ສຳລັບປະຊາຊົນລາວບັນດາເຜົ່າ ກໍຄືບັນດາປະຊາຊາດທີ່ຮັກຫອມສັນຕິພາບ ແລະ ຄວາມເປັນທຳໃນທົ່ວໂລກ, ສະຫາຍ ຟິແດນ ກັສໂຕຣ ແມ່ນເພື່ອນມິດທີ່ຍິ່ງໃຫຍ່ ແລະ ສັນຍາລັກດີເດັ່ນແຫ່ງການຕໍ່ສູ້ຕ້ານຈັກກະພັດ ເພື່ອປົກປ້ອງເອກະລາດແຫ່ງຊາດ ແລະ ຄວາມກ້າວໜ້າທາງສັງຄົມ; ນັບແຕ່ປີ 1959 ຈົນຮອດວັນທີ່ສິ້ນລົມຫາຍໃຈນັ້ນ, ສະຫາຍ ຟິແດນ ໄດ້ນຳເອົາການປະຕິວັດສັງຄົມນິຍົມຢູ່ກູບາ ກ້າວໄປຂ້າງໜ້າຢ່າງມີໄຊ ໃນທ່າມກາງນະໂຍບາຍຮຸກຮານທາງການທະຫານ, ແຊກແຊງທາງການເມືອງ ແລະ ປິດລ້ອມທາງເສດຖະກິດຢ່າງຕໍ່ເນື່ອງຂອງ 11 ອໍານາດການປົກຄອງຂອງສະຫະລັດ ລວມທັງຄວາມພະຍາຍາມລອບສັງຫານຂອງຈັກກະພັດຫຼາຍກວ່າ 600 ຄັ້ງ.
ມາຮອດປັດຈຸບັນ, ພາຍໃຕ້ການຊີ້ນຳຍຸດທະສາດ ແລະ ອຸດົມການປະຕິວັດອັນໜັກແໜ້ນຂອງສະຫາຍ ຟິແດນ ໃນຕະຫຼອດໄລຍະເກືອບ 6 ທົດສະວັດ, ກູບາສັງຄົມນິຍົມ ຈຶ່ງສາມາດຢືນຢູ່ແຖວໜ້າໃນອາເມລິກາລາຕິນ ທາງດ້ານການສຶກສາ, ສາທາລະນະສຸກ, ປ້ອງກັນຊາດ ແລະ ເຕັກໂນໂລຊີຊີວະພາບ; ສັງຄົມກູບາມີຄວາມສະຫງົບປອດໄພ ແລະ ປະຊາຊົນກູບາມີຄວາມສາມັກຄີເປັນຈິດໜຶ່ງໃຈດຽວ ແລະ ຟົດຟື້ນປະຕິວັດຢູ່ອ້ອມຂ້າງພັກກອມມູນິດກູບາ ຢ່າງສະເໝີຕົ້ນສະເໝີປາຍ; ສິ່ງໜຶ່ງອີກທີ່ໜ້າພາກພູມໃຈທີ່ສະຫາຍ ຟິແດນ ກັສໂຕຣ ໄດ້ສ້າງຈິດສຳນຶກອັນໄດ້ກາຍເປັນຫີນສີລາ ແລະ ຫຼັກການທີ່ບໍ່ປ່ຽນແປງຂອງການປະຕິວັດກູບາ ຄືຄວາມສາມັກຄີສາກົນ ! ໂດຍຢຶດໝັ້ນນໍ້າໃຈສາກົນກຳມະຊີບ, ສະຫາຍ ຟິແດນ ໄດ້ເວົ້າຢູ່ສະເໝີວ່າ ພວກເຮົາຕ້ອງແບ່ງປັນສິ່ງທີ່ມີໃຫ້ແກ່ເພື່ອນ ບໍ່ແມ່ນສິ່ງທີ່ເຫຼືອຈາກຄວາມຕ້ອງການ; ຈາກແນວຄິດດັ່ງກ່າວນີ້, ເຖິງແມ່ນວ່າກູບາຍັງພົບຄວາມຫຍຸ້ງຍາກຫຼາຍຢ່າງຢູ່ພາຍໃນປະເທດຂອງຕົນກໍຕາມ ນັບແຕ່ປີ 1963 ເປັນຕົ້ນມາ ສະຫາຍ ຟິແດນ ກັສໂຕຣ ໄດ້ຕັດສິນໃຈສົ່ງແພດ ແລະ ຊ່ຽວຊານດ້ານຕ່າງໆຫຼາຍກວ່າ 5 ແສນຄົນ ໄປປະຕິບັດໜ້າທີ່ສາກົນຢູ່ຫຼາຍກວ່າ 150 ປະເທດໃນທົ່ວໂລກ ແລະ ໃຫ້ທຶນແກ່ຊາວໜຸ່ມຫຼາຍກວ່າ 52 ພັນຄົນ ຈາກ 132 ປະເທດ ມາສຶກສາຢູ່ປະເທດກູບາ, ໃນນີ້ລວມທັງການສົ່ງໜ່ວຍແພດສຸກເສີນໄປຊ່ວຍປະເທດຕ່າງໆ ໃນເວລາເກີດໄພພິບັດທາງທຳມະຊາດ ແລະ ໃນເວລາເກີດໂລກລະບາດທີ່ຮ້າຍແຮງຕ່າງໆ.
ໃນເວທີສາກົນ, ໃນຖານະທີ່ກູບາເປັນປະທານຂະບວນການປະເທດບໍ່ຮ່ວມກຸ່ມເຖິງສອງຄັ້ງ ແລະ ປະທານກຸ່ມປະເທດ 77 ແລະ ຈີນ ສອງຄັ້ງ, ສະຫາຍ ຟິແດນ ກັສໂຕຣ ໄດ້ສະເໜີແນວທາງການທູດທີ່ຊັດເຈນ ແລະ ໃນການຕໍ່ສູ້ເພື່ອສັນຕິພາບ, ເອກະລາດແຫ່ງຊາດ ແລະ ເພື່ອລະບຽບເສດຖະກິດສາກົນທີ່ເປັນທຳ ໂດຍສະເພາະແມ່ນການປົກປ້ອງຜົນປະໂຫຍດຂອງບັນດາປະເທດກຳລັງພັດທະນາ ບົນພື້ນຖານຂອງຫຼັກ ການກົດໝາຍສາກົນ ແລະ ກົດບັດສະຫະປະຊາຊາດ!
ຈາກຍຸດທະສາດ ແລະ ວິໄສທັດປະຕິວັດຂອງສະຫາຍ ຟິແດນກັສໂຕຣ, ກູບາໃນປັດຈຸບັນ ຈຶ່ງໄດ້ກາຍ ເປັນຄັນທຸງ ແລະ ຫົວຈັກໃນບັນດາປະເທດອາເມລິກາລາຕິນ ເພື່ອກ້າວໄປສູ່ສັງຄົມທີ່ດີກວ່າເກົ່າທີ່ປາສະຈາກການຄອບງຳຈາກພາຍນອກ.
ກ່ຽວກັບການພົວພັນມິດຕະພາບກັບລາວເຮົາ, ສະຫາຍ ຟິແດນ ກັສໂຕຣ ໄດ້ຊີ້ນຳໃຫ້ສູນກາງພັກ ຈັດຕັ້ງຄະນະກຳມະການ ເພື່ອຄວາມສາມັກຄີກັບຫວຽດນາມ, ລາວ ແລະ ກຳປູເຈຍ ໃນປີ 1968 ເພື່ອເປັນກຳລັງໃຈສະໜັບສະໜູນການຕໍ່ສູ້ກູ້ຊາດຕ້ານຈັກກະພັດອາເມຣິກາຂອງປະຊາຊົນລາວ. ກ່ອນປີ 1975, ສະຫາຍ ຟິແດນ ກັສໂຕຣ ໄດ້ມີໂອກາດຕ້ອນຮັບ ແລະ ພົບປະກັບສະຫາຍ ພູມີ ວົງວິຈິດ ແລະ ສະຫາຍ ໜູຮັກ ພູມສະຫວັນ ຢູ່ນະຄອນຫຼວງລາຮາວານ ໃນຖານະຄະນະນຳຂອງສູນກາງແນວລາວຮັກຊາດ ແລະ ໄດ້ຈັດສົ່ງທີມແພດຊຸດທຳອິດໄປຊ່ວຍປະຊາຊົນລາວໃນເຂດທີ່ໝັ້ນປະຕິວັດຢູ່ເມືອງວຽງໄຊ ແຂວງຫົວພັນ; ພາຍຫຼັງການສະຖາປະນາ ສປປ ລາວ, ສະຫາຍ ຟິແດນ ກັສໂຕຣ ຍັງໄດ້ມີໂອກາດຕ້ອນຮັບ ແລະ ພົບປະກັບບັນດາຜູ້ນຳຮຸ່ນທຳອິດຂອງພັກປະຊາຊົນປະຕິວັດລາວ ທັງໝົດ 7 ສະຫາຍ ຢູ່ນະຄອນຫຼວງລາຮາວານ ໂດຍສະເພາະແມ່ນການຢ້ຽມຢາມມິດຕະພາບຢູ່ກູບາຂອງ ສະຫາຍ ໄກສອນ ພົມວິຫານ ເມື່ອເດືອນກັນຍາ 1976 ທີ່ຈະຄົບຮອບ 50 ປີ ໃນເດືອນກັນຍານີ້, ອັນນີ້ ແມ່ນຂີດໝາຍທີ່ສໍາຄັນໃນການພົວພັນຖານມິດສະຫາຍອ້າຍນ້ອງ ຊຶ່ງໄດ້ສະແດງອອກໃນຖະແຫຼງການຮ່ວມລະຫວ່າງສອງປະເທດພວກເຮົາ. ບົນຈິດໃຈດັ່ງກ່າວນີ້, ການຊ່ວຍເຫຼືອເຊິ່ງກັນແລະກັນຢ່າງຈິງໃຈ ແມ່ນສຸດທີ່ສຳຄັນ ຊຶ່ງປະຊາຊົນລາວພວກຂ້າພະເຈົ້າຍາມໃດກໍຮູ້ບຸນຄຸນຕໍ່ ສະຫາຍ ຟິແດນກັສໂຕຣ, ຕໍ່ພັກ, ລັດ ແລະ ປະ ຊາຊົນກູບາ.
ໃນໂອກາດຄົບຮອບ 100 ປີ ທີ່ພວກເຮົາພ້ອມກັນລະນຶກເຖິງຜົນງານ ແລະ ຄຸນງາມຄວາມດີທີ່ສະຫາຍ ຟິແດນ ໄດ້ປະໄວ້ເປັນມໍລະດົກອັນລໍ້າຄ່ານີ້, ອີກເທື່ອໜຶ່ງ ໃນນາມປະທານສະມາຄົມມິດຕະພາບ ລາວ-ກູບາ, ພວກເຮົາຈະເຮັດສຸດຄວາມສາມາດເພື່ອສືບຕໍ່ເປັນສ່ວນໜຶ່ງໃນແນວຫຼັງຍຸດທະສາດສຳລັບການສະໜັບສະໜູນການຕໍ່ສູ້ຂອງປະຊາຊົນກູບາທີ່ພິລະອາດຫານ ໃນການປົກປັກຮັກສາປະເທດຊາດສັງຄົມນິ ຍົມ, ຕ້ານການປິດລ້ອມ ແລະ ການລົງໂທດທຸກຮູບແບບຂອງສະຫະລັດ!
ທ້າຍສຸດນີ້, ຂ້າພະເຈົ້າເຊື່ອໝັ້ນຢ່າງແຮງກ້າວ່າ ການປະຕິວັດກູບາພາຍໃຕ້ອຸດົມການທີ່ ສະຫາຍ ຟິແດນ ກັສໂຕຣ ໄດ້ປູກຝັງໄວ້ ຈະສືບຕໍ່ກ້າວໄປຂ້າງໜ້າຢ່າງມີໄຊ!
ແນວຄິດ, ທັດສະນະ ແລະ ອຸດົມການຂອງ ສະຫາຍ ຟິແດນ ກັສໂຕຣ ຍືນຍົງຢູ່ໃນດວງໃຈຂອງພວກເຮົາຕະຫຼອດໄປ!
(ຂ່າວ: ສພຊ)
ຄໍາເຫັນ