ກໍາມະກາສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຄຳມ່ວນ, ມີແຂກຖືກເຊີນ ແລະ ຜູ້ແທນສົມບູນເຂົ້າຮ່ວມ 166 ສະຫາຍ ຍິງ 14 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກໃນທົ່ວເມືອງຈໍານວນ 1,859 ສະຫາຍ ຍິງ 540 ສະຫາຍ.
ສະຫາຍ ທອງໄຊ ມັງໜໍເມກ ກຳມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງເຊບັ້ງໄຟ ໄດ້ກ່າວໄຂກອງປະຊຸມຢ່າງເປັນທາງການ ພ້ອມນັ້ນຍັງໄດ້ຜ່ານບົດລາຍງານການເມືອງທັງ 2 ພາກ, ຊຶ່ງສະຫາຍ ໄດ້ຕີລາຄາໜາກຜົນສໍາເລັດ ແລະ ຜົນງານອັນພົ້ນເດັ່ນໃນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VI ໃນໄລຍະ 5 ປີ ຜ່ານມາ. ໃນທ່າມກາງບັນຍາກາດ ສະພາບແວດລ້ອມພາຍໃນແຂວງເວົ້າລວມ, ເວົ້າສະເພາະພາຍໃນເມືອງເຊບັ້ງໄຟໄດ້ມີທັງສິ່ງເອື້ອອໍານວຍຄວາມສະດວກ, ຄວາມຫຍຸ້ງຍາກ, ສິ່ງທ້າທາຍຫຼາຍດ້ານເປັນຕົ້ນທາງດ້ານເສດຖະກິດ, ອັດຕາແລກປ່ຽນເງີນຕາມີການເໜັງຕີງ, ເງີນກີບອ່ອນຄ່າ, ລາຄາສີ້ນຄ້າ, ຄ່າຄອງຊີບສູງຂຶ້ນ, ການລະບາດຂອງພະຍາດໂຄວິດ 19 ແລະ ການປ່ຽນແປງດິນຟ້າອາກາດຊຶ່ງທັງໝົດນັ້ນ ໄດ້ສົ່ງຜົນກະທົບໂດຍກົງ ຕໍ່ການປະຕິບັດມະຕິ, ແຜນການ ແລະ ບັນດາຄາດໝາຍທີ່ໄດ້ຮັບຮອງໄວ້ ໃນມະຕິກອງປະຊຸມສະໄໝທີ່ຜ່ານມາບວກກັບອິດທິກຳລັງປໍລະປັກ ຍັງບໍ່ລົດລະສຸມກຳລັງເພື່ອຫວັງມ້າງເພທຳລາຍລະບອບໃໝ່ຂອງພວກເຮົາ. ແຕ່ພາຍໃຕ້ການນໍາພາ-ຊີ້ນໍາຂອງອົງຄະນະພັກເມືອງ, ທົ່ວພັກ, ທົ່ວກຳລັງປະກອບອາວຸດ ແລະ ທົ່ວປວງຊົນຊາວເມືອງເຊບັ້ງໄຟ ໄດ້ເສີມຂະຫຍາຍຈິດໃຈເປັນເຈົ້າຕົນເອງ, ເພິ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ, ຮັດແໜ້ນຄວາມສາມັກຄີ ແລະ ການປະກອບສ່ວນທຸກພາກສ່ວນ ເຮັດໃຫ້ສາມາດຍາດໄດ້ຜົນສຳເລັດໃນຫຼາຍດ້ານ ເຊັ່ນ: ລະບົບການເມືອງຢູ່ຂັ້ນຮາກຖານມີຄວາມເຂັ້ມແຂງ, ໜັກແໜ້ນ; ສັງຄົມມີຄວາມສະຫງົບປອດໄພໂດຍພື້ນຖານ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ, ດ້ານວັດທະນະທຳ-ສັງຄົມ ກໍໄດ້ຮັບການປັບປຸງຢ່າງຕັ້ງໜ້າ, ປະຊາຊົນມີຊີວິດການເປັນຢູ່ທີ່ດີຂຶ້ນເປັນກ້າວໆ.
ກອງປະຊຸມຄັ້ງນີ້, ສະຫາຍຜູ້ແທນທີ່ເຂົ້າຮ່ວມ ຈະໄດ້ຮັບຟັງ ແລະ ປະກອບຄໍາຄິດ-ຄໍາເຫັນໃສ່ຮ່າງລາຍງານການເມືອງຄັ້ງທີ VII, ແຜນພັດທະນາເສດຖະກິດ-ສັງຄົມ 5 ປີ 2025-2029 ໂດຍສະເພາະຈາກຕາງໜ້າຂົງເຂດ ປກຊ-ປກສ, ຂົງເຂດແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ, ຄອບຄົວຕົວແບບດ້ານກະສິກໍາ, ຂົງເຂດວັດທະນະທໍາ-ສັງຄົມ, ຂົງເຂດເສດຖະກິດ ແລະ ຜ່ານຮ່າງບົດສໍາຫຼວດການນໍາພາ-ຊີ້ນຳລວມ ຂອງອົງຄະນະພັກເມືອງ ຊຸດທີ VII. ທີ່ສໍາຄັນແມ່ນຈະໄດ້ດໍາເນີນການປ່ອນບັດເລືອກເອົາ ຄະນະບໍລິຫານງານພັກເມືອງຊຸດໃໝ່. ພ້ອມທັງເລືອກເອົາຜູ້ແທນສົມບູນ, ສໍາຮອງ ໄປຮ່ວມກອງປະຊຸມໃຫຍ່ ຄັ້ງທີ XI ຂອງອົງຄະນະພັກແຂວງຄຳມ່ວນ ແລະ ຮັບຟັງການໂອ້ລົມຈາກຄະນະພັກຂັ້ນເທິງ. ກອງປະຊຸມດັ່ງກ່າວຈະໄດ້ດຳເນີນໄປເປັນເວລາ 2 ວັນ ຈິ່ງຈະສໍາເລັດ.
(ແຫຼ່ງຂ່າວ: ແຂວງຄໍາມ່ວນ)
ຄໍາເຫັນ