ມີຜູ້ຊົງຄຸນວຸດທິ, ລັດຖະມົນຕີສະພາປະຊາຄົມວັດທະນະທຳ-ສັງຄົມອາຊຽນ, ສະມາຊິກລັດຖະສະພາຈາກບັນດາປະເທດສະມາຊິກອາຊຽນ, ສະມາຊິກລັດຖະສະພາແມ່ຍິງ, ລັດຖະມົນຕີກະຊວງສາມັກຄີ ແລະ ການມີສ່ວນຮ່ວມທາງສັງຄົມແຫ່ງຕີມໍແລັດສະເຕພ້ອມດ້ວຍຮອງເລຂາທິການໃຫຍ່ອາຊຽນ ແລະ ບັນດາຫົວໜ້າຄະນະຜູ້ແທນອາຊຽນເຂົ້າຮ່ວມ.
ໂອກາດດັ່ງກ່າວ, ທ່ານນາງ ສວນສະຫວັນ ວິຍະເກດ ໄດ້ກ່າວວ່າ: ກອງປະຊຸມຄັ້ງນີ້ໄດ້ພ້ອມກັນປຶກສາຫາລືຄົ້ນຄວ້າໃນຫຼາຍບັນຫາຫຼາຍຂົງເຂດທີ່ສໍາຄັນ ເພື່ອຮ່ວມກັນພັດທະນາຍຸດທະສາດໃດທີ່ມີທ່າແຮງໃນການເພີ່ມທະວີການສ້າງນະໂຍບາຍຂອງປະຊາຄົມວັດທະນະທຳ-ສັງຄົມອາຊຽນ ເພື່ອເສີມຂະຫຍາຍບັນດາກົນໄກນິຕິບັນຍັດທີ່ມີຢູ່ແລ້ວ ແລະ ກຳນົດກາລະໂອກາດທີ່ມີຄວາມເປັນໄປໄດ້ໃນການຮ່ວມມືກັບລັດຖະສະພາ ແລະ ຜັນຂະຫຍາຍບົດບາດຂອງສະພາລະຫວ່າງຊາດອາຊຽນທີ່ສາມາດໃຫ້ການສະໜັບສະໜູນແຜນຍຸດທະສາດປະຊາຄົມວັດທະນະທຳ-ສັງຄົມອາຊຽນຫຼັງປີ 2025.
ກອງປະຊຸມຄັ້ງນີ້ຈັດຂຶ້ນພາຍໃຕ້ການເປັນປະທານອາຊຽນຂອງສປປ ລາວ ໃນປີ 2024 ເພື່ອປະກອບສ່ວນເຂົ້າໃນການພັດທະນາແຜນຍຸດທະສາດປະຊາຄົມວັດທະນະທຳ-ສັງຄົມອາຊຽນຫຼັງປີ 2025ຊຶ່ງໃນໄລຍະຜ່ານມາໜ່ວຍງານພັດທະນາເອກະສານດັ່ງກ່າວໄດ້ມີການປະຊຸມຮ່ວມກັບບັນດາສູນ ແລະ ອົງການກ່ຽວຂ້ອງຂອງອາຊຽນຍັງໄດ້ສະແດງຄວາມເຫັນຕໍ່ບັນດາຂະແໜງການພາຍໃຕ້ເສົາຄ້ຳວັດທະນະທຳ-ສັງຄົມອາຊຽນ, ບັນດານັກຄົ້ນຄວ້າ, ສະຖາບັນຄົ້ນຄວ້າຕ່າງໆ ແລະ ບັນດາອົງການຈັດຕັ້ງທາງສັງຄົມ. ຢ່າງໃດກໍຕາມ ສປປ ລາວ ໄດ້ປະກອບສ່ວນເຂົ້າໃນການສ້າງວິໄສທັດປະຊາຄົມອາຊຽນ 2045 ແລະ ແຜນຍຸດທະສາດຕ່າງໆ ຊຶ່ງໃນຕົ້ນປີນີ້, ໜ່ວຍງານພັດທະນາແຜນຍຸດທະສາດປະຊາຄົມວັດທະນະທຳ-ສັງຄົມອາຊຽນຫຼັງປີ 2025 ໄດ້ຖືກສ້າງຕັ້ງຂຶ້ນເພື່ອປະຕິບັດໜ້າທີ່ຂອງຕົນ.
ທ່ານນາງ ສວນສະຫວັນ ວິຍະເກດ ກ່າວອີກວ່າ: ອີງຕາມວິໄສທັດປະຊາຄົມອາຊຽນປີ 2045 ທີ່ຖືກຮັບຮອງຈາກຜູ້ນຳອາຊຽນເປັນພື້ນຖານໃຫ້ພາກພື້ນອາຊຽນມີຄວາມເຂັ້ມແຂງ, ມີນະວັດຕະກຳໃໝ່, ແຂງແກ່ນ ແລະ ປະຊາຊົນເປັນແກນກາງ. ຈາກປະຊາຄົມວັດທະນະທຳ-ສັງຄົມອາຊຽນ ກາຍເປັນຂົງເຂດຍຸດທະສາດຫຼັກ ແລະ ເປັນຕົວຊີ້ວັດຍຸດທະສາດທີ່ສາມາດຊຸກຍູ້, ສົ່ງເສີມ ແລະ ປະຕິບັດຕົວຈິງເພື່ອການພັດທະນາຊັບພະຍາກອນມະນຸດ ແລະ ການພັດທະນາແບບຍືນຍົງເພື່ອເພີ່ມທະວີການພົວພັນຮ່ວມມືໃຫ້ກ້າວໄປສູ່ຈຸດປະສົງເປົ້າໝາຍຂອງປະຊາຄົມພວກເຮົາ.
ຂ່າວ-ພາບ: ຍຸພິນທອງ
ຄໍາເຫັນ