ໃນວັນທີ 15 ກໍລະກົດ 2026 ໄດ້ຈັດກອງປະຊຸມພົບປະສອງຝ່າຍ ລະຫວ່າງ ຄະນະຜູ້ແທນຂັ້ນສູງ ອົງການໄອຍະການປະຊາຊົນສູງສຸດ ແຫ່ງ ສປປ ລາວ ນຳພາໂດຍ ສະຫາຍ ນາງ ລີວົງ ລາວລີ ກຳມະການສູນກາງພັກ ຫົວໜ້າອົງການໄອຍະການປະຊາຊົນສູງສຸດ ແຫ່ງ ສປປ ລາວ ພ້ອມດ້ວຍຄະນະ ແລະ ຄະນະຜູ້ແທນຂັ້ນສູງ ອົງການໄອຍະການປະຊາຊົນສູງສຸດ ສສ ຫວຽດນາມ ຊຶ່ງນຳພາໂດຍ ສະຫາຍ ຫງວຽນ ຮຸຍ ຕຽນ ກຳມະການສູນກາງພັກ ຫົວໜ້າອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ ພ້ອມດ້ວຍຄະນະ.
ກອງປະຊຸມພົບປະຄັ້ງນີ້, ທັງສອງຝ່າຍ ໄດ້ຜັດປ່ຽນກັນລາຍງານສະພາບລວມການພັດທະນາເສດຖະກິດ-ສັງຄົມ ຂອງຕົນ ໂດຍສັງເຂບ ແລະ ຕີລາຄາຜົນສຳເລັດການຈັດຕັ້ງປະຕິບັດ ສັນຍາຮ່ວມມືລະຫວ່າງສອງອົງການ ທີ່ໄດ້ລົງນາມ ໃນປີ 2022 ເປັນຕົ້ນ:
ໜຶ່ງ, ສອງຝ່າຍ ໄດ້ສືບຕໍ່ຮັກສາການຢ້ຽມຢາມ, ການພົບປະ ແລະ ການເຮັດວຽກຮ່ວມກັນຂອງຄະນະຜູ້ແທນຂັ້ນສູງ ແລະ ຂັ້ນວິຊາການ ຢ່າງສະໝ່ຳສະເໝີ ທັງຢູ່ຂັ້ນສູນກາງ ແລະ ທ້ອງຖິ່ນ; ການຢ້ຽມຢາມ ແລະ ເຮັດວຽກຢ່າງເປັນທາງການຂອງຄະນະຜູ້ແທນຂັ້ນສູງ ອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ ຢູ່ ສປປ ລາວ ໃນທ້າຍປີ 2025. ນອກຈາກນັ້ນ, ໃນໂອກາດເຂົ້າຮ່ວມກອງປະຊຸມລະດັບພາກພື້ນ ແລະ ສາກົນ, ຄະນະຜູ້ແທນຂອງສອງຝ່າຍຍັງໄດ້ພົບປະ, ແລກປ່ຽນຂໍ້ມູນ ແລະ ປຶກສາຫາລືວຽກງານເປັນປະຈຳ, ຊຶ່ງໄດ້ປະກອບສ່ວນສຳຄັນໃນການເສີມສ້າງຄວາມໄວ້ເນື້ອເຊື່ອໃຈ, ຄວາມສາມັກຄີ ແລະ ຍົກລະດັບການຮ່ວມມືລະຫວ່າງສອງອົງການໃຫ້ນັບມື້ນັບເລິກເຊິ່ງ ແລະ ມີປະສິດທິຜົນຍິ່ງຂຶ້ນ.
ສອງ, ດ້ານວິຊາການ, ສອງຝ່າຍ ໄດ້ແລກປ່ຽນບົດຮຽນວິຊາຊີບ, ຮ່ວມຄົ້ນຄວ້າ ແລະ ປະສານງານດ້ານການຮ່ວມມືທາງອາຍາ, ການສົ່ງຜູ້ຮ້າຍຂ້າມແດນ ແລະ ການຊ່ວຍເຫຼືອທາງອາຍາ. ພ້ອມກັນນັ້ນ, ຝ່າຍຫວຽດນາມຍັງໄດ້ໃຫ້ການສະໜັບສະໜູນດ້ານການບຳລຸງສ້າງ ແລະ ຝຶກອົບຮົມພະນັກງານ, ຊຶ່ງໄດ້ຊ່ວຍຍົກສູງຄວາມຮູ້, ທັກສະວິຊາຊີບ ແລະ ຄວາມສາມາດໃນການປະຕິບັດໜ້າທີ່ຂອງພະນັກງານໄອຍະການລາວໃຫ້ດີຂຶ້ນ.
ສາມ, ສສ ຫວຽດນາມ ໄດ້ສືບຕໍ່ໃຫ້ການຊ່ວຍເຫຼືອແກ່ ສປປ ລາວ ໃນການບໍາລຸງສ້າງ ແລະ ຝຶກອົບຮົມພະນັກງານໄອຍະການຢ່າງຕໍ່ເນື່ອງ, ຊຶ່ງເປັນການລົງທຶນດ້ານຊັບພະຍາກອນມະນຸດທີ່ມີຄຸນຄ່າ ແລະ ໄດ້ສ້າງຜົນປະໂຫຍດອັນຍາວນານໃຫ້ແກ່ການພັດທະນາວຽກງານໄອຍະການຂອງ ສປປ ລາວ.
ສີ່, ດ້ານການປະສານງານຕາມແນວຊາຍແດນ, ອົງການໄອຍະການຂອງບັນດາແຂວງທີ່ມີຊາຍແດນຕິດຈອດກັນ ໄດ້ຮັກສາການພົວພັນ ແລະ ປະສານງານຢ່າງໃກ້ຊິດ, ແລກປ່ຽນຂໍ້ມູນ, ປຶກສາຫາລື ແລະ ຮ່ວມກັນແກ້ໄຂບັນຫາຕົວຈິງຕາມແນວຊາຍແດນ. ການຮ່ວມມືນີ້ ໄດ້ປະກອບສ່ວນໃຫ້ການແກ້ໄຂຄະດີຂ້າມຊາດ, ການຮ່ວມມືທາງອາຍາ ແລະ ການຕ້ານອາຊະຍາກຳຕາມແນວຊາຍແດນ ດຳເນີນໄປຢ່າງວ່ອງໄວ, ຖືກຕ້ອງ ແລະ ມີປະສິດທິຜົນ.(ຂ່າວ:ອອປສ)
ຄໍາເຫັນ