ຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອທົບທວນຄືນ ແລະ ກຳນົດທິດທາງແກ້ໄຂບັນຫາຍຸດທະສາດທີ່ພົ້ນເດັ່ນ ຊຶ່ງກ່ຽວຂ້ອງເຖິງການຈັດຕັ້ງປະຕິບັດໜ້າທີ່ການຕຸລາການ ໃຫ້ມີປະສິດທິພາບ ແລະ ປະສິດທິຜົນສູງຂຶ້ນ, ຕິດພັນກັບວຽກງານກໍ່ສ້າງ ແລະ ປັບປຸງກົງຈັກການຈັດຕັ້ງພາຍໃນສານປະຊາຊົນສູງສຸດ ໃຫ້ມີຄວາມເຂັ້ມແຂງ ແລະ ປອດໃສ, ຖືກຕ້ອງຕາມແນວທາງການເມືອງຂອງພັກ ແລະ ລັດ.
ໃນໂອກາດດັ່ງກ່າວ, ທ່ານ ນາງ ວຽງທອງ ສີພັນດອນ ໄດ້ມີຄຳເຫັນເນັ້ນໜັກໃສ່ຫຼາຍບັນຫາສຳຄັນ, ໂດຍສະເພາະແມ່ນການເພີ່ມທະວີການນຳພາ-ຊີ້ນຳຂອງຄະນະພັກ ຕໍ່ກັບວຽກງານວິຊາສະເພາະ, ຍົກສູງຄຸນນະພາບການພິຈາລະນາຄະດີ ໃຫ້ມີຄວາມຖືກຕ້ອງ, ທັນການ ແລະ ຍຸຕິທຳ, ພ້ອມທັງສືບຕໍ່ປັບປຸງກົນໄກການເຮັດວຽກຂອງອົງການຕຸລາການ ໃຫ້ສອດຄ່ອງກັບສະພາບການໃໝ່.
ກອງປະຊຸມຍັງໄດ້ຮັບຟັງການລາຍງານ ແລະ ປະກອບຄຳຄິດເຫັນສຳຄັນ ເຊັ່ນ: ແຜນການຈັດຕັ້ງປະຕິບັດວຽກງານຕາມມະຕິກອງປະຊຸມໃຫຍ່ ຄັ້ງທີ XII ຂອງພັກ, ວຽກງານການກະກຽມຄວາມພ້ອມໃນດ້ານຕ່າງໆ ເພື່ອຮອງຮັບການດຳເນີນງານດ້ານກົດໝາຍ ແລະ ຕຸລາການ ໃນໄລຍະໃໝ່.
ກອງປະຊຸມວິສາມັນໃນຄັ້ງນີ້ ໄດ້ສະແດງໃຫ້ເຫັນເຖິງຄວາມສາມັກຄີເປັນເອກະພາບ, ຄວາມຕັ້ງໜ້າ ແລະ ຄວາມຮັບຜິດຊອບສູງຂອງຄະນະບໍລິຫານງານພັກ ເພື່ອເຮັດສຳເລັດໜ້າທີ່ທີ່ໄດ້ຮັບມອບໝາຍ, ປະກອບສ່ວນສຳຄັນເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ ຕາມແນວທາງຂອງພັກ ແລະ ກົດໝາຍຂອງລັດ.
(ຂ່າວ: ສປສສ)
ຄໍາເຫັນ