 |
ກອງປະຊຸມໃຫຍ່ໄດ້ເຫັນດີເປັນເອກະພາບຮັບຮອງເອົາບົດລາຍງານການເມືອງ ຊຶ່ງໄດ້ຕີລາຄາໝາກຜົນແຫ່ງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VIII ຂອງໜ່ວຍພັກໃນ 5 ປີ ທີ່ຜ່ານມາ ແລະ ໄດ້ຮັບຜົນສໍາເລັດສໍາຄັນໃຫຍ່ຫຼວງ ແລະ ຜົນງານອັນພົ້ນເດັ່ນຮອບດ້ານທີ່ຍາດມາໄດ້, ຊຶ່ງໄດ້ສ້າງໜໍ່ແໜງສໍາຄັນເພື່ອເປັນປັດໄຈຍູ້ການຫັນປ່ຽນແຂງແຮງ ແລະ ເລິກເຊິ່ງຂອງວຽກງານອົບຮົມໃນຊຸມປີຕໍ່ໜ້າ. ກອງປະຊຸມໃຫຍ່ຍັງໄດ້ເປັນເອກພາບຢ່າງພາວະວິໄສດ້ານຂໍ້ຄົງຄ້າງ, ຂໍ້ຂາດຕົກບົກຜ່ອງໃນການນໍາພາຊີ້ນໍາຂອງພັກກໍຄືການຈັດຕັ້ງປະຕິບັດວຽກງານວິຊາສະເພາະ ແລະ ວຽກງານຈຸດສຸມໃນບາງດ້ານທີ່ບໍ່ສາມາດບັນລຸຕາມຄາດໝາຍທີ່ວາງໄວ້, ພ້ອມທັງໄດ້ຊີ້ໃຫ້ເຫັນສາເຫດຕົນຕໍ ເພື່ອກໍານົດທິດທາງມາດຕະການແກ້ໄຂທີ່ສອດ ຄ່ອງ ແລະ ແທດເໝາະເພື່ອຮັບປະກັນໃຫ້ແກ່ການຫັນປ່ຽນຢ່າງຈິງຈັງໃນການຈັດຕັ້ງປະຕິບັດໜ້າທີ່ວິຊາສະເພາະໃນຕໍ່ໜ້າ, ກອງປະຊຸມໄດ້ຮັບຮອງເອົາແຜນພັດທະນາວຽກງານຂອງກົມໄລຍະ 5 ປີ 2026-2030, ກອງປະຊຸມໄດ້ຮັບຮອງເອົາບົດສໍາຫຼວດການນໍາພາຂອງຄະນະໜ່ວຍພັກກົມອົບຮົມສະໄໝທີ VIII ຊຶ່ງໄດ້ຕີລາຄາສູງຕໍ່ຄວາມພະຍາຍາມອັນຕັ້ງໜ້າ ແລະ ຄວາມເປັນເຈົ້າການປະດິດສ້າງໃນການເສີມຂະຫຍາຍມູນ ເຊື້ອ ແລະ ບົດຮຽນຂອງການນໍາພາໜ່ວຍພັກຂອງຄະນະໜ່ວຍພັກສາມາດນໍາພາການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ VIII ໄດ້ຮັບຜົນສໍາເລັດຫຼາຍດ້ານ. ພ້ອມກັນນັ້ນ ກໍສະແດງຄວາມຊົມເຊີຍຕໍ່ການເປັນຄະນະນໍາທີ່ມີຄວາມສາມັກຄີເປັນເອກະພາບອັນໜັກແໜ້ນເຂັ້ມແຂງ, ເປັນຫຼັກແຫຼ່ງແກ່ນສານໃຫ້ແກ່ຄວາມສາ ມັກຄີເປັນເອກະພາບໃນໜ່ວຍພັກ, ເປັນເຈົ້າການຢ່າງເຂັ້ມງວດໃນການຕີຖອຍ ແລະ ແກ້ໄຂການກະທໍາທີ່ຝືນກັບລະບຽບພັກ, ກອງປະຊຸມໃຫຍ່ໄດ້ເລັ່ງທວງໃຫ້ຄະນະໜ່ວຍພັກຊຸດທີ IX ອອກແຮງເສີມຂະຫຍາຍຈຸດດີໃນດ້ານຕ່າງໆຢ່າງແຂງແຮງ, ແກ້ໄຂຂໍ້ບົກຜ່ອງ ແລະ ຂໍ້ຄົງຄ້າງທີ່ຜ່ານມາຢ່າງຈິງຈັງ, ຍົກສູງຄວາມສາ ມາດນໍາພາ ແລະ ຄວາມເປັນແບບຢ່າງນໍາໜ້າຂອງຄະນະນໍາໃຫ້ສູງຂຶ້ນ, ເປັນຫຼັກແຫຼ່ງສ້າງການຫັນປ່ຽນທີ່ແຂງແຮງໃນຊຸມປີຕໍ່ໄປ.
ໃນກອງປະຊຸມ,ສະມາຊິກພັກໃນໜ່ວຍພ້ອມກັນໃຊ້ສິດປະຊາທິປະໄຕຂອງຕົນປ່ອນບັດເລືອກຕັ້ງເອົາຄະນະໜ່ວຍພັກຊຸດໃໝ່ໂດຍມີຜູ້ສະໝັກເປັນຄະນະໜ່ວຍພັກ 5 ສະຫາຍ, ກອງປະຊຸມປະຖົມມະລຶກຂອງຄະນະໜ່ວຍພັກຊຸດໃໝ່ໄດ້ເລືອກເອົາ: ສະຫາຍ ຄໍາກອງ ທໍາມະເທວາ ເປັນເລຂາໜ່ວຍພັກ, ສະຫາຍ ລີຈາວ ໄຊເຍ່ຍຊ່າງ ເປັນຮອງເລຂາໜ່ວຍພັກ, ສະຫາຍ ນ. ກີຄໍາ ແກ່ນມະນີ ເປັນຄະນະໜ່ວຍພັກ, ທັງເປັນປະທານກວດກາ.
ໃນນັ້ນ, ກອງປະຊຸມຄັ້ງປະຖົມມະລຶກ ໄດ້ຕົກລົງແຕ່ງຕັ້ງ ສະຫາຍ ນ. ວັນນະທອນ ວົງລະຄອນ ເປັນຜູ້ຊ່ວຍວຽກງານກວດກາ.
ເພື່ອເປັນທິດໃຫ້ແກ່ການເຄື່ອນໄຫວວຽກງານຂອງໜ່ວຍພັກກົມອົບຮົມ, ກອງປະຊຸມໃຫຍ່ຄັ້ງນີ້ໄດ້ຮັບກຽດໃຫ້ການໂອ້ລົມຂອງ ສະຫາຍ ນ. ວິລະວອນ ພັນທະວົງ ຊຶ່ງເຕັມໄປດ້ວຍເນື້ອໃນ ແລະ ມີຄວາມໝາຍສຳຄັນທັງເປັນທິດຊີ້ນຳໃຫ້ໜ່ວຍພັກກໍຄືສະມາຊິກພັກພວກເຮົາໄດ້ສູ້ຊົນບຸກບືນຝຶກຝົນຫຼໍ່ຫຼອມຕົນເອງໃຫ້ກາຍເປັນສະມາຊິກພັກເຂັ້ມແຂງ.
ກອງປະຊຸມໃຫຍ່ໄດ້ຮຽກຮ້ອງມາຍັງສະມາຊິກພັກພາຍໃນໜ່ວຍທຸກສະຫາຍຈົ່ງເພີ່ມທະວີຄວາມສາ ມັກຄີເປັນເອກະພາບ, ຕັ້ງໜ້າຝຶກຝົນຫຼໍ່ຫຼອມຄຸນທາດການເມືອງ, ຄຸນສົມບັດສິນທຳປະຕິວັດໃຫ້ສູງຂຶ້ນຢ່າງບໍ່ຢຸດຢັ້ງ, ເອົາໃຈໃສ່ປັບປຸງຍົກລະດັບຄວາມຮູ້, ຄວາມສາມາດ ແລະ ຄວາມເປັນເຈົ້າການໃນການປະຕິບັດໜ້າທີ່ວຽກງານທີ່ກອງປະຊຸມໃຫຍ່ຄັ້ງນີ້ ໄດ້ຮັບຮອງເອົາໃຫ້ບັນລຸຜົນສຳເລັດດ້ວຍປະສິດທິຜົນສູງເພື່ອສ້າງໜ່ວຍພັກກົມອົບຮົມສືບຕໍ່ເປັນໜ່ວຍພັກປອດໃສເຂັ້ມແຂງໜັກແໜ້ນ. (ຂ່າວ: ແສງຈັນ)
ຄໍາເຫັນ