ກອງປະຊຸມວຽກງານຍຸຕິທຳບັນດາແຂວງທີ່ມີຊາຍແດນຕິດຈອດກັນ ລະຫວ່າງ ລາວ-ຫວຽດນາມ ເປີດກວ້າງ ຄັ້ງທີ VII
ກອງປະຊຸມວຽກງານຍຸຕິທຳຂອງບັນດາແຂວງທີ່ມີຊາຍແດນຕິດຈອດກັນ ລະຫວ່າງ ສປປ ລາວ - ສສ ຫວຽດນາມ ເປີດກວ້າງ ຄັ້ງທີ VII ຈັດຂຶ້ນໃນວັນທີ 17 ມິຖຸນາຜ່ານມາ ທີ່ນະຄອນຮາຍຟອງ ສສ ຫວຽດນາມ ໂດຍການເປັນປະທານຮ່ວມຂອງທ່ານ ຄຳພັນ ພົມມະທັດ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງຍຸຕິທຳ ແຫ່ງ ສປປ ລາວ ແລະ ທ່ານ ຮວ່າງ ແທັງ ຕຸ່ງ ກຳມະການສູນກາງພັກກອມມູນິດຫວຽດນາມ ລັດຖະມົນຕີກະຊວງຍຸຕິທຳ ແຫ່ງ ສສ ຫວຽດນາມ, ມີທ່ານ ນາງ ຄຳເພົາ ເອີນທະວັນ ເອກອັກຄະລັດຖະທູດແຫ່ງ ສປປ ລາວ ປະຈຳ ສສ ຫວຽດນາມ, ທ່ານ ເລ ງັອກ ເຈົາ ກຳມະການສູນກາງພັກກອມມູນິດຫວຽດນາມ ເລຂາຄະນະບໍລິຫານງານພັກແຂວງຮາຍຟອງ ພ້ອມດ້ວຍຄະນະຜູ້ແທນຂັ້ນສູງຈາກສອງກະຊວງຍຸຕິທໍາລາວ-ຫວຽດນາມເຂົ້າຮ່ວມ.
ໃນກອງປະຊຸມຜູ້ແທນທັງສອງຝ່າຍ ໄດ້ຮັບຟັງການສະຫຼຸບຕີລາຄາຜົນການຈັດຕັ້ງປະຕິບັດມະຕິກອງປະຊຸມວຽກງານຍຸຕິທໍາຂອງບັນດາແຂວງທີ່ມີຊາຍແດນຕິດຈອດກັນ ລະຫວ່າງ ສສ ຫວຽດນາມ ແລະ ສປປ ລາວ ເປີດກວ້າງຄັ້ງທີ VI ຈັດຂຶ້ນທີ່ນະຄອນຫຼວງວຽງຈັນ ໂດຍແມ່ນກະຊວງຍຸຕິທໍາ ສປປ ລາວ ເປັນເຈົ້າພາບ ຊຶ່ງໃນກອງປະຊຸມເປີດກວ້າງ ຄັ້ງທີ VII ນີ້ແມ່ນກະຊວງຍຸຕິທໍາຂອງ ສສ ຫວຽດນາມ ຮັບກຽດເປັນເຈົ້າພາບ. ກອງປະຊຸມຄັ້ງນີ້, ຄະນະຜູ້ແທນທັງສອງຝ່າຍໄດ້ຜັດປ່ຽນກັນຂຶ້ນລາຍງານ ແລກປ່ຽນຄຳຄິດຄຳເຫັນ ເປັນຕົ້ນ ວຽກງານການຄຸ້ມຄອງ ແລະ ຈົດທະບຽນຄອບຄົວ, ສັນຊາດຕາມບໍລິເວນຊາຍແດນ, ການຕີລາຄາ ແລະ ປະເມີນຜົນການຈັດຕັ້ງປະຕິບັດວຽກງານປະຕິບັດຄໍາຕັດສິນຂອງສານທາງແພ່ງ, ວຽກງານໂຄສະນາເຜີຍແຜ່ກົດໝາຍ ແລະ ຊ່ວຍເຫຼືອທາງດ້ານຍຸຕິທໍາໃຫ້ພົນລະເມືອງຢູ່ຕາມບໍລິເວນຊາຍແດນ, ວຽກງານຊ່ວຍເຫຼືອຊຶ່ງກັນ ແລະ ກັນທາງດ້ານຍຸຕິທໍາໃນບັນຫາທາງແພ່ງ, ວຽກງານຝຶກອົບຮົມ ແລະ ບໍາລຸງກໍ່ສ້າງພະນັກງານຂັ້ນສູນກາງ ແລະ ທ້ອງຖິ່ນໃນໄລຍະຜ່ານມາ.
 |
| |
ຈາກນັ້ນ, ທັງສອງຝ່າຍໄດ້ປຶກສາຫາລືທິດທາງແຜນການຮ່ວມມືໃນຕໍ່ໜ້າ ຊຶ່ງທັງສອງກະຊວງຍຸຕິທຳລາວ-ຫວຽດນາມ ຈະສືບຕໍ່ຈັດຕັ້ງຜັນຂະຫຍາຍຂໍ້ຕົກລົງຂອງການຮ່ວມມືທີ່ໄດ້ລົງນາມໃນເດືອນກຸມພາ 2026 ແລະ ສືບຕໍ່ເຈລະຈາລົງນາມ ແລະ ຈັດຕັ້ງຜັນຂະຫຍາຍແຜນການຮ່ວມມືສຳລັບປີຕໍ່ໄປ, ຈະເພີ່ມທະວີການແລກປ່ຽນປະສົບການເພື່ອເສີມສ້າງຄວາມອາດສາມາດໃນການສ້າງຮ່າງນິຕິກຳ, ປະເມີນຜົນເອກະສານທາງດ້ານກົດໝາຍ, ການຈັດຕັ້ງປະຕິບັດກົດໝາຍ, ການຊ່ວຍເຫຼືອຊຶ່ງກັນ ແລະ ກັນທາງດ້ານຍຸຕິທຳໃນບັນຫາທາງແພ່ງ, ການບໍາລຸງກໍ່ສ້າງ, ຝຶກອົບຮົມ ແລະ ພັດທະນາຊັບພະຍາກອນມະນຸດຂອງຂະແໜງຍຸຕິທໍາ, ປະສານສົມທົບກັນຊຸກຍູ້ສົ່ງເສີມບັນດາການເຄື່ອນໄຫວຂອງການຮ່ວມມືພາຍໃນພາກພື້ນອາຊຽນ, ໂດຍສະເພາະຜ່ານກອງປະຊຸມລັດຖະມົນຕີຍຸຕິທຳອາຊຽນ (ALAWMM) ແລະ ກອງປະຊຸມເຈົ້າໜ້າທີ່ກົດ ໝາຍອາວຸໂສອາຊຽນ (ASLOM); ການຮ່ວມມືຫຼາຍຝ່າຍລະຫວ່າງອາຊຽນ ແລະ ຄູ່ຮ່ວມອື່ນໆ. ປະສານສົມທົບກັນໃນການເຂົ້າຮ່ວມກອງປະຊຸມລັດຖະມົນຕີຍຸຕິທຳ/ກົດໝາຍແມ່ນໍ້າຂອງ-ແມ່ນ້ຳລ້ານຊ້າງຄັ້ງທຳອິດ. ພິເສດ, ກະຊວງຍຸຕິທຳ ສປປ ລາວ ຈະສົ່ງຄະນະຜູ້ແທນເພື່ອເຂົ້າຮ່ວມເວທີປາໄສກົດໝາຍອາຊຽນໃນຫົວຂໍ້ "ການນຳໃຊ້ປັນ ຍາປະດິດໃນການສ້າງກົດໝາຍ ແລະ ການປະຕິບັດກົດໝາຍໃນຍຸກດີຈີຕອນ" ໃນເດືອນສິງຫາ 2026 ທີ່ຈະມາເຖິງນີ້ທີ່ ນະຄອນ ຫຼວງຮ່າໂນ້ຍ ສສ ຫວຽດນາມ, ເພີ່ມທະວີວຽກງານການໂຄສະນາເຜີຍແຜ່ກົດໝາຍ ແລະ ການຊ່ວຍເຫຼືອທາງດ້ານກົດໝາຍໃຫ້ປະຊາຊົນໃນເຂດພູດອຍ, ຫ່າງໄກສອກຫຼີກ ແລະ ປະຊາຊົນທີ່ອາໄສຢູ່ໃນເຂດລຽບຕາມຊາຍແດນ ລາວ-ຫວຽດນາມ, ບັນດາພະແນກຍຸຕິທໍາ, ອົງການປະຕິບັດຄຳຕັດສິນຂອງສານ ຂອງສອງປະເທດທີ່ມີຊາຍແດນຕິດຈອດກັນ ແລະ ບັນດາແຂວງແຮກສ່ຽວ, ຈະເພີ່ມທະວີໃນການຫັນປ່ຽນເປັນດີຈີຕອນໃນການປະສານສົມທົບກັນ, ຈັດຕັ້ງຜັນຂະຫຍາຍບັນດາກິດຈະກໍາຕ່າງໆ ທີ່ໄດ້ລົງນາມຮ່ວມກັນ ໂດຍຖືເອົາວິທີການປະສານງານແບບເຊິ່ງໜ້າ ແລະ ທາງອອນລາຍ ໃນການຈັດຕັ້ງປະຕິບັດວຽກງານຮ່ວມກັນ. ພ້ອມກັນນັ້ນ, ທັງສອງຝ່າຍຍັງໄດ້ປຶກສາຫາລື ແລະ ຕົກລົງເຫັນດີເປັນເອກະພາບກັນ ໃນການຈັດກອງປະຊຸມວຽກງານຍຸຕິທຳຂອງບັນດາແຂວງທີ່ມີຊາຍແດນຕິດຈອດກັນລະຫວ່າງ ສປປ ລາວ - ສສ ຫວຽດນາມ ເປີດກວ້າງ ຄັ້ງທີ VIII ທີ່ ສປປ ລາວ ຈະໄດ້ຮັບກຽດເປັນເຈົ້າພາບໃນປີ 2028 ຕື່ມອີກ.
ກ່ຽວກັບການຮ່ວມມືຂັ້ນສູນກາງ: ຝ່າຍລາວສືບຕໍ່ຊຸກຍູ້ສະເໜີໃຫ້ຝ່າຍຫວຽດນາມ ກ່ຽວກັບໂຄງການ ODA ຂອງລັດຖະບານຫວຽດນາມ ທີ່ມອບໃຫ້ກະຊວງຍຸຕິທຳລາວ (ໂດຍຜ່ານຄະນະກຳມະການຮ່ວມມືສອງຝ່າຍລາວ-ຫວຽດນາມ) ພະຍາຍາມເພື່ອໃຫ້ໄດ້ການອະນຸມັດໃນປີ 2026 ເພື່ອຮັບປະກັນໃຫ້ທັນການ ກ່ຽວກັບໂຄງການຊ່ວຍເຫຼືອທາງດ້ານວິຊາການຂອງລັດຖະບານຫວຽດນາມ ທີ່ມອບໃຫ້ກະຊວງຍຸຕິທຳຂອງລາວ ຍົກສູງຄວາມອາດສາມາດໃນວຽກງານທາງດ້ານກົດໝາຍຂອງພະນັກງານກະຊວງຍຸຕິທຳລາວໃນຕົ້ນປີ 2027; ສອງກະຊວງຍຸຕິທຳ ຈັດຕັ້ງຜັນຂະ ຫຍາຍຂໍ້ຕົກລົງຂອງການຮ່ວມມືລະຫວ່າງສອງກະຊວງຢ່າງມີປະສິດທິຜົນ (ທີ່ໄດ້ລົງນາມໃນເດືອນກຸມພາ 2026), ສືບຕໍ່ເຈລະຈາ, ລົງນາມ ແລະ ຈັດຕັ້ງຜັນຂະຫຍາຍແຜນການຮ່ວມມືສຳລັບປີຕໍ່ໄປ; ສອງກະຊວງຍຸຕິທຳ ຈະເພີ່ມທະວີການແລກປ່ຽນປະສົບການ ເພື່ອເສີມສ້າງຄວາມອາດສາມາດໃນການສ້າງຮ່າງນິຕິກຳ, ປະເມີນຜົນເອກະສານທາງດ້ານກົດໝາຍ, ການຈັດຕັ້ງປະຕິບັດກົດໝາຍ, ການຊ່ວຍເຫຼືອຊຶ່ງກັນ ແລະ ກັນທາງດ້ານຍຸຕິທຳໃນບັນຫາທາງແພ່ງ, ການບຳລຸງກໍ່ສ້າງ, ຝຶກອົບຮົມ ແລະ ພັດທະນາຊັບພະຍາກອນມະນຸດທາງດ້ານກົດໝາຍ; ສອງກະຊວງຍຸຕິທຳ ປະສານສົມທົບກັນຊຸກຍູ້ສົ່ງເສີມບັນດາການເຄື່ອນໄຫວຂອງການຮ່ວມມືພາຍໃນພາກພື້ນອາຊຽນ, ໂດຍສະເພາະຜ່ານກອງປະ ຊຸມລັດຖະມົນຕີຍຸຕິທຳອາຊຽນ (ALAWMM) ແລະ ກອງປະຊຸມເຈົ້າໜ້າທີ່ກົດໝາຍອາວຸໂສອາຊຽນ (ASLOM); ການຮ່ວມມືຫຼາຍຝ່າຍລະຫວ່າງອາຊຽນ ແລະ ຄູ່ຮ່ວມອື່ນໆ. ປະສານສົມທົບກັນໃນການເຂົ້າຮ່ວມກອງປະຊຸມລັດຖະ ມົນຕີຍຸຕິທຳ/ກົດໝາຍແມ່ນໍ້າຂອງ-ແມ່ນ້ຳລ້ານຊ້າງຄັ້ງທຳອິດ. ພິເສດ, ກະຊວງຍຸຕິທຳລາວ ຈະຕ້ອງສົ່ງຄະນະຜູ້ແທນເພື່ອເຂົ້າຮ່ວມເວທີປາໄສກົດໝາຍອາຊຽນໃນຫົວຂໍ້ "ການນຳໃຊ້ປັນຍາປະດິດໃນການສ້າງກົດໝາຍ ແລະ ການປະຕິ ບັດກົດໝາຍໃນຍຸກດີຈີຕອນ" ໃນເດືອນສິງຫາ 2026 ທີ່ນະຄອນຫຼວງຮ່າໂນ້ຍ; ສອງກະຊວງຍຸຕິທໍາ ປະສານສົມທົບກັນໃນການຈັດກິດຈະກໍາຕ່າງໆ ເພື່ອລະນຶກເຖິງພິທີສະເຫຼີມສະຫຼອງວັນຄົບຮອບທີ່ສຳຄັນຂອງທັງສອງຝ່າຍໃນປີ 2027, ໂດຍສະເພາະແມ່ນ: ການຮ່ວມມືທາງດ້ານກົດໝາຍ ແລະ ຍຸຕິທຳ ລະຫວ່າງກະຊວງຍຸຕິທຳລາວ ແລະ ກະ ຊວງຍຸຕິທຳຫວຽດນາມ ຄົບຮອບ 45 ປີ (1987-2027), ວັນສ້າງຕັ້ງສາຍພົວພັນທາງການທູດ ລະຫວ່າງ ສປປ ລາວ ແລະ ສສ ຫວຽດນາມ ຄົບຮອບ 65 ປີ (1962-2027) ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 50 ປີ (1977-2027) ຮັບປະກັນປະສິດທິຜົນຕົວຈິງ ແລະ ຄວາມເປັນໄປໄດ້.
 |
| |
ກ່ຽວກັບການຮ່ວມມືຂັ້ນທ້ອງຖິ່ນ: ສອງກະຊວງຍຸຕິທໍາ ຈະເພີ່ມທະວີວຽກງານການໂຄສະນາເຜີຍແຜ່ກົດໝາຍ ແລະ ການຊ່ວຍເຫຼືອທາງດ້ານກົດໝາຍໃຫ້ປະຊາຊົນໃນເຂດພູດອຍ, ຫ່າງໄກສອກຫຼີກ ແລະ ເຂດຊາຍແດນ ເວົ້າລວມ (ໃນນັ້ນລວມທັງປະຊາຊົນທີ່ຢູ່ໃນເຂດລຽບຕາມຊາຍແດນ ລາວ-ຫວຽດນາມ), ຮັບປະກັນຄວາມເໝາະສົມກ່ຽວກັບສະພາບເສດຖະກິດ, ສັງຄົມ ແລະ ວັດທະນະທຳຂອງແຕ່ລະເຂດຊາຍແດນ; ບັນດາພະແນກຍຸຕິທຳ, ອົງການປະຕິບັດຄໍາຕັດສິນຂອງສານ ຂອງສອງປະເທດທີ່ມີຊາຍແດນຮ່ວມກັນ ແລະ ບັນດາແຂວງແຮກສ່ຽວ, ຈະເພີ່ມທະວີການຫັນປ່ຽນດີຈີຕອນໃນການປະສານສົມທົບກັນ, ຈັດຕັ້ງຜັນຂະຫຍາຍບັນດາກິດຈະກໍາຕ່າງໆໃນການຮ່ວມມື, ໂດຍລວມເອົາວິທີການປະສານງານແບບເຊິ່ງໜ້າ ແລະ ທາງອອນລາຍ.
ຂ່າວ-ພາບ: ກະຊວງຍຸຕິທໍາ
ຄໍາເຫັນ