ກອງປະຊຸມພົບປະບໍ່ເປັນທາງການ ລະຫວ່າງ ລັດຖະມົນຕີຕ່າງປະເທດອາຊຽນ ແລະ ລັດຖະມົນຕີຕ່າງປະເທດ ຄົນໃໝ່ຂອງ ມຽນມາ ແລະ ກອງປະຊຸມປຶກສາຫາລືບໍ່ເປັນທາງການ ແບບເປີດກວ້າງ ກ່ຽວກັບບັນຫາ ມຽນມາ

ກອງປະຊຸມພົບປະບໍ່ເປັນທາງການ ລະຫວ່າງ ລັດຖະມົນຕີຕ່າງປະເທດອາຊຽນ ແລະ ລັດຖະມົນຕີຕ່າງປະເທດຄົນໃໝ່ຂອງ ມຽນມາ ໄດ້ຈັດຂຶ້ນແບບເຊິ່ງໜ້າເປັນຄັ້ງທຳອິດ ນັບຕັ້ງແຕ່ມີການຮັບຮອງເອົາ 5 ຂໍ້ຕົກລົງຂອງຜູ້ນຳອາຊຽນໃນປີ 2021. ການພົບປະດັ່ງກ່າວ ແມ່ນໜຶ່ງໃນການຈັດຕັ້ງປະຕິບັດ 5 ຂໍ້ຕົກລົງຂອງຜູ້ນຳອາຊຽນ ເພື່ອເປັນການປຶກສາຫາລືຊ່ວຍ ມຽນມາ ໃນການຫາວິທີແກ້ໄຂບັນຫາພາຍໃນຂອງຕົນ ແລະ ກໍເປັນການຮັບຟັງການລາຍງານສະພາບການໃນມຽນມາ ພາຍຫຼັງທີ່ສະພາບການໃນມຽນມາ ໄດ້ມີການພັດທະ ນາໄປໃນທາງບວກ, ໂດຍສະເພາະຫຼັງຜົນສໍາເລັດການເລືອກຕັ້ງທົ່ວໄປ ແລະ ໄດ້ມີການປະກອບຄະນະລັດຖະບານໃໝ່.

ໃນວັນດຽວກັນ, ທ່ານ ຮອງນາຍົກລັດຖະມົນຕີ ທອງສະຫວັນ ພົມວິຫານ ກໍໄດ້ສືບຕໍ່ນໍາພາຄະນະ ເຂົ້າຮ່ວມກອງປະຊຸມປຶກສາຫາລືບໍ່ເປັນທາງການ ແບບເປີດກວ້າງ ກ່ຽວກັບບັນຫາ ມຽນມາ. ກອງປະຊຸມໄດ້ປຶກສາຫາລື ກ່ຽວກັບ ຜົນຂອງການລາຍງານສະພາບການໃນ ມຽນມາ ໂດຍລັດຖະມົນຕີກະຊວງການຕ່າງປະເທດ ຄົນໃໝ່ຂອງ ມຽນມາ ແລະ ແນວທາງໃນຕໍ່ໜ້າສຳລັບການຊ່ວຍເຫຼືອ ມຽນມາ ເພື່ອຊອກຫາວິທີທາງແກ້ໄຂບັນຫາໃນ ມຽນມາ ແບບສັນຕິວິທີ ແລະ ຍືນຍົງ ໂດຍອີງໃສ່ຫຼັກການ ມຽນມາ-ນໍາພາ, ມຽນມາ-ເປັນເຈົ້າການ, ໂດຍຜ່ານການຈັດຕັ້ງປະຕິບັດ 5 ຂໍ້ຕົກລົງຂອງຜູ້ນໍາອາຊຽນ. (ຂ່າວ: ກຕທ)