 |
ກອງປະຊຸມຄັ້ງນີ້ ຈັດຂຶ້ນເພື່ອປຶກສາຫາລື ແລະ ກວດກາຄືນຮ່າງເນື້ອໃນເອກະສານ ຈຳນວນ 2 ສະບັບຄື: 1. ຮ່າງຂອບການຮ່ວມມືເພື່ອການພັດທະນາແບບຍືນຍົງ ລະຫວ່າງ ລັດຖະບານ ແຫ່ງ ສປປ ລາວ ແລະ ອົງການ ສປຊ (Lao PDR-UNSDCF) ສະບັບໃໝ່ ໄລຍະປີ 2027-2031, ແລະ 2. ຮ່າງກໍານົດໜ້າວຽກ (Term of References– ToR) ສະບັບໃໝ່ພາຍໃຕ້ຂອບການຮ່ວມມືດັ່ງກ່າວ.
ກອງປະຊຸມໄດ້ຮ່ວມກັນປຶກສາຫາລື ແລະ ປະກອບຄໍາເຫັນຢ່າງກົງໄປກົງມາ ແລະ ມີເນື້ອໃນ ຕໍ່ຮ່າງຂອບການຮ່ວມມື ສະບັບໃໝ່ ໄລຍະປີ 2027-2031 ເພື່ອກຳນົດບຸລິມະສິດຂອງລັດຖະບານຮ່ວມກັນ ໂດຍສະເພາະເພື່ອຮັບປະກັນຄວາມສອດຄ່ອງກັບ ແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ 10 (2026-2030) ພ້ອມທັງ ເປົ້າໝາຍການພັດທະນາແບບຍືນຍົງແລະ ການກະກຽມອອກຈາກສະຖານະພາບດ້ອຍພັດທະນາຂອງ ສປປ ລາວ. ນອກນີ້, ຍັງໄດ້ພ້ອມກັນ ປະກອບຄໍາເຫັນໃສ່ ຮ່າງຂໍ້ກຳນົດໜ້າວຽກສະບັບໃໝ່ (ToR) ໂດຍສະເໜີເພີ່ມບາງກະຊວງ ຫຼື ຂະແໜງການເຂົ້າຕື່ມ, ລວມທັງກົນໄກການປະສານງານຂອງຄະນະກຳມະການດັ່ງກ່າວ.
ໃນໂອກາດດັ່ງກ່າວ, ທ່ານຮອງລັດຖະມົນຕີກະຊວງການຕ່າງປະເທດ, ປະທານຮ່ວມກອງປະຊຸມໄດ້ຢໍ້າຄືນເຖິງຄວາມໝາຍຄວາມສຳຄັນຂອງກອງປະຊຸມຂອງຄະນະກໍາມະການຊີ້ນໍາຮ່ວມ JSC, ໂດຍສະເພາະໃນກອງປະຊຸມສະເພາະກິດຄັ້ງນີ້ ຈັດຂຶ້ນເພື່ອພິຈາລະນາຮ່າງເນື້ອໃນເອກະສານສຳຄັນ ທັງ 2 ສະບັບ ໃຫ້ມີຄວາມສອດຄ່ອງກັບບຸລິມະສິດຕົວຈິງດ້ານການພັດທະນາໃນປັດຈຸບັນຂອງ ລັດຖະບານ, ກ່ອນຈະສືບຕໍ່ປັບປຸງ ແລະ ກ້າວໄປສູ່ການລົງນາມຂອບການຮ່ວມມື Lao PDR – UNSDCF 2027-2031 ສະບັບໃໝ່ ຢ່າງເປັນທາງການໃນເດືອນສິງຫາ 2026.
 |
ທ່ານ Bakhodir Burkhanov ຜູ້ປະສານງານອົງການ ສປຊ ປະຈຳ ສປປ ລາວ ໄດ້ຢໍ້າຄືນວ່າຄະນະກໍາມະການຊີ້ນໍາຮ່ວມ JSC ມີບົດບາດສໍາຄັນໃນການຮ່າງເອກະສານຂອບວຽກການຮ່ວມມື Lao PDR-UNSDCF 2027-2031 ສະບັບໃໝ່ຮ່ວມກັນ ຊຶ່ງພາຍຫຼັງການຮັບຮອງໃນເດືອນສິງຫາທີ່ຈະມາເຖິງ ນີ້, ເອກະສານດັ່ງກ່າວ ຈະເປັນບ່ອນອີງອັນສຳຄັນ ໃນການເຮັດວຽກ, ຂົນຂວາຍການສະໜັບສະໜູນທັງດ້ານທຶນຮອນ ແລະ ເຕັກນິກ ທັງໃນລະບົບ ສປຊ ແລະ ຈາກຄູ່ຮ່ວມພັດທະນາອື່ນໆ ເພື່ອມາຈັດຕັ້ງປະຕິບັດວຽກ ຂອງອົງການເຄືອຂ່າຍ ສປຊ ປະຈຳ ສປປ ລາວໃຫ້ສາມາດບັນລຸໄດ້ຕາມແຜນການ ແລະ ຄາດໝາຍທີ່ວາງໄວ້ ແຕ່ປີ 2027 ຫາ 2031.
ຂອບການຮ່ວມມື Lao PDR-UNSDCF 2027-2031 ສະບັບໃໝ່ ແມ່ນເອກະສານຍຸດທະສາດລວມຂອງອົງການເຄືອຂ່າຍ ສປຊ ຢູ່ ສປປ ລາວ ທີ່ກໍານົດວິໄສທັດຮ່ວມ, ວຽກງານຍຸດທະສາດ ແລະ ຜົນໄດ້ຮັບ, ລວມທັງທິດທາງລວມຂອງບັນດາອົງການເຄືອຂ່າຍ ສປຊ ໃນການຈັດຕັ້ງຜັນຂະຫຍາຍບັນດາແຜນຍຸດທະສາດ ໃນໄລະຍະ 5 ປີ ໂດຍສອດຄ່ອງກັບບັນດາເປົ້າໝາຍຂອງແຜນພັດທະນາເສດຖະກິດ-ສັງຄົມ ແຫ່ງຊາດ ແລະ ການພັດທະນາແບບຍືນຍົງ. ຮ່າງຂອບການຮ່ວມມື ສະບັບໃໝ່ດັ່ງກ່າວ ໄດ້ກໍານົດເອົາ 3 ເປົ້າໝາຍຫຼັກ ແລະ 10 ແຜນວຽກຈຸດສຸມ ຊຶ່ງສອດຄ່ອງກັບເປົ້າໝາຍການພັດທະນາແຫ່ງຊາດ ແລະ ວິໄສທັດໃນໄລຍະຍາວຂອງ ສປປ ລາວ.
(ຂ່າວ: ຄຕພ)
ຄໍາເຫັນ