ເມືອງມະນີລັດຖະມົນຕີ ກະຊວງຍທຂ,ທ່ານ ບັກໂຮເດັຍ ເບີຄະນ໋ອບ ຜູ້ປະສານງານອົງການ ສປຊ ປະຈໍາ ລາວ, ທ່ານ ອາວີ ຊາກາ ຫົວໜ້າທີ່ປຶກສາພາກພື້ນອາຊີຕາເວັນອອກສ່ຽງໃຕ້ ບໍລິການພື້ນຖານໃນຕົວເມືອງ ຫົວໜ້າຫ້ອງການ UN Habitat ປະຈໍາ ລາວ,ທ່ານເດຊານຸລາດ ແສນດວງເດດ ວ່າການແທນອະທິການບໍດີ ມຊ, ມີບັນດາຕາງໜ້າຈາກສະຖານທູດ, ອົງການຈັດຕັ້ງສາກົນ ປະຈໍາ ລາວ, ຫົວໜ້າກົມ-ຮອງກົມ,ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ງາມປະສົງ ເມືອງມະນີ ກ່າວວ່າ: ກອງປະຊຸມໃນຄັ້ງນີ້, ພາຍໃຕ້ຫົວຂໍ້ “ການຫັນເປົ້າໝາຍການພັດທະນາແບບຍືນຍົງ ໃນລະດັບທ້ອງຖິ່ນ ອັນສະແດງໃຫ້ເຫັນເຖິງຄວາມສໍາຄັນຂອງການຈັດວາງເປົ້າໝາຍການພັດທະນາແບບຍືນຍົງທົ່ວໃນໂລກ ກັບສະພາບການທ້ອງຖິ່ນຂອງປະເທດ. ອັນນີ້ບໍ່ແມ່ນເປັນພຽງຂະບວນການປັບຕົວເທົ່ານັ້ນແຕ່ຍັງເປັນຂະບວນການຂອງການປ່ຽນແປງໂດຍເປົ້າໝາຍໃນລະດັບໂລກ ສອດຄ່ອງກັບຄວາມເປັນຈິງຂອງປະເທດ ແລະ ທ້ອງຖິ່ນ.ໃນນັ້ນ, ຫົວຂໍ້ຍ່ອຍ“ການຮ່ວມມືກັບຊາວໜຸ່ມ ເພື່ອບັນລຸເປົ້າໝາຍການພັດທະນາແບບຍືນຍົງ” ເພາະຊາວໜຸ່ມ ຄືອະນາຄົດຂອງປະເທດຊາດ; ຊາວໜຸ່ມເປັນກໍາລັງແຮງ, ມີຫົວຄິດປະດິດສ້າງ ແລະ ວິໄສທັດຂອງພວກເຂົາ ແມ່ນຊັບພະຍາກອນສໍາຄັນ ແລະ ຂາດບໍ່ໄດ້ ໃນການເດີນທາງໄປສູ່ການພັດທະນາຕົວເມືອງແບບຍືນຍົງ.
ການພັດທະນາຕົວເມືອງທຸກລະດັບໃຫ້ໜ້າຢູ່ ປະຊາຊົນທຸກຄົນມີທີ່ຢູ່ອາໄສ ຊຶ່ງເປັນໜຶ່ງໃນປັດໄຈຂັ້ນພື້ນຖານ ທີ່ເໝາະສົມ ແລະ ພຽງພໍ ແມ່ນວຽກງານບຸລິມະສິດລໍາດັບຕົ້ນໆ ທີ່ທຸກປະເທດໃນທົ່ວໂລກຕ່າງກໍໃຫ້ຄວາມສໍາຄັນໂດຍສະເພາະແມ່ນອົງການ UN Habitat ທີ່ໄດ້ເປັນເຈົ້າການຈັດກອງປະຊຸມເວທີຕົວເມືອງໂລກ ຂຶ້ນເປັນປະຈໍາທຸກໆປີ.ການຂະຫຍາຍຕົວຂອງຕົວເມືອງໃນທົ່ວໂລກ ໄດ້ເກີດຂຶ້ນຢ່າງວ່ອງໄວ, ລວມທັງໃນ ສປປ ລາວ. ສະນັ້ນ, ກະຊວງ ຍທຂ ຈຶ່ງໄດ້ກຳນົດວິໄສທັດຮອດປີ 2030 ແຜນຍຸທະສາດ ໄລຍະ 2022-2030 ແລະ ແຜນປະຕິບັດ ໄລຍະ 2022-2025. ພ້ອມນັ້ນ, ກໍໄດ້ນໍາເອົາວາລະການພັດທະນາເມືອງໃໝ່ (New Urban Agenda) ແລະ ຫຼັກການໃນການພັດທະນາຕົວເມືອງແບບຍືນຍົງມານໍາໃຊ້.
ຈຸດປະສົງຫຼັກຂອງກອງປະຊຸມໃນຄັ້ງນີ້, ເພື່ອເປັນເວທີໃນການນໍາສະເໜີປຶກສາຫາລື, ສົນທະນາ ແລະ ແລກປ່ຽນບົດຮຽນ ຈາກທຸກພາກສ່ວນກ່ຽວຂ້ອງ ທີ່ມີຄວາມທຸ້ມເທພະຍາຍາມ ແລະ ມີຄວາມຮັບຜິດຊອບຮ່ວມກັນ ໃນການກໍານົດອະນາຄົດຂອງຕົວເມືອງໂດຍສະເພາະແມ່ນກາລະໂອກາດ ແລະ ສິ່ງທ້າທາຍ ໃນການຫັນເປັນຕົວເມືອງ ທີ່ຕິດພັນກັບສ້າງພື້ນຖານເສດຖະກິດຕົວເມືອງໃຫ້ມີຄວາມເຂັ້ມແຂງເປັນແຮງຂັບເຄື່ອນໃຫ້ເກີດການຟື້ນຟູ ແລະ ການເຕີບໂຕ ຂອງເສດຖະກິດແຫ່ງຊາດ.
ທ່ານ ງາມປະສົງ ເມືອງມະນີ ກ່າວຕື່ມວ່າ: ການພັດທະນາແບບຍືນຍົງ (SGDs) ແລະ ການພັດທະນາສິ່ງແວດລ້ອມເພື່ອຊຸກຍູ້ການເຮັດກະສິກຳ ແບບຍືນຍົງ ຊຶ່ງເປັນຫົວຂໍ້ທີ່ສໍາຄັນໃນການປຶກສາຫາລື, ແລກປ່ຽນ ແລະ ເຮັດວຽກຮ່ວມກັນລະຫວ່າງພາກລັດ, ເອກະຊົນ ແລະ ຜູ້ທີ່ມີສ່ວນຮ່ວມໃນແຕ່ລະຂະແໜງການ. ນອກຈາກນີ້, ເວທີຕົວເມືອງແຫ່ງຊາດ ຄັ້ງທີ 3ຈະໄດ້ຈັດຂຶ້ນເປັນເວລາ5 ວັນເລີ່ມແຕ່ວັນທີ 9 ທັນວາ ຮອດວັນທີ 13 ທັນວາ 2024ຍັງມີອີກຫຼາກຫຼາຍຫົວຂໍ້ສົນທະນາ ແລະ ການນໍາສະເໜີຈາກພາກສ່ວນຕ່າງໆ ທີ່ຈະແບ່ງປັນປະສົບການ, ສິ່ງທ້າທ້າຍ ແລະ ກາລະໂອກາດ ເພື່ອກ້າວໄປສູ່ວາລະການພັດທະນາຕົວເມືອງຂອງພວກເຮົາ. ສະນັ້ນ, ຈຶ່ງສະເໜີມາຍັງບັນດາທ່ານ ທີ່ເຂົ້າຮ່ວມກອງປະຊຸມຈົ່ງໄດ້ພ້ອມກັນປະກອບຄໍາຄິດຄໍາເຫັນ ແລະ ມີສ່ວນຮ່ວມໃນການພັດທະນາ ແລະ ແກ້ໄຂບັນຫາຂອງຕົວເມືອງໃນປະເທດເຮົາ ໃຫ້ມີຄວາມຍືນຍົງ, ໜ້າຢູ່ ແລະ ທັນສະໄໝ.
ໂອກາດນີ້, ທ່ານນາງ ວິສາພອນ ອິນທິລາດ ຮອງຫົວໜ້າກົມເຄຫາ ແລະ ຜັງເມືອງ ຍັງໄດ້ຂຶ້ນນໍາສະເໜີຄວາມເປັນມາຂອງເວທີຕົວເມືອງແຫ່ງຊາດ ຕື່ມອີກ.
(ຂ່າວ-ພາບ: ວັນເພັງ)
ຄໍາເຫັນ