 |
ສະຫາຍ ສອນທະນູ ທໍາມະວົງ ໄດ້ກ່າວເປີດກອງປະຊຸມຢ່າງເປັນທາງການວ່າ: ກອງປະຊຸມໃຫຍ່ຜູ້ແທນອົງຄະນະພັກແຂວງ ຄັ້ງທີ VIII ຊຶ່ງເປັນເຫດການ-ການເມືອງທີ່ສໍາຄັນອີກຄັ້ງໜຶ່ງ ໃນຂະບວນວິວັດການຈັດຕັ້ງປະຕິບັດແນວທາງ-ນະໂຍບາຍຂອງພັກ ໃນການປັບປຸງກໍ່ສ້າງພັກຕາມ 5 ຫຼັກການ 3 ທິດນໍາ ທີ່ພັກວາງອອກ ແລະ ສະແດງເຖິງການເຕີບໃຫຍ່ຂະຫຍາຍຕົວຂອງພັກ ຕະຫຼອດໄລຍະຂອງການຈັດຕັ້ງປະຕິບັດມະຕິກອງປະຊຸມໃຫຍ່ໃນໄລຍະຜ່ານມາ, ທັງເປັນການສືບຕໍ່ຈັດຕັ້ງປະຕິບັດຍຸດທະສາດທີ່ພັກວາງອອກໃຫ້ປະກົດຜົນເປັນຈິງ. ກອງປະຊຸມໃນຄັ້ງນີ້ ຈະໄດ້ພ້ອມກັນສັງເກດຕີລາຄາຄືນຜົນສຳເລັດການຈັດຕັ້ງປະຕິບັດແນວທາງຂອງພັກ, ມະຕິກອງປະຊຸມໃຫຍ່ ຄັ້ງທີ VII ຂອງອົງຄະນະພັກແຂວງ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ V ໃນໄລຍະ 5 ປີທີ່ຜ່ານມາ ໂດຍສະຫຼຸບສັງລວມ, ຖອດຖອນບົດຮຽນທີ່ສຳຄັນ ແລະ ຈະໄດ້ພ້ອມກັນຄົ້ນຄວ້າຕົກລົງເປັນເອກະພາບຮັບຮອງເອົາທິດທາງໜ້າທີ່, ວຽກງານຈຸດສຸມ ໃນສະເພາະໜ້າ (ປີ 2025-2030) ຊຶ່ງເປັນໄລຍະແຫ່ງການປະຕິບັດມະຕິກອງປະຊຸມໃຫຍ່ ຄັ້ງທີ XII ຂອງພັກ ແລະ ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ X (2026-2030) ໄປຕາມທິດ ສ້າງເສດຖະກິດເອກະລາດເປັນເຈົ້າຕົນເອງ, ສ້າງປະຖົມປັດໄຈນຳພາປະເທດເຮົາຫຼຸດພົ້ນອອກຈາກຄວາມດ້ອຍພັດທະນາ ໃນປີ 2026, ສ້າງພື້ນຖານໃຫ້ແກ່ການພັດທະນາແບບຍືນຍົງຕິດພັນກັບການປົກປັກຮັກສາສິ່ງແວດລ້ອມ, ສ້າງແຂວງໃຫ້ເປັນຫົວໜ່ວຍຍຸດທະສາດ, ສ້າງເມືອງໃຫ້ເປັນຫົວໜ່ວຍເຂັ້ມແຂງຮອບດ້ານ, ສ້າງຕັ້ງຕາແສງ ແລະ ບ້ານເປັນຫົວໜ່ວຍພັດທະນາ.
ໃນໂອກາດນີ້, ສະຫາຍ ສອນທະນູ ທໍາມະວົງ ຍັງໄດ້ຂຶ້ນຜ່ານບົດລາຍງານການເມືອງຂອງຄະນະບໍລິຫານງານພັກແຂວງສະໄໝທີ VII ວ່າ: ໃນໄລຍະ 5 ປີ ຜ່ານມາ ພາຍໃຕ້ການນໍາພາ-ຊີ້ນໍາ ຂອງກົມການເມືອງສູນກາງພັກ, ຄະນະບໍລິຫານງານສູນກາງ ພັກ, ຄະນະບໍລິຫານງານພັກແຂວງ ໄດ້ພ້ອມກັນຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ VII ຂອງອົງຄະນະພັກແຂວງ ໄດ້ເປັນເຈົ້າການ ແລະ ມີຜົນສໍາເລັດຫຼາຍດ້ານ; ລະບົບການເມືອງຍັງສືບຕໍ່ມີສະຖຽນລະພາບ, ສັງຄົມມີຄວາມເປັນລະບຽບຮຽບຮ້ອຍ, ເສດຖະກິດ-ວັດທະນະທໍາສັງຄົມ ໄດ້ຮັບການພັດທະນາ ແລະ ຂະຫຍາຍຕົວຢ່າງຕໍ່ເນື່ອງ; ເຮັດໃຫ້ການດໍາລົງຊີວິດຂອງພະນັກງານທະຫານຕໍາຫຼວດ ຕະຫຼອດຮອດປະຊາຊົນບັນດາເຜົ່າ ໄດ້ຮັບການຍົກລະດັບທາງດ້ານວັດຖຸ ແລະ ຈິດໃຈ ດີຂຶ້ນເປັນກ້າວໆ. ວຽກງານປ້ອງກັນຊາດ - ປ້ອງກັນຄວາມສະຫງົບ ໄດ້ເປັນເຈົ້າການຜັນຂະຫຍາຍ 4 ໜ້າທີ່ໃຫຍ່ 26 ແຜນງານ ແລະ 4 ແຜນງານ 41 ໂຄງການ ລົງສູ່ກົມກອງ ຮາກຖານ ໂດຍໄດ້ຖືເອົາການລົງກໍ່ສ້າງຮາກຖານການເມືອງຕາມມູນເຊື້ອຂອງກໍາລັງ ປກຊ - ປກສ ເພື່ອສຶກສາອົບຮົມການເມືອງ-ແນວຄິດ, ສ້າງ ແລະ ປັບປຸງກໍາລັງໃຫ້ມີຄວາມໜັກ ແໜ້ນ ຈົ່ຮັກພັກດີຕໍ່ປະຊາຊົນ ແລະ ລະບອບໃໝ່.
ການພັດທະນາເສດຖະກິດ ໄດ້ຖືເອົາການພັດທະນາເສດຖະກິດເປັນໃຈກາງ, ສ້າງການຫັນປ່ຽນທີ່ແຂງແຮງ, ເລິ່ກເຊິ່ງ ທີ່ກຳນົດອອກໃນມະຕິ VII ອົງຄະນະພັກແຂວງ ດ້ວຍການເສີມຂະຫຍາຍຄວາມເປັນເຈົ້າຂອງສັງຄົມ ສູ້ຊົນຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ V, ໂດຍໄດ້ຍົກລະດັບການແກ້ໄຂຄວາມຍຸ້ງຍາກທາງດ້ານເສດຖະກິດການເງິນເປັນວາລະແຫ່ງຊາດ ຊຶ່ງໄດ້ດໍາເນີນບັນດາມາດຕະການຕ່າງໆ ທີ່ມີຈຸດສຸມດ້ວຍການປັບປຸງລະບອບ-ລະບຽບການ, ກົນໄກຄຸ້ມຄອງເສດຖະກິດຕາມທິດເອື້ອອໍານວຍ ແລະ ສົ່ງເສີມການຜະລິດທຸລະກິດ; ໄດ້ປັບປຸງກົນໄກການຈັດເກັບ ແລະ ຂຸດຂົ້ນແຫຼ່ງລາຍຮັບໃໝ່ດ້ວຍເຄື່ອງມືທັນສະໄໝຈໍານວນໜຶ່ງ, ເພີ່ມຄວາມເຂັ່ມງວດ, ອັດການຮົ່ວໄຫຼ ເຮັດໃຫ້ການຈັດເກັບລາຍຮັບເຂົ້າງົບປະມານມີທ່າອ່ຽງເພີ່ມຂຶ້ນ, ເພີ່ມທະວີການຄຸ້ມຄອງລາຍຈ່າຍຕາມນະໂຍບາຍປະຢັດແຫ່ງຊາດ; ຊຸກຍູ້ແຮງການຜະລິດເປັນສິນຄ້າ-ຕິດພັນກັບອຸດສາຫະກໍາປຸງແຕ່ງ ນໍາໃຊ້ທຸລະກິດຫຼາຍພາກສ່ວນເຂົ້າມີສ່ວນຮ່ວມໃນການພັດທະນາແກ້ໄຂຄວາມທຸກຍາກ; ໄດ້ປັບປຸງຂັ້ນຂອດການບໍລິການລົງທຶນຢູ່ພາຍໃນແຂວງ ໂດຍຜ່ານການລົງທຶນປະຕູດຽວ ເພື່ອອຳນວຍຄວາມສະດວກໃຫ້ແກ່ນັກລົງທຶນໄວຂຶ້ນ, ມີມາດຕະການລະອຽດ ເພື່ອແກ້ໄຂຂໍ້ຫຍຸ້ງຍາກດ້ານເສດຖະກິດ-ການເງິນ ແລະ ໜີ້ສິນສາທາລະນະຫຼຸດລົງ; ນຳໃຊ້ທ່າແຮງທີ່ມີຍາດແຍ່ງເອົາການຊ່ວຍເຫຼືອດຶງດູດການລົງທຶນພາກເອກະຊົນພາຍໃນ ແລະ ຕ່າງປະເທດສົ່ງເສີມການທ່ອງທ່ຽວສົ່ງເສີມການຜະລິດ-ການບໍລິການໃຫ້ເຊື່ອມຈອດພາຍໃນ ແລະ ຕ່າງປະເທດ; ນຳໃຊ້ວິທະຍາສາດ-ເຕັກນິກທີ່ກ້າວໜ້າເຂົ້າໃນການຜະລິດກໍ່ສ້າງພື້ນຖານໂຄງລ່າງ ເພື່ອຮອງຮັບແກ່ການພັດທະນາ; ເຮັດໃຫ້ວິໄສທັດຂອງແຂວງປະກົດຜົນເປັນຈິງ “ສ້າງແຂວງ ໃຫ້ເປັນປະຕູເສດຖະກິດ, ແຫຼ່ງຜະລິດພະລັງງານ, ບໍລິການທາງຜ່ານ ແລະ ຄຸ້ມຄອງສິ່ງແວດລ້ອມໃຫ້ມີຄວາມຍືນຍົງ ” ເສດຖະກິດຂະຫຍາຍຕົວຢ່າງຕໍ່ເນື່ອງ-ໝັ້ນທ່ຽງ ຢູ່ໃນລະດັບ 5.1% ທຽບໃສ່ແຜນການແມ່ນລື່ນຄາດໝາຍ 0.1%, ລວມຍອດຜະລິດຕະພັນພາຍໃນ (GDP) ບັນບລຸ 15,249 ຕື້ກີບ, ລາຍຮັບສະເລ່ຍ 44 ລ້ານກ່ວາກີບ ຫຼື 1,923 ໂດລາ/ຄົນ/ປີ, ໂຄງປະກອບເສດຖະກິດກະສິກຳ ກວມ 35%, ອຸດສາຫະກຳ-ກໍໍ່ສ້າງ ກວມ 44% ແລະ ບໍລິການ ກວມ 21% ການແກ້ໄຂຄວາມທຸກຍາກຂອງປະຊາຊົນບັນດາເຜົ່າ ໄດ້ໂດຍພື້ນຖານ.
 |
ໃນທົ່ວແຂວງ ມີເມືອງພົ້ນທຸກ 5 ເມືອງ, ຍັງບໍ່ພົ້ນທຸກ 2 ເມືອງ, ເມືອງເຂັ້ມແຂງຮອບດ້ານ 1 ເມືອງ, ບ້ານພົ້ນທຸກ ກວມ 93.66%, ຄອບຄົວພົ້ນທຸກ ກວມເອົາ 97.31%, ຄອບຄົວທຸກຍາກ-ອະນາຖາ ກວມ 2.69%, ບ້ານພັດທະນາ ກວມ 80.63%,ຄອບຄົວພັດທະນາ ກວມ 91.04%, ຄອບຄົວຍັງບໍ່ທັນບັນລຸພັດທະນາ 8.96% ແລະ ວຽກງານ 3 ສ້າງ ຄື: ບ້ານໃຫຍ່ທີ່ເປັນຕົວເມືອງນ້ອຍໃນຊົນນະບົດ 4 ບ້ານ; ສ້າງແຂວງເປັນຫົວໜ່ວຍຍຸດທະສາດ ບັນລຸໄດ້ 7 ດ້ານ ສະເລ່ຍໃນ 60 ຕົວຊີ້ບອກ ບັນລຸໄດ້ 90.90%; ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ຕາມ 5 ດ້ານ, 47 ຕົວຊີ້ບອກ; ໃນນີ້: ເມືອງບັນລຸ 4 ດ້ານ ສຳເລັດ 5 ເມືອງ, ບັນລຸ 3 ດ້ານ ມີ 1 ເມືອງ, ບັນລຸ 2 ດ້ານ 1 ເມືອງ ແລະ ສ້າງບ້ານເປັນຫົວໜ່ວຍພັດທະນາ 4 ດ້ານ, 30 ຕົວຊີ້ບອກ ບັນລຸ 82.39%, ໄດ້ປັບປຸງຈາກ 8 ຕໍາແໜ່ງງານມາເປັນ 5 ໜ່ວຍງານສໍາເລັດ 100% ສ້າງບ້ານພັດທະນາ 4 ດ້ານໄດ້ 234 ບ້ານ ກວມເອົາ 82.39% ຂອງຈໍານວນບ້ານທັງໝົົດ.
ສຳລັບທິດທາງລວມ ແລະ ຄາດໝາຍສູ້ຊົນ ວຽກງານຈຸດສຸມ 5 ປີຕໍ່ໜ້າ (2026-2030) ແມ່ນສືບຕໍ່ຮັບປະກັນໃຫ້ແຂວງມີສະຖຽນລະພາບທາງດ້ານການເມືອງ ແລະ ມີຄວາມສະຫງົບປອດໄພທາງດ້ານສັງຄົມຢ່າງໜັກແໜ້ນ, ປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບໃນໄລຍະໃໝ່ເປັນຂອງທົ່ວປວງຊົນຮອບດ້ານໃຫ້ເລິກເຊິ່ງເຖິງຖອງ, ຕັ້ງໜ້າກໍ່ສ້າງກໍາລັງປະກອບອາວຸດໃຫ້ໜັກແໜ້ນ, ເຂັ້ມແຂງ ແລະ ມີແບບແຜນທັນສະ
ໄໝ. ເສດຖະກິດເປັນໃຈກາງ ແລະ ຂະຫຍາຍຕົວຢ່າງຕໍ່ເນື່ອງ, ໝັ້ນທ່ຽງ, ມີຄຸນນະພາບ ແລະ ເຕີບໂຕໄປຕາມທິດສົມດຸນ, ດຸ່ນດ່ຽງການພັດທະນາ ແລະ ການສະໜອງທຶນໃຫ້ສອດຄ່ອງກັບເງື່ອນໄຂໃໝ່ຕາມທິດຫັນເປັນອຸດສາຫະກໍາ ແລະ ທັນສະໄໝ, ຖືເອົາການຜະລິດກະສິກຳເປັນພື້ນຖານ ໃຫ້ແກ່ການຂະຫຍາຍຕົວຂອງອຸດສາຫະກຳປຸງແຕ່ງ; ເປັນເຈົ້າຕົນເອງແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນໃຫ້ເປັນຮູບປະທໍາ ເພື່ອເຮັດໃຫ້ແຂວງກຸ້ມຕົນເອງດ້ານງົບປະມານ.
ນອກຈາກນີ້, ບັນດາຜູ້ແທນກອງປະຊຸມຍັງໄດ້ພ້ອມກັນປະກອບຄຳຄິດ-ຄຳເຫັນຢ່າງເລິກເຊິ່ງ, ສ້າງຄວາມເປັນເອກະພາບສູງຕໍ່ເນື້ອໃນຂອງກອງປະຊຸມ ແລະ ເຮັດໃຫ້ກອງປະຊຸມໃຫຍ່ຄັ້ງນີ້ບັນລຸຜົນສຳເລັດຢ່າງຈົບງາມ. ໃນກອງປະຊຸມໃຫຍ່ຄັ້ງນີ້ ບັນດາສະຫາຍຜູ້ແທນສົມບູນພວກເຮົາຍັງຈະໄດ້ດຳເນີນການປ່ອນບັດຄັດເລືອກຕັ້ງເອົາຄະນະບໍລິຫານງານພັກແຂວງບໍລິຄໍາໄຊຊຸດໃໝ່ ເພື່ອສືບຕໍ່ນຳພາປະຊາຊົນບັນດາເຜົ່າ ປະຕິບັດແນວທາງການ ເມືອງຂອງພັກໃຫ້ປະກົດຜົນເປັນຈິງ ແລະ ປ່ອນບັດຄັດເລືອກເອົາຜູ້ແທນສົມບູນ, ສຳຮອງໄປຮ່ວມກອງປະຊຸມໃຫຍ່ ຄັ້ງທີ XII ຂອງພັກ.
(ຂ່າວ-ພາບ: ບຸນຕອມ).
ຄໍາເຫັນ