 |
ອັນພົ້ນເດັ່ນ ແມ່ນການຈັດຕັ້ງປະຕິບັດໂຄງການຮ່ວມມື ໃນການວາງແຜນ ແລະ ອອກແບບ ກະສິກໍາ ຢູ່ ແຂວງຊຽງຂວາງ, ແຂວງຫົວພັນ ແລະ ກໍາລັງສືບຕໍ່ຢູ່ແຂວງໄຊສົມບູນ. ພ້ອມນັ້ນ, ທ່ານ ຮອງນາຍົກລັດຖະມົນຕີ ສສ ຫວຽດນາມ ກໍໄດ້ເນັ້ນເຖິງຄວາມສຳຄັນ ຂອງການຮ່ວມມືມິດຕະພາບ ອັນເປັນພິເສດ ຂອງ ລາວ-ຫວຽດນາມ ໂດຍສະພາະ ໃນຂົງເຂດ ກະສິກຳ ແລະ ສິ່ງແວດລ້ອມ ແລະ ພ້ອມສະໜັບສະໜູນ ແລະ ຊຸກຍູ້ສົ່ງເສີມການຮ່ວມມືດັ່ງກ່າວ ໂດຍສະເພາະ ການຊຸກຍູ້ສົ່ງເສີມ ຫົວໜ່ວຍທຸລະກິດກະສິກຳ ຂອງ ສສ ຫວຽດນາມ ທີ່ມາລົງທຶນ ຢູ່ ສປປ ລາວ ໃຫ້ເກີດດອກອອກຜົນ ແລະ ມີຜົນສຳເລັດ ຢ່າງເປັນຮູບປະທຳ.
 |
ນອກຈາກນັ້ນ, ທ່ານລັດຖະມົນຕີ ແລະ ຄະນະ ໄດ້ພົບປະກັບ ລັດຖະມົນຕີກະຊວງການເງິນ ສສ ຫວຽດນາມ ພ້ອມຄະນະ ເພື່ອປຶກສາຫາລື ກ່ຽວກັບ ການເສີມຂະຫຍາຍການຮ່ວມມື ແລະ ການລົງທຶນດ້ານກະສິກຳ ລາວ-ຫວຽດນາມ. ປັດຈຸບັນ ວິສາຫະກິດຫວຽດນາມ ມີການລົງທຶນ ດ້ານກະສິກຳ ຢູ່ ສປປ ລາວ ຈຳນວນ 276 ໂຄງການ ດ້ວຍມູນຄ່າທຶນຈົດທະບຽນສະສົມ6.2 ຕື້ກວ່າໂດລາ ແລະ ໃນປີຜ່ານມາ ມີການລົງທຶນໃໝ່ 560 ລ້ານກວ່າ ໂດລາ, ຊຶ່ງສະແດງໃຫ້ເຫັນເຖິງ ຄວາມເຊື່ອໝັ້ນຂອງນັກລົງທຶນຫວຽດນາມ ຕໍ່ສັກກະຍະພາບຂອງ ສປປ ລາວ. ພ້ອມນີ້, ທັງສອງຝ່າຍ ເຫັນດີ ສືບຕໍ່ການຮ່ວມມືໃນຂົງເຂດກະສິກຳ ແລະ ສິ່ງແວດລ້ອມ ໂດຍສະເພາະ ການລົງທຶນຂອງພາກທຸລະກິດກະສິກຳ-ປ່າໄມ້ ຂອງ ສສ ຫວຽດນາມ ຢູ່ ສປປ ລາວ ແລະ ເຫັນດີໃຫ້ມີການແຕ່ງຕັ້ງຄະນະຕິດຕາມກວດກາການລົງທຶນ ຂອງຫົວ ໜ່ວຍທຸລະກິດ ສສ ຫວຽດນາມ ຢູ່ ສປປ ລາວ ເພື່ອໃຫ້ປະຕິບັດຢ່າງມີປະສິດທິຜົນ ແລະ ເປັນຮູບປະທຳ.
 |
ຄຽງຄູ່ກັນນັ້ນ, ຄະນະຜູ້ແທນຝ່າຍລາວ ຍັງໄດ້ພົບປະກັບພາກສ່ວນກ່ຽວຂ້ອງ ເພື່ອເສີມຂະຫຍາຍການຮ່ວມມື ໂດຍສະເພາະ ໃນຂົງເຂດການຄົ້ນຄວ້າ ດ້ານກະສິກຳ-ປ່າໄມ້ ເປັນຕົ້ນແມ່ນ ສະຖາບັນວິທະຍາສາດປ່າໄມ້, ສະຖາບັນວິທະຍາສາດກະສິກຳ ແລະ ສະຖາບັນວາງແຜນ ແລະ ອອກແບບກະສິກຳ ຂອງ ສສ ຫວຽດນາມ, ຊຶ່ງໃນນີ້ ໄດ້ເຊັນບົດບັນທຶກຄວາມເຂົ້າໃຈ ກ່ຽວກັບ ການແລກປ່ຽນທາງດ້ານວິຊາການ ແລະ ການຮ່ວມມືດ້ານວິທະຍາສາດ, ແລະ ພົບປະກັບ ກຸ່ມອຸດສາຫະກຳຢາງພາລາ; ພ້ອມທັງ ໄດ້ຢ້ຽມຢາມ ພື້ນຖານການຜະລິດ ຢູ່ ແຂວງ ນິ່ງ ບິ່ງ ເປັນຕົ້ນແມ່ນ ໂຮງງານນ້ຳໝາກໄມ້ກະປ໋ອງ Dovecoແລະ ພື້ນທີ່ການຜະລິດພືດ ສໍາລັບສະໜອງສູ່ໂຮງງານປຸງແຕ່ງ ຈໍານວນໜຶ່ງ.
ການເຄື່ອນໄຫວຄັ້ງນີ້, ບໍ່ພຽງແຕ່ເປັນການຮັດແໜ້ນສາຍພົວພັນມິດຕະພາບອັນພິເສດລາວ–ຫວຽດນາມ ເທົ່ານັ້ນ ແຕ່ຍັງເປັນການຍົກລະດັບ ການຮ່ວມມືພິເສດຢ່າງຮອບດ້ານ ໃນຂະແໜງກະສິກຳ ແລະ ສິ່ງແວດລ້ອມ ເພື່ອຮັບປະກັນດ້ານການຄ້ຳປະກັນຄວາມໝັ້ນຄົງດ້ານສະບຽງອາຫານ; ຊຸກຍູ້ສົ່ງເສີມການລົງທຶນ ແລະ ການຄ້າຂອງສອງຝ່າຍ; ການຄຸ້ມຄອງ ແລະ ອະນຸລັກຊັບພະຍາກອນທຳມະຊາດ, ນ້ຳ ແລະ ສິ່ງແວດລ້ອມ ຕາມທິດສີຂຽວ ແລະ ຍືນຍົງ ຂອງສອງປະເທດ, ສອງຂະແໜງການ ແລະ ປະຊາຊົນສອງຊາດ ອີກດ້ວຍ.
(ແຫຼ່ງຂ່າວ: ຂ່າວສານກະສິກຳ ແລະ ສິ່ງແວດລ້ອມ)
ຄໍາເຫັນ