ລາວ-ກຳປູເຈຍ ເພີ່ມທະວີການຮ່ວມມືດ້ານການຄ້າ

ລັດຖະມົນຕີກະຊວງອຸດສາຫະກຳ ແລະ ການຄ້າ, ທ່ານ ນາງ ຈອມ ນິມົນ ລັດຖະມົນຕີກະຊວງການຄ້າ ກຳປູເຈຍ, ມີບັນດາຜູ້ຕາງໜ້າຈາກຂະແໜງການກ່ຽວຂ້ອງ ຂອງທັງສອງຝ່າຍເຂົ້າຮ່ວມ.

ກອງປະຊຸມຄັ້ງນີ້, ທັງສອງປະເທດ ລາວ ແລະ ກຳປູເຈຍ ໄດ້ທົບທວນຄືນຜົນຂອງການຈັດຕັ້ງປະຕິບັດບັນດາໜ້າວຽກ ທີ່ໄດ້ວາງແຜນຮ່ວມກັນໃນກອງປະຊຸມ JTC ຄັ້ງທີ 1 ຜ່ານມາ ແລະ ໄດ້ຮ່ວມກັນປຶກສາຫາລື, ແລກປ່ຽນແນວຄວາມຄິດຕໍ່ທິດທາງ ໃນການຮ່ວມມືດ້ານການຄ້າຂອງສອງປະເທດໃນຕໍ່ໜ້າ. ພ້ອມນີ້, ຍັງໄດ້ຕົກລົງບັນຫາສຳຄັນທີ່ຕິດພັນກັບການພັດທະນາ, ສົ່ງເສີມການຄ້າ ແລະ ຂົງເຂດອື່ນໆ ທີ່ສະໜັບສະໜູນໃຫ້ມີການຂະຫຍາຍຕົວເພີ່ມຂຶ້ນ ແລະ ປືກສາຫາລືກ່ຽວກັບຂົງເຂດການຮ່ວມມືທີ່ສຳຄັນ ເປັນຕົ້ນ ເປົ້າໝາຍເພີ່ມມູນຄ່າການຄ້າສອງຝ່າຍ ແຕ່ນີ້ຮອດປີ 2030, ການຮ່ວມມືເຂດການຄ້າເສລີ, ການພັດທະນາຕະຫຼາດຊາຍແດນ, ສັນຍາວ່າດ້ວຍການຄ້າຊາຍແດນ ແລະ ສັນຍາວ່າດ້ວຍສິນຄ້າຜ່ານແດນ ລວມເຖິງການສ້າງກົນໄກການຮ່ວມມື ໂດຍຜ່ານກອງປະຊຸມປະຈຳປີ ຂອງອົງການປົກຄອງແຂວງ, ຊາຍແດນ ແລະ ຂະແໜງອຸດສາຫະກຳ-ການຄ້າ, ການວາງສະແດງສິນຄ້າ, ຕະຫຼາດນັດ ສົ່ງເສີມພາກທຸລະກິດ ແລະ ການລົງທຶນ ການທ່ອງທ່ຽວ, ການຂົນສົ່ງ ແລະ ການຮ່ວມມືຂອງສະພາການຄ້າ ແລະ ອຸດສາຫະກຳ ຂອງລາວ ແລະ ກຳປູເຈຍ.

ສປປ ລາວ ເຫັນດີເປັນຢ່າງຍິ່ງ ເພື່ອຊຸກຍູ້ການຮ່ວມມືສອງຝ່າຍໃນທຸກຂົງເຂດ ແລະ ສືບຕໍ່ແກ້ໄຂສິ່ງທ້າທາຍຮ່ວມກັນ, ກຳນົດກາລະໂອກາດໃນຕໍ່ໜ້າ ເພື່ອເພີ່ມທະວີການຮ່ວມມືດ້ານເສດຖະກິດ ແລະ ການຄ້າ ຂອງສອງປະເທດໃຫ້ນັບມື້ນັບເຂັ້ມແຂງ ແລະ ຂະຫຍາຍຕົວຂຶ້ນໄປເລື້ອຍໆ.

(ຂໍ້ມູນ-ພາບ: ວຽງຈັນໃໝ່)