 |
ການຢ້ຽມຢາມຄັ້ງນີ້, ມີຄວາມໝາຍເປັນສັນຍາລັກອັນເລິກເຊິ່ງ ເພາະເປັນການເດີນທາງຢ້ຽມຢາມຕ່າງ ປະເທດຄັ້ງທໍາອິດ ຂອງສະຫາຍ ໂຕເລິມ ພາຍຫຼັງໄດ້ຮັບເລືອກຕັ້ງໃຫ້ດໍາລົງຕໍາແໜ່ງເລຂາທິການໃຫຍ່ອີກວາລະໜຶ່ງ, ການມາຢ້ຽມຢາມ ສປປ ລາວ ແມ່ນປະເທດທໍາອິດ ທີ່ຖືກເລືອກໃຫ້ເດີນທາງມາຢ້ຽມຢາມໃນລະດັບລັດຖະ ບານ. ຕາມປະເພນີທີ່ເປັນມູນເຊື້ອດ້ານການທູດຂອງບັນດາພັກກໍາອໍານາດ, ການເລືອກຈຸດໝາຍປາຍທາງທໍາອິດ ຊຶ່ງສະທ້ອນໃຫ້ເຫັນຢ່າງຊັດເຈນ ເຖິງລໍາດັບຄວາມສໍາຄັນທາງຍຸດທະສາດໃນວຽກງານການຕ່າງປະເທດ. ທັງແມ່ນເຫດການ ການເມືອງທີ່ເຂັ້ມແຂງ, ຢັ້ງຢືນໃຫ້ເຫັນວ່າ: ສປປ ລາວ ສືບຕໍ່ເຖິງຈຸດພິເສດ ແລະ ມີຄວາມໝາຍທາງຍຸດທະສາດ ໃນຈິນຕະນາການ ການຕ່າງປະເທດຂອງຫວຽດນາມ. ການຢ້ຽມຢາມຄັ້ງນີ້, ດໍາເນີນໄປໃນສະພາບການທີ່ສອງປະເທດ ລາວ ແລະ ຫວຽດນາມ ຫາກໍໄດ້ຈັດກອງປະຊຸມໃຫຍ່ຂອງພັກ ສໍາເລັດຜົນ ແລະ ກໍານົດບັນດາທິດທາງໃຫຍ່ ສໍາລັບການພັດທະນາປະເທດໃນໄລຍະໃໝ່. ນີ້ແມ່ນຈຸດເວລາທີ່ມີຄວາມໝາຍພິເສດ ເພື່ອໃຫ້ສອງພັກກໍາອໍານາດ ເພີ່ມທະວີການແລກປ່ຽນຍຸດທະສາດ, ແບ່ງປັນປະສົບການນໍາພາ, ບໍລິຫານການພັດທະນາ ແລະ ການກໍ່ສ້າງພັກໃນເງື່ອນໄຂໃໝ່, ພ້ອມທັງເປັນເອກະພາບບັນດາກໍານົດແນວທາງໄລຍະຍາວ ເພື່ອເຮັດໃຫ້ ການພົວພັນສອງຝ່າຍ ມີຄວາມເລິກເຊິ່ງຂຶ້ນເລື້ອຍໆ.
 |
ໃນການວາງພວງມາລາ ຄັ້ງນີ້, ກໍເພື່ອເປັນການສະແດງຄວາມເຄົາລົບຮັກ, ກະຕັນຍູ, ຮູ້ບຸນຄຸນ ເຖິງຜົນງານ, ຄຸນງາມຄວາມດີ, ນໍ້າໃຈຕໍ່ສູ້ອັນພິລະອາດຫານ ບໍ່ຍອມຈໍານົນຂອງບັນພະບູລຸດລາວ ກໍຄືບັນດານັກຮົບປະຕິວັດທີ່ເສຍສະຫຼະຊີວິດ, ເລືອດເນື້ອ ເພື່ອພາລະກິດປະຕິວັດຢ່າງອົງອາດກ້າຫານ ພາຍໃຕ້ການນໍາພາຂອງພັກປະຊາຊົນປະຕິວັດລາວ ຈົນສາມາດຍາດໄດ້ໄຊຊະນະຢ່າງມີໄຊ, ປະກາດເອກະລາດໄດ້ຢ່າງສົມບູນ ແລະ ສະຖາປະນາເປັນ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນຢ່າງສະຫງ່າຜ່າເຜີຍໃນວັນທີ 2 ທັນວາ 1975 ແລະ ສືບຕໍ່ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຈົນເຖິງປັດຈຸບັນ.
 |
(ຂ່າວ: ແສງຈັນ)
ຄໍາເຫັນ