 |
ກອງປະຊຸມດັ່ງກ່າວ ມີລັດຖະມົນຕີຕ່າງປະເທດ ແລະ ຫົວໜ້າຄະນະຜູ້ແທນຈາກປະເທດສະມາຊິກຂອບການຮ່ວມມືແມ່ນ້ຳຂອງ - ສ ເກົາຫຼີ ປະກອບດ້ວຍ ກຳປູເຈຍ, ສປປ ລາວ, ມຽນມາ, ໄທ, ຫວຽດນາມ ແລະ ສ ເກົາຫຼີ ເຂົ້າຮ່ວມ ເພື່ອຕີລາຄາຄືນໝາກຜົນຂອງການຮ່ວມມືໃນໄລຍະຜ່ານມາ ກໍຄື ບັນດາແຜນງານ, ໂຄງການທີ່ນອນໃນແຜນປະຕິບັດງານ ພາຍໃຕ້ຂອບການຮ່ວມມືແມ່ນ້ຳຂອງ - ສ ເກົາຫຼີ ສະບັບປີ 2021-2025 (PlanofAction ຫຼື PoA2021-2025). ພ້ອມທັງ, ໄດ້ປຶກສາຫາລື ແລະ ແລກປ່ຽນຄຳເຫັນເພື່ອກຳນົດແຜນງານ ແລະ ທິດທາງໃນຕໍ່ໜ້າໂດຍເນັ້ນໃສ່ 3 ເສົາຄໍ້າ (ປະຊາ ຊົນ, ຄວາມຈະເລີນຮຸ່ງເຮືອງ ແລະ ສັນຕິພາບ) ແລະ 7 ຂົງເຂດການຮ່ວມມືບຸລິມະສິດ ຄື: 1). ວັດທະນະທຳ ແລະ ການທ່ອງທ່ຽວ, 2). ການພັດທະນາຊັບພະຍາກອນມະນຸດ, 3). ການພັດທະນາກະສິກຳ ແລະ ຊົນນະບົດ, 4). ພື້ນຖານໂຄງລ່າງ, 5). ເຕັກໂນໂລຊີຂ່າວສານ ແລະ ການສື່ສານ, 6). ສິ່ງແວດລ້ອມ ແລະ 7). ສິ່ງທ້າທາຍຕໍ່ຄວາມໝັ້ນຄົງທີ່ບໍ່ແມ່ນການທະຫານ .
 |
ໃນໂອກາດນີ້, ທ່ານ ທອງສະຫວັນ ພົມວິຫານ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ໝາກຜົນຂອງການຮ່ວມມື ພາຍໃຕ້ຂອບການຮ່ວມມືແມ່ນ້ຳຂອງ - ສ ເກົາຫຼີ ຕະຫຼອດໄລຍະຜ່ານມາ ກໍຄືການຈັດຕັ້ງແຜນປະຕິບັດງານສະບັບຜ່ານມາ ຊຶ່ງໄດ້ສົ່ງເສີມການສ້າງຂີດຄວາມສາມາດ, ການພັດທະນາຊັບພະຍາກອນມະນຸດ, ການຮ່ວມມືດ້ານສາທາລະນະສຸກ, ດີຈີຕອນ, ສິ່ງແວດລ້ອມ ແລະ ການພັດທະນາຊຸມຊົນ ຜ່ານໂຄງການທີ່ໄດ້ຮັບການສະໜັບສະໜູນ ຈາກກອງທຶນຂອບການຮ່ວມມືແມ່ນ້ຳຂອງ - ສ ເກົາຫຼີ (Mekong-ROK Cooperation Fund ຫຼື MKCF). ພ້ອມດຽວກັນ, ກໍໄດ້ສະເໜີບາງທິດທາງ ແລະ ແຜນການຮ່ວມມື ໂດຍໃຫ້ເນັ້ນຄວາມສຳຄັນຕໍ່ການພັດທະນາຊັບພະຍາກອນມະນຸດ, ການພັດທະນາທັກສະດ້ານດີຈີຕອນ, ການສົ່ງເສີມການເຕີບໂຕສີຂຽວ, ພະລັງງານສະອາດ, ການຮັບມືກັບການປ່ຽນແປງຂອງສະພາບດິນຟ້າອາກາດ, ການພັດທະນາເວທີເຄືອຂ່າຍທຸລະກິດດີຈີຕອນ ແມ່ນ້ຳຂອງ - ສ ເກົາຫຼີ, ການເຊື່ອມໂຍງພາກພື້ນ ແລະ ການແລກປ່ຽນລະຫວ່າງປະຊາຊົນ. ພິເສດ, ສປປ ລາວ ໄດ້ຢ້ຳຄວາມສຳຄັນຂອງການເຊື່ອມໂຍງພາກພື້ນ ເພື່ອສະໜັບສະໜູນວິໄສທັດການຫັນປ່ຽນຈາກປະເທດທີ່ບໍ່ມີຊາຍແດນຕິດກັບທະເລ ກາຍເປັນປະເທດທີ່ເຊື່ອມໂຍງ ແລະ ເຊື່ອມຈອດໃນພາກພື້ນ. ທ່ານຮອງນາຍົກລັດຖະມົນຕີ ຍັງໄດ້ຢືນຢັນຄວາມໝາຍໝັ້ນຂອງ ສປປ ລາວ ໃນການຮ່ວມມືຢ່າງໃກ້ຊິດກັບ ສ ເກົາຫຼີ ແລະ ບັນດາປະເທດສະມາຊິກແມ່ນ້ຳຂອງ ເພື່ອເຮັດໃຫ້ຂອບການຮ່ວມມື Mekong-ROK ມີປະສິດທິພາບ ແລະ ປະສິດທິຜົນຫຼາຍຂຶ້ນ.
ກອງປະຊຸມໄດ້ຮັບຊາບເອກະສານສຳຄັນ 1 ສະບັບ ຄື: ຖະແຫຼງການຂອງປະທານຮ່ວມກອງປະຊຸມ (Co-Chairs’ Statement) ແລະ ປິດລົງດ້ວຍບັນຍາກາດແຫ່ງມິດຕະພາບ, ຄວາມເຂົ້າໃຈ ແລະ ຄວາມຕັ້ງໃຈຮ່ວມກັນທີ່ຈະສືບຕໍ່ພັດທະນາຂອບການຮ່ວມມື ແມ່ນ້ຳຂອງ - ສ ເກົາຫຼີ ໃຫ້ມີຄວາມເຂັ້ມແຂງ ແລະ ເກີດຜົນປະໂຫຍດຢ່າງເປັນຮູບປະທຳຕໍ່ປະຊາຊົນຂອງພາກພື້ນ.
(ຂ່າວ: ກຕທ)
ຄໍາເຫັນ