 |
ໃນໂອກາດນີ້, ທ່ານ ນາງ ດາລານີ ພົມມະວົງສາ ໄດ້ມີຄຳເຫັນໃນພິທີເປີດ ຂອງກອງປະຊຸມດັ່ງກ່າວ ຊຶ່ງທ່ານໄດ້ສະແດງຄວາມຍ້ອງຍໍຊົມເຊີຍ ສປ ຈີນ ກໍຄືອໍານາດການປົກຄອງຕົນເອງຂອງເຂດຈ້ວງກວາງຊີ ທີ່ໃຫ້ຄວາມສໍາຄັນໃນການຈັດກອງປະຊຸມລັກສະນະນີ້ຢ່າງຕໍ່ເນື່ອງ ຖືເປັນເວທີໜຶ່ງໃນການຈັດຕັ້ງຜັນຂະຫຍາຍຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ ຂອງ ສປ ຈີນ ລວມທັງແຜນງານວ່າດ້ວຍການຮ່ວມມືດ້ານວັດທະນະທຳ ແລະ ສິລະປະ ອາຊຽນ-ຈີນຢ່າງເປັນຮູບປະທໍາ ໂດຍສະເພາະຢ່າງຍິ່ງ ແມ່ນການອະນຸລັກ, ປົກປັກຮັກສາ ແລະ ເສີມຂະຫຍາຍຄຸນຄ່າທາງດ້ານມໍຣະດົກວັດທະນະທຳ ທີ່ເປັນເອກະລັກ ຂອງອາຊຽນ ແລະ ສປ ຈີນ ແນໃສ່ສົ່ງເສີມຄວາມເຂົ້າໃຈ ແລະ ເຄົາລົບ ເຊິ່ງກັນແລະກັນ ບົນພື້ນຖານຄວາມຫຼາກທາງດ້ານວັດທະນະທຳລວມທັງການຊຸກຍູ້ສົ່ງເສີມການທ່ອງທ່ຽວໃຫ້ມີໄປມາຫາ
ສູ່ລະຫວ່າງຄົນກັບຄົນໃຫ້ນັບມື້ນັບມີຄວາມສະດວກສະບາຍ. ກອງປະຊຸມຄັ້ງນີ້ ຍັງເປັນນິມິດໝາຍທີ່ສໍາຄັນ ໃນການປະກອບສ່ວນສະເຫຼີມສະຫຼອງຄົບຮອບ 35 ປີ ວັນສ້າງສາຍພົວພັນຄູ່ຮ່ວມເຈລະຈາອາຊຽນ-ຈີນ ແລະ 65 ປີ ວັນສ້າງຕັ້ງສາຍພົວພັນການທູດສອງຝ່າຍ ລາວ-ຈີນ.
ທ່ານຮອງລັດຖະມົນຕີ ໄດ້ແລກປ່ຽນໃນກອງປະຊຸມຕື່ມກ່ຽວກັບນະໂຍບາຍ ຂອງລັດຖະບານລາວ ໂດຍຍົກໃຫ້ເຖິງການຈັດຕັ້ງປະຕິບັດວຽກງານສ້າງບ້ານ ແລະ ຄອບຄົວວັດທະນະທຳພາຍໃນ ສປປ ລາວ ດ້ວຍຄວາມເອົາໃຈໃສ່ ຊຶ່ງຖືເປັນວຽກງານສໍາຄັນໜຶ່ງ ທີ່ສ້າງຄວາມເຂັ້ມແຂງໃຫ້ແກ່ຂັັ້ນທ້ອງຖິ່ນ ສາມາດໃຫ້ພວກເຂົາໄດ້ຮັບຮູ້ເຂົ້າໃຈເຖິງຄວາມ
ໝາຍຄວາມສໍາຄັນໃນການເຕົ້າໂຮມຄວາມສາມັກຄີກປອງດອງ ຜ່ານຂະບວນການປົກປັກຮັກສາ ແລະ ເສີມຂະຫຍາຍຄຸນຄ່າວັດທະນະທຳອັນດີງາມ ຂອງປະຊາຊົນບັນດາເຜົ່າຮ່ວມກັນໃຫ້ມີຄວາມຍືນຍົງ. ນອກນີ້, ທ່ານຮອງລັດຖະມົນຕີ ຍັງໄດ້ແຈ້ງຕໍ່ກອງປະຊຸມກ່ຽວກັບສະຖານທີ່ບູຮານສະຖານທີ່ລືຊື່ ຂອງລາວ ເຊັ່ນ: ເມືອງຫຼວງພະບາງ, ວັດພູຈໍາປາສັກ, ທົ່ງໄຫຫີນ ແລະ ພູຫີນໜາມໜໍ່ ທີ່ໄດ້ຮັບຮອງເປັນມໍຣະດົກໂລກ ກໍຄືມໍຣະດົກໂລກແບບນາມະທໍາຈໍານວນໜຶ່ງ ລວມທັງລາບ ທີ່ຢູ່ໃນຂັ້ນຕອນກະກຽມພິຈາລະນາຈາກອຸຍແນສ໌ໂກເຂົ້າເປັນມໍຣະດົກໂລກນາມະທໍາອີກລາຍການໜຶ່ງໃນທ້າຍປີນີ້.
ກອງປະຊຸມຄັ້ງນີ້ ປະກອບດ້ວຍຫຼາຍກອງປະຊຸມຍ່ອຍ ແລະ ກິດຈະກໍາປິ່ນອ້ອມ ໂດຍໄດ້ແຍກເປັນຫຼາຍຫົວຂໍ້ສົນທະນາ ແລະ ແລກປ່ຽນໃນເວລາດຽວກັນ ແບບຄູ່ຂະໜານລະຫວ່າງພາກລັດ, ອໍານາດການປົກຄອງທ້ອງຖິ່ນ, ອົງການຈັດຕັ້ງສາກົນ, ສະຖານບັນຄົ້ນຄວ້າ, ພາກເອກະຊົນ, ຊ່ຽວຊານວິຊາສະເພາະ ແລະ ອື່ນໆ ເປັນຕົ້ນ ພິທີສະເຫຼີມສະຫຼອງຄົບຮອບ 10 ປີ ອຸທະຍານແຫ່ງຊາດ ຮົວຊານ ຂອງເມືອງຈົງຈົວະ ທີ່ໄດ້ຮັບຮອງເປັນມໍຣະດົກໂລກທາງດ້ານບູຮານສະຖານ, ເວທີສົນທະນາວິທະຍາສາດກ່ຽວກັບ ການປົກປ້ອງ ແລະ ສືບທອດມູນມໍລະດົກ ວັດທະນະທໍາໂລກ ໃນຍຸກປັນຍາປະດິດ (AI) ແລະ ການສຶກສາສໍາຫຼວດການຮ່ວມມືຮ່ວມຊາຍແດນ ໃນການສົ່ງເສີມ ມໍລະດົກວັດທະນະທຳໂລກ.(ຂ່າວ-ພາບ: ກົມແຜນການ ແລະ ການຮ່ວມມືສາກົນ)
ຄໍາເຫັນ