ ມີຄວາມເອົາໃຈໃສ່ການຊຸກຍູ້ການປະຕິຮູບທີ່ຈະຟື້ນຟູສະຖຽນລະພາບຂອງເສດຖະກິດມະຫາພາກ, ສ້າງຄວາມເຂັ້ມແຂງທາງດ້ານການເງິນພາກລັດ ແລະ ຮັບປະກັນການຄຸ້ມຄອງໜີ້ສິນໃຫ້ມີຄວາມໂປ່ງໃສ ແລະ ຍືນຍົງສຳລັບ ສປປ ລາວ. ທ່ານຍັງໄດ້ກ່າວເນັ້ນເຖິງຄວາມມຸ່ງໝັ້ນຂອງລັດຖະບານຕໍ່ 3 ບຸລິມະສິດທີ່ສຳຄັນຄື: ການຄຸ້ມຄອງໜີ້ສິນສາທາລະນະໃຫ້ເຂັ້ມແຂງການເພີ່ມທະວີການບໍລິຫານການເງິນພາກລັດ ແລະ ການປະເມີນຄວາມສ່ຽງດ້ານງົບປະມານ, ພ້ອມທັງ ການຈັດການຄວາມສ່ຽງທາງການເງິນຂອງລັດວິສາຫະກິດ ແລະ ໜີ້ສິນສໍາຮອງ.
ທ່ານ ປຣະວິດ ຣາມາຈັນດຣານໄດ້ກ່າວວ່າ: ກະຊວງການເງິນມີຄວາມຄືບໜ້າຢ່າງພົ້ນເດັ່ນໃນການສ້າງຄວາມເຂັ້ມແຂງດ້ານການຄຸ້ມຄອງໜີ້ສິນການສົ່ງເສີມຄວາມໂປ່ງໃສແລະ ການປັບປຸງຂອບນິຕິກຳໂດຍຜ່ານກົດໝາຍວ່າດ້ວຍການຄຸ້ມຄອງໜີ້ສິນສາທາລະນະ. ຄວາມພະຍາຍາມເຫຼົ່ານີ້ມີຄວາມສຳຄັນຢ່າງຍິ່ງຕໍ່ການສ້າງລະບົບການຄຸ້ມຄອງໜີ້ສິນໃຫ້ສາ
ມາດຮອງຮັບກັບສະພາບການປ່ຽນແປງ ແລະ ໂປ່ງໃສເພີ່ມຂຶ້ນ. ADB ຢືນຢັນເຖິງການສະໜັບສະໜູນຂອງຕົນຕໍ່ ສປປ ລາວ ເພື່ອຄວາມກ້າວໜ້າຂອງການປະຕິບັດງານດ້ານໜີ້ສິນໃຫ້ມີຄວາມຍືນຍົງ”.
ກອງປະຊຸມໄດ້ປຶກສາຫາລືກ່ຽວກັບເຕັກນິກການປະເມີນຄວາມສ່ຽງທາງດ້ານການງົບປະມານ ແລະ ວິທີການຄຸ້ມຄອງໜີ້ສິນສໍາຮອງໂດຍເນັ້ນໃສ່ບັນຫາທີ່ຕິດພັນກັບລັດວິສາຫະກິດ. ຜູ້ຊ່ຽວຊານຈາກພາກພື້ນໄດ້ແບ່ງປັນປະສົບການຕົວຈິງ ແລະ ແນວທາງການປະຕິບັດທີ່ດີທີ່ສຸດຢ່າງມີຫົວຄິດປະດິດສ້າງໂດຍເນັ້ນເຖິງຄວາມສໍາຄັນຂອງການຖອດຖອນບົດຮຽນຊຶ່ງກັນລະຫວ່າງຜູ້ຊ່ຽວຊານ ແລະ ການເພີ່ມທະວີການປະສານງານຮ່ວມກັນ ເພື່ອຫຼຸດຜ່ອນຄວາມສ່ຽງທາງດ້ານງົບປະມານທີ່ຫຍຸ້ງຍາກ.
ໂດຍອີງໃສ່ຜົນສຳເລັດຂອງກອງປະຊຸມລະດັບສູງຄັ້ງປະຖົມມະລຶກທີ່ໄດ້ຈັດຂຶ້ນໃນປີ 2023, ມັນໄດ້ສະແດງໃຫ້ເຫັນເຖິງຄວາມມຸ່ງໝັ້ນຢ່າງເລິກຊຶ່ງຂອງລັດຖະບານແຫ່ງ ສປປ ລາວ ທີ່ຈະພັດທະນາການລວມສູນທາງດ້ານງົບປະມານ, ການຄຸ້ມຄອງການເງິນພາກລັດທີ່ເຂັ້ມແຂງແລະ ຄວາມໂປ່ງໃສດ້ານໜີ້ສິນໃຫ້ເພີ່ມສູງຂຶ້ນ ຊຶ່ງເປັນເສົາຄ້ຳທີ່ສຳຄັນໃນການສ້າງສະຖຽນລະພາບເສດຖະກິດມະຫາພາກ ແລະ ການພັດທະນາທີ່ຍືນຍົງ. ກອງປະຊຸມຄັ້ງນີ້ ຍັງໄດ້ເນັ້ນໜັກເຖິງຄວາມສຳຄັນຂອງການຮ່ວມມືກັບສາກົນໃນການສ້າງລະບົບການເງິນພາກລັດທີ່ສາມາດຮອງຮັບກັບສະພາບການປ່ຽນແປງ. ຂ່າວ-ຮູບ:ບຸນຕອມ
ຄໍາເຫັນ