ກອງປະຊຸມພົບປະສອງຝ່າຍ ສປປ ລາວ ແລະ ສປ ຈີນ

ການພົບປະສອງຝ່າຍດັ່ງກ່າວ ໂດຍມີຈຸດປະສົງ ເພື່ອປຶກສາຫາລືເປີດຕະຫຼາດການນຳເຂົ້າສິນຄ້າກະສິກຳ ຂອງ ສປປ ລາວ ໄປ ສປ ຈີນ ພາຍໃຕ້ສັນຍາດ້ານສຸຂານາໄມ ແລະ ສຸຂານາໄມພືດ (SPS), ຊຶ່ງປັດຈຸບັນ ສປປ ລາວ ໄດ້ສຳເລັດການເຈລະຈາ ເພື່ອເປີດຕະຫຼາດການນຳເຂົ້າສິນຄ້າກະສິກຳ ຈາກ ສປປ ລາວ ໄປ ສປ ຈີນ ໂດຍການເຊັນສັນຍາ SPS ສໍາເລັດແລ້ວຈໍານວນ 39 ລາຍການ (ພືດ 35 ລາຍການ ແລະ ສັດ ແລະ ຜະລິດຕະພັນສັດ 4 ລາຍການ) ແລະ ກຳລັງສືບຕໍ່ເຈລະຈາ ເພື່ອສະເໜີໃຫ້ຝ່າຍ ຈີນ ສືບຕໍ່ພິຈາລະນາຕື່ມອີກຈຳນວນຫຼາຍລາຍການ ໃນນັ້ນ ອັນພົ້ນເດັ່ນ ແມ່ນໄດ້ປຶກສາຫາລື ກ່ຽວກັບ ການເຊັນສັນຍາເປີດຕະຫຼາດ ສົ່ງອອກ ຜະລິດພັນຊີ້ນງົວ ໃນຮູບແບບ ຊີ້ນແຊ່ງແຂງ ແລະ ຊີ້ນສຸກ ໄປ ສປ ຈີນ. ຊຶ່ງຝ່າຍ ຈີນ ເຫັນດີ ຮັບໄປພິຈາລະນາຕາມການສະເໜີ ຂອງ ສປປ ລາວ ແລະ ຄາດວ່າຈະສາມາດ ເຊັນສັນຍາເປີດຕະຫຼາດສິນຄ້າກະສິກຳຕື່ມອີກໃນໄລຍະໄວໆນີ້.

ການພົບປະໃນຄັ້ງນີ້ ທັງສອງຝ່າຍໄດ້ສຳເລັດການເຈລະຈາ ແລະ ໄດ້ລົງນາມເຊັນສັນຍາຮ່ວມກັນ ເພື່ອເປີດຕະຫຼາດການສົ່ງອອກ ໝາກຖົ່ວລຽນ ຂອງ ສປປ ລາວ ນຳເຂົ້າໄປ ສປ ຈີນ ພາຍໃຕ້ເງື່ອນໄຂທາງດ້ານ ສຸຂານາໄມ ແລະ ສຸຂານາໄມພືດ ເປັນລາຍການທີ 40. ສະນັ້ນ, ຕໍ່ຈາກນີ້ການສົ່ງອອກຖົ່ວລຽນ ຂອງ ສປປ ລາວ ໄປ ສປ ຈີນ ແມ່ນສາມາດດຳເນີນການໄດ້ ແຕ່ການຈັດຕັ້ງປະຕິບັດຕົວຈິງ ຜູ້ປະກອບຕ້ອງໄດ້ປະຕິບັດຕາມລະບຽບ ແລະ ຂັ້ນຕອນທີ່ລະບຸໄວ້ໃນສັນຍາດັງກ່າວ ຢ່າງເຂັ້ມງວດ.

ຂ່າວ:ກະຊວງກະສິກຳແລະສິ່ງແວດລ້ອມ