 |
ທ່ານ ຄໍາມອນ ຈັນທະຈິດ ກ່າວວ່າ: ວັນບຸນກຸດຈີນ ບໍ່ພຽງແຕ່ເປັນວັນແຫ່ງການສະເຫຼີມສະຫຼອງການປ່ຽນຜ່ານຂອງລະດູການ, ແຕ່ຍັງແມ່ນສັນຍາລັກແຫ່ງ "ຄວາມຫວັງ, ການເລີ່ມຕົ້ນໃໝ່ ແລະ ຄວາມກົມກຽວ". ສໍາລັບຄະນະໂຄສະນາອົບຮົມສູນກາງພັກຍາມໃດກໍຕີລາຄາສູງ ຕໍ່ການພົວພັນຮ່ວມມືຖານສະຫາຍອ້າຍນ້ອງ ໂດຍສະເພາະໃນວຽກງານການເມືອງ-ແນວຄິດ ແລະ ການແລກປ່ຽນວັດທະນະທຳ. ພວກເຮົາເຊື່ອໝັ້ນວ່າພະລັງແຫ່ງຄວາມເຂົ້າອົກເຂົ້າໃຈກັນ ແລະ ເປັນຄູ່ຮ່ວມຊາຕາກຳ ຈະເປັນແຮງຊຸກດັນໃຫ້ສອງຊາດກ້າວໄປສູ່ຄວາມມັ່ງຄັ່ງເຂັ້ມແຂງ.
 |
ໃນໂອກາດອັນເປັນສິຣິມຸງຄຸນນີ້, ທ່ານ ຄໍາມອນ ຈັນທະຈິດ ຍັງໄດ້ອວຍພອນໄຊອັນປະເສີດໃຫ້ບັນດາທ່ານ, ຕະຫຼອດຮອດຄອບຄົວ ແລະ ພີ່ນ້ອງເຊື້ອສາຍຈີນ ຈົ່ງມີສຸຂະພາບພາລະນາໄມທີ່ສົມບູນເຂັ້ມແຂງທັງກາຍ ແລະ ໃຈ, ປະສົບຜົນສຳເລັດອັນຍິ່ງໃຫຍ່ໃນພາລະກິດການງານ ແລະ ການສ້າງສາພັດທະນາປະເທດຊາດ, ຂໍໃຫ້ການພົວພັນຮ່ວມມືລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຈີນ ແລະ ສາຍພົວພັນບົນພື້ນຖານຫຼັກການ 4 ດີຄື: ເພື່ອນມິດທີ່ດີ, ສະຫາຍທີ່ດີ, ພັນທະມິດທີ່ດີ ແລະ ຄູ່ຮ່ວມມືທີ່ດີ.
 |
ທ່ານ ນາງ ຟາງຫົງ ກ່າວວ່າ: ບຸນກຸດຈີນ ແມ່ນບຸນປະເພນີທີ່ສໍາຄັນທີ່ສຸດຂອງປະຊາຊົນຈີນ ແລະ ໄດ້ຖືກຈົດບັນທຶກເປັນມໍຣະດົກວັດທະນະທຳນາມມະທຳຂອງມວນມະນຸດ ໂດຍອົງການອົງການອຸຍແນັສໂກ. ໃນນາມເປັນສັນຍະລັກທາງວັດທະນະທຳທີ່ບົ່ງບອກເຖິງການມາພົບປະສ້າງສັນ, ຄວາມກົມກຽວ ແລະ ການອວຍພອນ, ບຸນກຸດຈີນໄດ້ກາຍເປັນບຸນປະເພນີທີ່ທົ່ວໂລກຮ່ວມກັນສະເຫຼີມສະຫຼອງ.
 |
ບຸນກຸດຈີນບໍ່ພຽງແຕ່ແມ່ນຊ່ວງເວລາແຫ່ງການແບ່ງປັນຄວາມເບີກບານມ່ວນຊື່ນ ແລະ ສົ່ງມອບຄວາມຫວັງເທົ່ານັ້ນ, ແຕ່ຍັງເປັນການຊຸກຍູ້ການແລກປ່ຽນທາງວັດທະນະທຳ ແລະ ເພີ່ມທະວີຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ. ໃນຄໍ່າຄືນນີ້, ນັກສິລະປິນຈາກສອງຊາດລາວ-ຈີນໄດ້ຂຶ້ນເວທີສະແດງຮ່ວມກັນ ເພື່ອມອບຄວາມສຸກທາງວັດທະນະທຳອັນດີງາມໃຫ້ທຸກໆທ່ານ ຊຶ່ງຈະເປັນການຊຸກຍູ້ການແລກປ່ຽນຮຽນຮູ້ອາລິຍະທຳລະຫວ່າງ ລາວ-ຈີນ ໃຫ້ມີຄວາມແໜ້ນແຟ້ນກວ່າເກົ່າ, ພ້ອມທັງສົ່ງເສີມຄວາມຮັກແພງ ແລະ ການເຊື່ອມໂຍງຈິດໃຈຂອງປະຊາຊົນທັງສອງຊາດໃຫ້ນັບມື້ນັບເລິກເຊິ່ງຂຶ້ນ.
 |
ລາຍການສະແດງສິລະປະວັນນະຄະດີໃນຄັ້ງນີ້ ປະກອບມີຫຼາຍລາຍການຄື: ການສະແດງເປີດງານລະດູໃບໄມ້ປົ່ງທີ່ສົດໃສ, ຮ້ອງເພງ ແລະ ຟ້ອນ ບົດເພງແຫ່ງຄວາມສິລິມຸງຄຸນມີ: ເພງສະຫຼອງບຸນປີໃໝ່ຈີນ, ໂຊກດີປີ ໃໝ່, ຟ້ອນລໍາສຽງນົກຂານຕ້ອນຮັບແສງຕາເວັນໃໝ່, ຟ້ອນນາງແກ້ວ, ສຽງເພງມ່ວນຊື່ນຂອງເສັ້ນທາງແຫ່ງມິດຕະພາບ, ດົນຕີພື້ນເມືອງປະສານສຽງຊ້າຍໜ້າ, ແພງຮັກຂອງເຜົ່າອີຊູ, ດົນຕີອໍແຄັສຕຣາ ສະບາຍດີຫຼວງພະບາງ, ຫຼຽງຈູ້, ບົດເພງທັດສະນະຄະຕິທີ່ດີ, ຄວາມຮັກປຽບດັ່ງສາຍນໍ້າ ແລະ ອື່ນໆ ໃຫ້ຄວາມມ່ວນຊື່ນ ແລະ ປະທັບໃຈໃຫ້ຜູ້ເຂົ້າຮ່ວມເປັນຢ່າງດີ.
 |
ຂ່າວ-ພາບ: ວັນເພັງ
ຄໍາເຫັນ