ໃນພິທີດັ່ງກ່າວ, ສະຫາຍ ພອນແກ້ວ ຕົ້ນວໍລະຈິດ ໄດ້ຂຶ້ນກ່າວເປີດກອງປະຊຸມຢ່າງເປັນທາງການ; ຈາກນັ້ນ, ສະຫາຍ ໄກມະນິນ ເທບບົວລີ ຮອງເລຂາຄະນະບໍລິຫານງານຊາວໜຸ່ມ ສະພາແຫ່ງຊາດ ໄດ້ຜ່ານບົດລາຍງານການເມືອງ ປະກອບມີ 2 ພາກຄື: ພາກທີ I ຕີລາຄາສະພາບການຈັດຕັ້ງປະຕິບັດມະຕິກອງປະຊຸມໃຫຍ່ສະມາຊິກຊາວໜຸ່ມ ປະຊາຊົນ ປະຕິວັດລາວ ສະພາແຫ່ງຊາດຄັ້ງທີ IV (2020-2025) ແລະ ພາກທີ II ທິດທາງແຜນການຂອງຄະນະບໍລິຫານງານຊາວໜຸ່ມ ສະພາແຫ່ງຊາດໃນ 5 ປີ ຕໍ່ໜ້າ (2025-2023). ໃນໄລຍະ 5 ປີ ຜ່ານມາ, ຄະນະບໍລິຫານງານຊາວໜຸ່ມສະພາແຫ່ງຊາດ ໄດ້ເອົາໃຈໃສ່ນໍາພາບັນດາໜ່ວຍຊາວໜຸ່ມຮາກຖານ ແລະ ສະມາຊິກຊາວໜຸ່ມສ້າງຂະບວນການຕ່າງໆ ໂດຍຕິດພັນກັບວິຊາສະເພາະຢ່າງກວ້າງຂວາງ ເປັນຂະບວນຟົດຟື້ນ ແລະ ມີຜົນສໍາເລັດເປັນກ້າວໆ ໂດຍສະເພາະຄະນະບໍລິຫານງານຊາວໜຸ່ມສະພາແຫ່ງຊາດ ໄດ້ເອົາໃຈໃສ່ ແລະ ຊຸກຍູ້ສະມາຊິກຊາວໜຸ່ມຕັ້ງໜ້າປະຕິບັດວຽກງານວິຊາສະເພາະ ເພື່ອເປັນເສນາທິການຫຼັກ ໃນການຄົ້ນຄວ້າຮ່າງເນື້ອໃນ, ເກັບກຳສັງລວມຂໍ້ມູນໃຫ້ຄະນະປະຈຳສະພາແຫ່ງຊາດ, ກຳມາທິການ, ຄະນະເລຂາທິການສະພາແຫ່ງຊາດ, ກົງຈັກທີ່ຄະນະປະຈຳສະພາແຫ່ງຊາດສ້າງຕັ້ງ ໃນການປະຕິບັດພາລະບົດບາດ ນິຕິບັນຍັດ, ຕົກລົງບັນຫາສໍາຄັນພື້ນຖານຂອງປະເທດຊາດ ແລະ ຕິດຕາມກວດກາ ການປະຕິບັດລັດຖະທຳມະນູນ ແລະ ກົດໝາຍ ໃຫ້ມີປະສິດທິຜົນສູງ.
ກອງປະຊຸມຍັງໄດ້ ມອບໃບຢັ້ງຢືນ 4 ບຸກ ແລະ ທຸງໄຊນຳໜ້າ ຂະບວນການ 4 ບຸກໃຫ້ຄະນະຊາວໜຸ່ມສະພາແຫ່ງຊາດ, ໄດ້ມີການຜ່ານບົດສໍາຫຼວດການນໍາພາຂອງຄະນະບໍລິຫານງານຊາວໜຸ່ມສະພາແຫ່ງຊາດ ສະໄໝທີ IV, ມອບຫຼຽນຊາວໜຸ່ມຕະລຸມບອນ ແລະ ໃບຍ້ອງຍໍໃຫ້ຄະນະບໍລິຫານງານຊາວໜຸ່ມສະພາແຫ່ງຊາດສະໄໝທີ IV, ປ່ອນບັດເລືອກຕັ້ງເອົາຄະນະບໍລິຫານງານຊາວໜຸ່ມປະຊາຊົນ ປະຕິວັດລາວ ສະພາແຫ່ງຊາດຊຸດໃໝ່ ຊຶ່ງມີຜູ້ສະໝັກ 18 ສະຫາຍ, ເລືອກເອົາ 15 ສະຫາຍ; ກອງປະຊຸມຄັ້ງປະຖົມມະລືກ ໄດ້ເປັນເອກະພາບເລືອກເອົາ ສະຫາຍ ສົມບູນ ໂຄດໄຊ ເປັນເລຂາ, ສະຫາຍ ສົມຈິດ ພົມຖາວົງ ເປັນຮອງເລຂາທັງເປັນປະທານກວດກາ, ສະຫາຍ ຈັນໄລວັນ ພົມມາໄຊ ເປັນຮອງເລຂາ, ສະຫາຍ ສົມຈັນ ໄຊມົ້ງຢາງ ເປັນຮອງປະທານກວດກາ, ສະຫາຍ ເສລິສັນ ວົງແສງຈັນ ເປັນກຳມະການ.
ໃນໂອກາດດັັ່ງກ່າວ, ສະຫາຍ ທັນຕາ ກອງຜາລີ ແລະ ສະຫາຍ ທອງລີ ສີສຸລິດ ໄດ້ໃຫ້ກຽດໂອ້ລົມ ຊຶ່ງໄດ້ສະແດງຄວາມຍ້ອງຍໍຊົມເຊີຍ ຕໍ່ຄະນະບໍລິຫານງານ ແລະ ສະມາຊິກຊາວໜຸ່ມສະພາແຫ່ງຊາດ ທີ່ຍາດຜົນງານມາໄດ້ໃນໄລຍະທີ່ຜ່ານມາ ແລະ ເພື່ອເຮັດສໍາເລັດໜ້າທີ່ທີ່ວາງອອກໃນ 5 ປີຕໍ່ໜ້ານັ້ນ ຕ້ອງຖືເອົາວຽກງານສຶກສາອົບຮົມການເມືອງ-ແນວຄິດ ໃຫ້ຊາວໜຸ່ມເຮົາເຂົ້າໃຈໄດ້ເຖິງຄຸນຄ່າຂອງສັນຕິພາບ, ເອກະລາດ ທີ່ການນໍາ ແລະ ນັກປະຕິວັດ ໄດ້ເສຍສະຫຼະເລືອດເນື້ອເພື່ອພວກເຮົາມີວັນນີ້; ທັງນີ້, ກໍເພື່ອເຮັດໃຫ້ສະມາຊິກຊາວໜຸ່ມມີທັດສະນະຫຼັກໝັ້ນການເມືອງໜັກແໜ້ນ, ມີຄຸນສົມບັດສິນທໍາປະຕິວັດ ແລະ ເຊື່ອໝັ້ນຕໍ່ການນໍາພາຂອງພັກ, ເອົາໃຈໃສ່ປັບປຸງກົງຈັກການຈັດຕັ້ງຂອງຊາວໜຸ່ມສະພາແຫ່ງຊາດໃຫ້ກະທັດຮັດ ແລະ ໃຫ້ສອດຄ່ອງກັບກົງຈັກຂອງສະພາແຫ່ງຊາດ ທີ່ກໍາລັງຄົ້ນຄວ້າເພື່ອປັບປຸງຕາມທິດຊີ້ນໍາຂອງພັກ, ເອົາໃຈໃສ່ປັບປຸງແບບແຜນວິທີເຮັດວຽກ, ລະບອບສ່ອງແສງລາຍງານໃຫ້ເປັນປົກກະຕິ, ຍົກສູງສະຕິຕໍ່ການຈັດຕັ້ງ ແລະ ເປັນແບບຢ່າງນໍາໜ້າໃນການປະຕິບັດວຽກງານຊາວໜຸ່ມ; ພ້ອມດຽວກັນນັ້ນ, ກໍຈະຕ້ອງໄດ້ເອົາໃຈໃສ່ປະຕິບັດທິດທາງແຜນການ ແລະ ແກ້ໄຂບັນດາຂໍ້ຄົງຄ້າງຕ່າງໆ.
(ຂ່າວ-ພາບ: ສຳນານ)
ຄໍາເຫັນ