 |
ໃນການພົບປະຢ່າງເປັນທາງການຄັ້ງນີ້, ທັງສອງຝ່າຍໄດ້ຮ່ວມກັນປຶກສາຫາລື ແລະ ທົບທວນຄືນ ບັນດາຜົນງານ ແລະ ໂຄງການສໍາຄັນ ທີ່ໄດ້ຮ່ວມມືກັນໃນໄລຍະຜ່ານມາ ລະຫວ່າງ ສປປ ລາວ ກໍຄືກະຊວງກະສິກໍາ ແລະ ສິ່ງແວດລ້ອມ ແລະ ສະຫະຣາຊະອານາຈັກ ອັງກິດ ໃນໄລຍະຜ່ານມາ ເປັນຕົ້ນແມ່ນວຽກງານ CITED ແລະ ການຕ້ານການຄ້າສັດປ່າຜິດກົດໝາຍ (IWT; ໂຄງການຄວາມຫຼາກຫຼາຍທາງດ້ານຊີວະນາໆພັນຕາມພູມມີທັດ (Biodiverse Landscape Fund-BLF); ການປົກປັກຮັກສາປ່າໄມ້ ແລະ ຊັບພະຍາກອນປ່າໄມ້ ຄຽງຄູ່ກັບການພັດທະນາແບບຍືນຍົງ; ການປ່ຽນແປງສະພາບດິນຟ້າອາກາດ; ວຽກງານການປະເມີນຜົນກະທົບຕໍ່ສິ່ງແວດລ້ອມ (EIA) ໃນວຽກງານການຂຸດຄົ້ນບໍ່ແຮ່; ການຕິດຕາມຄຸນນະພາບນໍ້າ-ການຄຸ້ມຄອງນໍ້າແບບຍືນຍົງ ທີ່ຕິດພັນກັບການພະຍາກອນອາກາດ ແລະ ເລື່ອງອາກາດເປັນພິດ (PM 2.5).
ໂອກາດນີ້, ທ່ານ ລິນຄໍາ ດວງສະຫວັນ ໄດ້ສະແດງຄວາມຂອບໃຈ ແລະ ຊົມເຊີຍ ທ່ານ ນາງ Mel Barlow ທີ່ໄດ້ເອົາໃຈໃສ່ຊຸກຍູ້ການຮ່ວມມືຂອງສອງປະເທດ ກໍຄືການຮ່ວມມືກັບຂະແໜງກະສິກໍາ ແລະ ສິ່ງແວດລ້ອມຢ່າງຕັ້ງໜ້າ. ອັນພົ້ນເດັ່ນແມ່ນການຈັດຕັ້ງປະຕິບັດໂຄງການ Fleming Fund ກ່ຽວກັບພະຍາດຈາກສັດສູ່ຄົນ (ງົບປະມານ 5.5 ລ້ານໂດລາ ປະຕິບັດໂດຍກົມລ້ຽງສັດ ແລະ ການປະມົງ), ໂຄງການ WCS, ໂຄງການນໍ້າແອດພູເລີຍ ຜ່ານ UNDP ລວມທັງ ການສະເໜີປັບປຸງສູນປ້ອງກັນພືດສາລາຄໍາ ທີ່ລັດຖະບານອັງກິດເຄີຍໃຫ້ການຊ່ວຍເຫຼືອ ຕັ້ງແຕ່ປີ 1972. ນອກຈາກນີ້, ທ່ານລັດຖະມົນຕີ ໄດ້ສະເໜີໃຫ້ລັດຖະບານອັງກິດ ຊ່ວຍສືບຕໍ່ສະໜັບສະໜູນດ້ານງົບປະມານ ແລະ ຫັນເປັນໂຄງການລະອຽດ ເພື່ອສ້າງຄວາມເຂັ້ມແຂງໃຫ້ແກ່ວຽກງານ CITED, ການພັດທະນາບຸກຄະລາກອນ, ການຄຸ້ມຄອງສັດປ່າ ແລະ ການບັງຄັບໃຊ້ກົດໝາຍທົ່ວປະເທດ; ສະເໜີໃຫ້ສືບຕໍ່ສ້າງກົນໄກ ແລະ ຂົງເຂດການຮ່ວມມືໃຫ້ແໜ້ນແຟ້ນຍິ່ງຂຶ້ນ ເພື່ອຍາດແຍ່ງການຊ່ວຍເຫຼືອເພີ່ມເຕີມໃນອະນາຄົດ.
ໃນຕອນທ້າຍ, ທ່ານ ລິນຄໍາ ດວງສະຫວັນ ກໍໄດ້ສະແດງຄວາມຂອບໃຈ ຕໍ່ ທ່ານ ນາງ Mel Barlow ພ້ອມດ້ວຍຄະນະ ທີ່ໄດ້ອຸທິດເຫື່ອແຮງເຂົ້າໃນການຊຸກຍູ້ສົ່ງເສີມ ແລະ ໂຄງການຊ່ວຍເຫຼືອຕ່າງໆໃຫ້ຂະແໜງກະສິກໍາ ແລະ ສິ່ງແວດລ້ອມ ຕະຫຼອດໄລຍະການດຳລົງຕຳແໜ່ງ, ພ້ອມທັງໄດ້ອວຍພອນໃຫ້ ທ່ານເອກອັກຄະລັດຖະທູດ ພ້ອມຄະນະ ຈົ່ງມີສຸຂະພາບແຂງແຮງ, ມີຄວາມສຸກ ແລະ ປະສົບຜົນສຳເລັດໃນການປະຕິບັດໜ້າທີ່ວຽກງານໃໝ່ໃນອະນາຄົດ.
(ແຫຼ່ງຂ່າວ: ຂ່າວສານກະສິກຳ ແລະ ສິ່ງແວດລ້ອມ)
ຄໍາເຫັນ