 |
ໃນພິທີ, ໃຫ້ກຽດເຂົ້າຮ່ວມເປັນປະທານຝ່າຍລາວ ໂດຍ ທ່ານ ນາງ ດາລາວອນ ກິດຕິພັນ ຮອງລັດຖະມົນຕີກະຊວງສຶກສາທິການ ແລະ ກິລາ, ທ່ານ ຄໍາຫຼ້າ ລຽນປະດິດ ຮອງເລຂາຄະນະບໍລິຫານງານພັກແຂວງຫຼວງພະບາງ, ທ່ານ ນາງ ວຽນວິໄລ ດີລະພັນ ຮອງປະທານຄະນະກໍາມະການປົກຄອງ ແຂວງຫຼວງພະບາງ, ທ່ານ ນາງ ແສງເດືອນ ໄຊຍະສອນ ຮອງປະທານຜູ້ປະຈໍາການ ຄະນະກໍາມະການຮ່ວມມື ລາວ-ຈີນ, ຝ່າຍຈີນ ໂດຍ ທ່ານ ນາງ ຫຼີຊີເຈີ່ນ ທີ່ປຶກສາດ້ານເສດຖະກິດ ສະຖານເອກອັກຄະລັດຖະທູດ ສປ ຈີນ ປະຈຳ ສປປ ລາວ, ທ່ານ ນາງ ຈ່າງ ເຮີ້ຈູນ ຮັກສາການຫົວໜ້າກົງສູນໃຫຍ່ ສປ ຈີນ ປະຈໍາ ພາກເໜືອ ແຂວງຫຼວງພະບາງ, ທ່ານ ຈ້າວ ຫູ ຜູ້ອໍານວຍການໃຫຍ່ ແລະ ຮອງເລຂາຄະນະພັກ ສາຂາທຽນຈິນ ຂອງກຸ່ມບໍລິສັດ ຈົງເທບ ຈ້ຽນກົງ, ພ້ອມດ້ວຍຄະນະທັງສອງຝ່າຍ ແລະ ຫົວໜ້າພະແນກສຶກສາທິການ ແລະ ກິລາແຂວງ ຫຼວງພະບາງ ຕະຫຼອດຮອດການນຳຂັ້ນຕ່າງໆ, ຕົວແທນຈາກ ກຸ່ມບໍລິສັດ ຈົງເທບ ຈ້ຽນກົງ ເຊິ່ງເປັນບໍລິສັດຮັບເໝົາກໍ່ສ້າງ ພ້ອມດ້ວຍຄູ-ອາຈານ ແລະ ນັກຮຽນເຂົ້າຮ່ວມຢ່າງພ້ອມພຽງ.
ໃນພິທີ, ທ່ານ ສຸລິເດດ ແກ້ວບົວລະເພັດ ຫົວໜ້າພະແນກສຶກສາທິການ ແລະ ກິລາແຂວງຫຼວງພະບາງ ໄດ້ລາຍງານໃຫ້ຮູ້ວ່າ: ໂຮງຮຽນ ມັດທະຍົມສົມບູນ ສັນຕິພາບ ສ້າງຕັ້ງຂຶ້ນແຕ່ປີ 1960 ຊຶ່ງມີປະຫວັດຍາວນານ ແຕ່ປັດຈຸບັນສະພາບອາຄານແມ່ນໄດ້ຊຸດໂຊມລົງຫຼາຍ, ເພື່ອຕອບສະໜອງຄວາມຮຽກຮ້ອງຕ້ອງການໃນການຍົກລະດັບຄຸນນະພາບການສຶກສາ ລັດຖະບານ ສປ ຈີນ ຈຶ່ງໄດ້ມອບທຶນຊ່ວຍເຫຼືອເພື່ອນຳມາຈັດຕັ້ງປະຕິບັດໜ້າວຽກຫຼັກຄື: ການທຸບມ້າງອາຄານເກົ່າ, ການກໍ່ສ້າງອາຄານໃໝ່, ການສະໜອງອຸປະກອນການຮຽນ-ການສອນ ແລະ ການຝຶກອົບຮົມການນຳໃຊ້ອຸປະກອນໃຫ້ແກ່ຄູ-ອາຈານ. ສຳລັບພາບລວມຂອງໂຄງການກໍ່ສ້າງໃໝ່ນີ້ ແມ່ນກວມເອົາເນື້ອທີ່ປະມານ 9,417.34 ຕາແມັດ, ມີເນື້ອທີ່ອາຄານທັງໝົດ 234,000 ຕາແມັດ ຊຶ່ງປະກອບມີ ອາຄານຮຽນ 4 ຊັ້ນ ຈໍານວນ 1 ຫຼັງ, ອາຄານຮຽນ 3 ຊັ້ນ ຈໍານວນ 1 ຫຼັງ, ໂຮງຍິມ (ລານກິລາ/ເດີ່ນໃນຮົ່ມ) ຈຳນວນ 1 ຫຼັງ, ປະຕູໂຂງ/ປະຕູໃຫຍ່ ຈຳນວນ 1 ຫຼັງ,ອາຄານຫ້ອງເຄື່ອງຈັກ/ຫ້ອງອຸປະກອນ ຈຳນວນ 1 ຫຼັງ, ເນື້ອໃນການກໍ່ສ້າງສິ່ງອຳນວຍຄວາມສະດວກພາຍນອກອາຄານປະກອບມີ: ການປັບພຽງໜ້າດິນ ແລະ ສ້ອມແປງ ເດີ່ນເຕະບານ7 ຄົນ ກາງແຈ້ງ ແລະ ເດີ່ນບານບ້ວງກາງແຈ້ງ, ການກໍ່ສ້າງເສັ້ນທາງໃໝ່, ຝາປ້ອງກັນດິນເຈື່ອນ (ກຳແພງກັນດິນ) ພາຍນອກ, ການປູພື້ນລານກາງແຈ້ງ, ພ້ອມທັງລະບົບພູມສັນຖານເທດສະບານ (ພູມສັນຖານຕົວເມືອງ) ແລະ ສິ່ງອຳນວຍຄວາມສະດວກອື່ນໆ. ໂຄງການນີ້ ຈະໃຊ້ໄລຍະເວລາການກໍ່ສ້າງ 14 ເດືອນ ໂດຍການຮັບເໝົາກໍ່ສ້າງຂອງ ກຸ່ມບໍລິສັດ ຈົງເທບ ຈ້ຽນກົງ ຈໍາກັດ.
ໂອກາດນີ້, ທ່ານ ນາງ ດາລາວອນ ກິດຕິພັນ ໄດ້ກ່າວສະແດງຄວາມຂອບໃຈຕໍ່ພັກ-ລັດ ແລະ ປະຊາຊົນຈີນ ທີ່ໃຫ້ການຊ່ວຍເຫຼືອ ພ້ອມທັງເນັ້ນໜັກວ່າ: ໂຄງການນີ້ບໍ່ແມ່ນພຽງແຕ່ການກໍ່ສ້າງດ້ານວັດຖຸອາຄານເທົ່ານັ້ນ, ແຕ່ມັນແມ່ນໝາກຜົນອັນຈົບງາມຂອງສາຍພົວພັນມິດຕະພາບອັນເປັນມູນເຊື້ອ, ການເປັນຄູ່ຮ່ວມມືຍຸດທະສາດຮອບດ້ານໝັ້ນຄົງຍາວນານ ຕາມທິດ 4 ດີ ແລະ ການຮ່ວມມືເປັນຄູ່ຮ່ວມຊະຕາກໍາ ລາວ-ຈີນ ຈີນ-ລາວ ຢ່າງແທ້ຈິງ. ທຶນຊ່ວຍເຫຼືອຄັ້ງນີ້ ຈະເປັນທຶນຮອນອັນມະຫາສານໃນການຫັນປ່ຽນໂສມໜ້າ ແລະ ຍົກລະດັບພື້ນຖານໂຄງລ່າງຂອງ ມສ ສັນຕິພາບ ໃຫ້ມີຄວາມທັນສະໄໝ, ປອດໄພ ແລະ ເອື້ອອໍານວຍຄວາມສະດວກໃຫ້ແກ່ການຮຽນ-ການສອນໄດ້ຢ່າງເຕັມຮູບແບບ.
ຂະນະດຽວກັນ, ທ່ານ ນາງ ຫຼີຊີເຈີ່ນ ກໍໄດ້ກ່າວວ່າ: ໂຄງການຊ່ວຍເຫຼືອຄັ້ງນີ້ ແມ່ນຈັດຕັ້ງປະຕິບັດຕາມ ແຜນປະຕິບັດງານວ່າດ້ວຍການສ້າງຄູ່ຮ່ວມຊະຕາກໍາ ຈີນ-ລາວ ລາວ-ຈີນ (2024-2028) ແລະ ເປັນບາດກ້າວສຳຄັນຂອງ ໂຄງການກໍ່ສ້າງໂຮງຮຽນ 10 ແຫ່ງ ທີ່ຈີນຊ່ວຍເຫຼືອລາວ. ຝ່າຍຈີນຈະໃຫ້ການສະ
ໜັບສະໜູນຢ່າງເຕັມທີ່ເພື່ອຊຸກຍູ້ການກໍ່ສ້າງ ແລະ ຫວັງຢ່າງຍິ່ງວ່າຈະໄດ້ຮ່ວມມືກັບຝ່າຍລາວຢ່າງໃກ້ຊິດ ເພື່ອຮ່ວມກັນສ້າງໂຄງການດັ່ງກ່າວໃຫ້ກາຍເປັນອະນຸສາວະລີແຫ່ງຍຸກສະໄໝ ທີ່ສະແດງໃຫ້ເຫັນເຖິງໝາກຜົນຂອງການສ້າງຄູ່ຮ່ວມຊະຕາກຳ ຈີນ-ລາວ ຢ່າງມີຊີວິດຊີວາ.
ໃນຕອນທ້າຍຂອງພິທີ, ຄະນະປະທານ ພ້ອມດ້ວຍຄະນະນຳຂັ້ນຕ່າງໆ ແລະ ແຂກທີ່ຖືກເຊີນທຸກພາກສ່ວນ ກໍໄດ້ຮ່ວມກັນຖ່າຍຮູບລວມ ແລະ ຊວ້ານດິນ ເພື່ອວາງສີລາລຶກເປີດໂຄງການຍົກລະດັບ ແລະ ປັບປຸງກໍ່ສ້າງອາຄານຮຽນ ມສ ສັນຕິພາບ ຢ່າງເປັນທາງການ.ພາບ-ຂ່າວ: ທະນູສິນ ອິດທິພົນ
ຄໍາເຫັນ