ອົງການສະຫະປະຊາຊາດເປີດເຜີຍວ່າ: ມີພຽງ 10 ປະເທດໃນຈຳນວນເກືອບ 200 ປະເທດທົ່ວໂລກ ເຊັ່ນ: ສະຫະລັດ ອາຣັບເອມິເຣດ, ເອກວາດໍ, ນູແວນເຊລັງ, ສະວິດ ແລະ ອຸຣູກວາຍ ທີ່ຍື່ນແຜນແກ້ໄຂບັນຫາໂລກຮ້ອນ. ພາຍໃຕ້ສັນຍາລົງປາຣີ ວ່າດ້ວຍການປ່ຽນແປງດິນຟ້າອາກາດ ທັນຕາມກຳນົດເວລາທີ່ກຳນົດໄວ້ບໍ່ເກີນວັນທີ 10 ກຸມພາ 2025.
ສ່ວນ ຈີນ, ອິນເດຍແລະສະຫະພາບເອີຣົບ ແມ່ນປະເທດໃຫຍ່ທີ່ສົ່ງແຜນການດັ່ງກ່າວບໍ່ທັນຕາມກຳນົດເວລາ, ເຊັ່ນດຽວກັນກັບ ສະຫະລັດ ອາເມຣິກາ, ອັງກິດ ແລະ ເບຣຊິນ. ໂດຍກໍລະນີຂອງ ສະຫະລັດ ອາເມຣິການັ້ນເປັນການສະແດງອອກທາງສັນຍາລັກກ່ອນທີ່ ທ່ານ ໂດນັລ ທຣໍາ ປະທານາທິບໍດີ ສະຫະລັດ ອາເມຣິກາ ສັ່ງໃຫ້ສະຫະລັດ ອາເມຣິກາຖອນຕົວອອກຈາກສັນຍາປາຣີ.
ພາຍໃຕ້ສັນຍາປາຣີ ແຕ່ລະປະເທດຈະຕ້ອງກຳນົດເປົ້າໝາຍຫຼຸດຜ່ອນການປ່ອຍແກ໊ສເຮືອນແກ້ວພາຍໃນປີ 2035 ແລະ ໃຫ້ລາຍລະອຽດຢ່າງຈະແຈ້ງກ່ຽວກັບວິທີບັນລຸເປົ້າໝາຍດັ່ງກ່າວຕໍ່ອົງການສະຫະປະຊາຊາດ. ແຕ່ບໍ່ມີຂໍ້ບັງຄັບທາງກົດໝາຍຫຼືການລົງໂທດໃດໆສຳລັບປະເທດທີ່ຍື່ນແຜນການດັ່ງກ່າວຊ້າກວ່າກຳນົດ.
ສໍາລັບການປ່ອຍແກ໊ສເຮືອນແກ້ວຢູ່ໃນລະດັບທີ່ເພີ່ມສູງຂຶ້ນ ແຕ່ພາຍໃຕ້ສັນຍາປາຣີ ວ່າດ້ວຍການປ່ຽນແປງຂອງດິນຟ້າອາກາດໂລກທີ່ໄດ້ລົງນາມໃນປີ 2015 ມີເປົ້າໝາຍເພື່ອຈຳກັດອຸນຫະພູມໂລກໃຫ້ສູງຂຶ້ນບໍ່ເກີນ 2 ອົງສາ.
ໃນອາທິດຜ່ານມາ, ສູນບໍລິການການປ່ຽນແປງດິນຟ້າອາກາດ Copernicus ຂອງສະຫະພາບເອີຣົບ ໄດ້ລະບຸໄວ້ໃນຈົດໝາຍຂ່າວປະຈໍາເດືອນວ່າ: ສະພາບອາກາດທີ່ຮ້ອນຜິດປົກກະຕິໄດ້ສືບຕໍ່ມາຮອດເດືອນມັງກອນ 2025, ໂດຍອຸນຫະພູມສະເລ່ຍຂອງໂລກໃນເດືອນມັງກອນ 2025ສູງກວ່າໄລຍະກ່ອນຍຸກອຸດສາຫະກຳ ເຖິງ 1.75 ອົງສາ.
ໃນຂະນະທີ່19 ເດືອນຜ່ານມາ, ມີເຖິງ18 ເດືອນທີ່ອຸນຫະພູມສະເລ່ຍຂອງໂລກໄດ້ສູງກວ່າລະດັບກ່ອນຍຸກອຸດສາຫະກໍາ 1.5 ອົງສາ.
ໃນໄລຍະ2 ປີທີ່ຜ່ານມາ, ພື້ນຜິວໂລກໄດ້ມີອຸນຫະພູມສູງຂຶ້ນຫຼາຍ ຊຶ່ງເປັນຜົນມາຈາກການປ່ອຍກາກບອນຈາກການເຜົາໄໝ້ເຊື້ອໄຟຟອດຊິວເຊັ່ນ: ຖ່ານຫີນ, ອາຍແກ໊ສແລະນ້ໍາມັນ ທີ່ເພີ່ມຂຶ້ນໃນລະດັບສູງສຸດໃນປີ 2023 ແລະ 2024.
ຄໍາເຫັນ