 |
ເມື່ອທົບທວນຄືນເສັ້ນທາງແຫ່ງການພດທະນາ ນັບແຕ່ປີ 1986 ມາເຖິງປັດຈຸບັນ, ການພັດທະນາແທດຈິງຂອງຫວຽດນາມ ໄດ້ສະແດງໃຫ້ເຫັນການປ່ຽນແປງຢ່າງເລິກເຊິ່ງ ແລະ ຮອບດ້ານ.ຈາກລະບົບເສດຖະກິດແຜນການລວມສູນ, ຫວຽດນາມ ໄດ້ສ້າງຕັ້ງ ແລະ ສໍາເລັດຢ່າງສົມບູນແບບນະໂຍບາຍເສດຖະກິດຕະຫຼາດຕາມທິດສັງຄົມນິຍົມ ເທື່ອລະກ້າວ, ຮັກສາອັດຕາການເຕີບໂຕ GDP ສະເລ່ຍເກີນ 6,5% ຕໍ່ປີ ໃນຫຼາຍທົດສະວັດ. ລາຍໄດ້ສະເລ່ຍຕໍ່ຫົວຄົນເພີ່ມຂຶ້ນເກືອບ 25 ເທົ່າ, ສະທ້ອນໃຫ້ເຫັນຄວາມພາກພຽນຢ່າງຕໍ່ເນື່ອງໃນການພັດທະນາເສດຖະກິດ ຄຽງຄູ່ກັບການຮັກສາຄວາມໝັ້ນຄົງທາງການເມືອງ–ສັງຄົມ. ຄຽງຄູ່ກັນນັ້ນ, ຂະບວນການເຊື່ອມໂຍງສາກົນ ໄດ້ເປັນເຈົ້າການຜັນຂະຫຍາຍຢ່າງຕັ້ງໜ້າ ແລະ ມີປະສິດທິຜົນ, ຊ່ວຍໃຫ້ຫວຽດນາມ ເປີດກວ້າງການຮ່ວມມື, ເຂົ້າຮ່ວມຢ່າງຕັ້ງໜ້າໃນບັນດາຕ່ອງໂສ້ການເຊື່ອມໂຍງລະດັບພາກພື້ນ ແລະ ລະດັບໂລກ, ຢັ້ງຢືນບົດບາດທີ່ສໍາຄັນຫຼາຍຂຶ້ນ ໃນບັນດາກົນໄກ ແລະ ກອບການຮ່ວມມືຫຼາຍຝ່າຍ.
ໃນລະດັບສາກົນ, ຫວຽດນາມ ນັບມື້ຖືກຮັບຮອງເປັນຄູ່ຮ່ວມມືທີ່ໜ້າເຊື່ອຖື, ມີຄວາມຮັບຜິດຊອບ ແລະ ມີຄໍາເວົ້າທີ່ສ້າງສັນໃນບັນດາບັນຫາລະດັບພາກພື້ນ ແລະ ລະດັບໂລກ. ການສ້າງຕັ້ງ ແລະ ການຍົກລະດັບຄວາມສໍາພັນເປັນຄູ່ຮ່ວມຍຸດທະສາດ, ຄູ່ຮ່ວມມືຮອບດ້ານ ກັບຫຼາຍປະເທດ, ໃນນັ້ນລວມມີບັນດາປະເທດໃຫຍ່ ແລະ ສູນກາງເສດຖະກິດຊັ້ນນໍາ, ພ້ອມກັບບົດບາດເຄື່ອນໄຫວໃນບັນດາເວທີຫຼາຍຝ່າຍເຊັ່ນ: ອາຊຽນ, ສະຫະປະຊາຊາດ, APEC…, ໄດ້ຊ່ວຍເສີມສ້າງ ແລະ ເນັ້ນເຖິງຖານະບົດບາດຂອງປະເທດ, ຂະຫຍາຍພື້ນທີ່ການພັດທະນາ ແລະ ເພີ່ມທະວີຄວາມສາມາດໃນການປັບຕົວຮັບມືກັບການຜັນແປຈາກພາຍນອກ. ນີ້ແມ່ນພື້ນຖານທີ່ສໍາຄັນ ເພື່ອໃຫ້ຫວຽດນາມສາມາດຮັກສາໄວ້ຢ່າງໝັ້ນຄົງຄວາມເປັນເອກະລາດ, ເພິ່ງຕົນເອງ, ພ້ອມກັບການເຂົ້າຮ່ວມສາກົນຢ່າງຕັ້ງໜ້າ, ເລິກເຊິ່ງ ແລະ ມີປະສິດທິຜົນ.
 |
ການດໍາເນີນກອງປະຊຸມໃຫຍ່ ຄັ້ງທີ XIV, ແມ່ນຈິດໃຈແຫ່ງຄວາມປາຖະໜາໃນການພັດທະນາ ຖືກວາງໄວ້ ຊຶ່ງບໍ່ພຽງແຕ່ໃນຂອບເຂດທົ່ວປະເທດເທົ່ານັ້ນ, ແຕ່ຍັງເຊື່ອມໂຍງກັບຄວາມຈໍາເປັນໃນການຍົກສູງບົດບາດ ແລະ ຖານະຂອງຫວຽດນາມ ໃນເວທີສາກົນອີກດ້ວຍ. ວຽກງານການຈັດລຽງບັນດາເອກະສານ ເພື່ອນໍາສະເໜີຕໍ່ກອງປະຊຸມໃຫຍ່ ໄດ້ຖືກດໍາເນີນຢ່າງຄົບຊຸດ, ເປັນລະບຽບດ້ວຍວິທີວິທະຍາສາດ, ສອດຄ່ອງຕິດແທດຕົວຈິງ ລະຫວ່າງ ການສະຫຼຸບ, ທົບທວນຄືນການປະຕິບັດຈິງຕະຫຼອດ 40 ປີແຫ່ງການປ່ຽນແປງໃໝ່ ກັບການຄາດຄະເນແນວທາງການພັດທະນາຂອງພາກພື້ນ ແລະ ຂອງໂລກ. ການເກັບກໍາຄໍາເຫັນ ຈາກບັນດາຊັ້ນຊົນຕ່າງໆຂອງປະຊາຊົນຢ່າງກວ້າງຂວາງ, ດຶງດູດການມີສ່ວນຮ່ວມເກືອບ 14 ລ້ານເທື່ອຄົນ, ບໍ່ພຽງແຕ່ສະທ້ອນໃຫ້ເຫັນຄຸນຄ່າຂອງຄວາມເປັນປະຊາທິປະໄຕ ແລະ ຄວາມເຫັນພ້ອມທາງສັງຄົມໃນລະດັບສູງ, ແຕ່ຍັງຊ່ວຍປັບປຸງ ແລະ ເຮັດໃຫ້ສົມບູນຍິ່ງຂຶ້ນບັນດາທິດທາງໃຫຍ່ ກ່ຽວກັບການພັດທະນາຢ່າງຍືນຍົງ, ການຫັນປ່ຽນດິຈິຕອນ, ການຮັບປະກັນຄວາມໝັ້ນຄົງດ້ານເສດຖະກິດ, ຄວາມໝັ້ນຄົງດ້ານພະລັງງານ ແລະ ການເຂົ້າຮ່ວມຢ່າງຕັ້ງໜ້າໃນການແກ້ໄຂບັນດາສິ່ງທ້າທາຍລະດັບໂລກ.
ຄວາມສົນໃຈຂອງມວນຊົນສາກົນຕໍ່ກອງປະຊຸມໃຫຍ່ ຄັ້ງທີ XIV ໄດ້ສະແດງອອກຢ່າງຊັດເຈນຜ່ານການເຂົ້າຮ່ວມຂອງສື່ມວນຊົນຕ່າງປະເທດ ແລະ ຄະນະຜູ້ແທນສາກົນ ໂດຍມີນັກຂ່າວສາກົນເກືອບ 800 ຄົນ ຈາກບັນດາປະເທດ, ໃນນັ້ນ ລວມທັງນັກຂ່າວຈາກ ສປປລາວ ໄດ້ລົງທະບຽນເພື່ອຕິດຕາມ ແລະ ລາຍງານຂ່າວຢ່າງທັນການ, ໄດ້ສະທ້ອນໃຫ້ເຫັນຄວາມສົນໃຈຢ່າງເລິກເຊິ່ງຂອງປະຊາຄົມໂລກ ຕໍ່ບັນດາທິດທາງໃຫຍ່ຂອງຫວຽດນາມ, ພ້ອມທັງຄວາມຄາດຫວັງ ຕໍ່ບົດບາດທີ່ນັບມື້ພົ້ນເດັ່ນຂຶ້ນ, ມີຄວາມຮັບຜິດຊອບສູງຂຶ້ນຂອງຫວຽດນາມ ໃນພາກພື້ນ ແລະ ໃນເວທີສາກົນ.
ການກ້າວສູ່ກອງປະຊຸມໃຫຍ່ ຄັ້ງທີ XIV, ຄວາມເຊື່ອໝັ້ນຂອງສັງຄົມ ໄດ້ຮັບການເສີມສ້າງຈາກບັນດາຜົນສໍາເລັດການພັດທະນາທີ່ບັນລຸໄດ້, ຈາກຂະບວນການກະກຽມທີ່ເຂັ້ມງວດ, ເປັນລະບົບ, ມີຄວາມຮັບຜິດຊອບ, ຕະຫຼອດຈົນເຖິງວິທີການທີ່ຫວຽດນາມ ໄດ້ຢັ້ງຢືນຖານະບົດບາດ ແລະ ຊື່ສຽງຂອງຕົນ ໃນເວທີສາກົນ. ບັນດາກິດຈະກໍາທາງການເມືອງ–ວັດທະນະທໍາ ທີ່ພວມດໍາເນີນໃນໂອກາດທີ່ມີຄວາມໝາຍສໍາຄັນນີ້ເຊັ່ນ: ພິທີເປີດສູນຂ່າວສານ, ການຈັດງານເທດການສະເພາະດ້ານ, ການຈັດວາງສະແດງເອກະສານປະຫວັດສາດ ຊຶ່ງບໍ່ພຽງແຕ່ຊ່ວຍແຜ່ຂະຫຍາຍບັນຍາກາດທາງການເມືອງທີ່ໝັ້ນຄົງພາຍໃນປະເທດເທົ່ານັ້ນ, ແຕ່ຍັງໄດ້ຖ່າຍທອດຂໍ້ຄວາມຢ່າງຊັດເຈນໄປສູ່ເພື່ອມິດສາກົນ ກ່ຽວກັບປະເທດຫວຽດນາມ ທີ່ມີຄວາມສະຖຽນພາບ, ມີການປ່ຽນແປງໃໝ່, ມີການເຄື່ອນໄຫວດ້ວຍການເຂົ້າຮ່ວມສາກົນ ແລະ ພ້ອມທີ່ຈະມີສ່ວນຮ່ວມດ້ວຍຄວາມຮັບຜິດຊອບຢ່າງຕັ້ງໜ້າ ໃນການສົ່ງເສີມສັນຕິພາບ, ການຮ່ວມມື ແລະ ການພັດທະນາ.
ໃນບັນຍາກາດທີ່ມຄວາມໝາຍສໍາຄັນນີ້, ກອງປະຊຸມໃຫຍ່ ຄັ້ງທີ XIV ຂອງພັກກອມມູນິດຫວຽດນາມ ໄດ້ຄາດຫວັງວ່າ: ຈະສືບຕໍ່ຢັ້ງຢືນທາດແທ້, ຄວາມສາມາດ ແລະ ຄວາມສາມັກຄີຂອງພັກ ແລະ ຂອງຊາດ, ພ້ອມທັງເປັນການເປີດບັນດາກຳນົດທິດທີ່ສໍາຄັນໃນໄລຍະການພັດທະນາໃໝ່, ມຸ່ງໜ້າສູ່ເປົ້າໝາຍ ສ້າງປະເທດຫວຽດນາມ ໃຫ້ພັດທະນາຢ່າງໄວ, ຍືນຍົງ, ສີວິໄລ ແລະ ຄວາມຜາສຸກ ໃນຫຼາຍທົດສະວັດຕໍ່ໜ້າ.
ຄໍາເຫັນ