ລມຕ ຕ່າງປະເທດ ລາວ-ການາດາ ພົບປະສອງຝ່າຍ ເພື່ອເສີມຂະຫຍາຍສາຍພົວພັນ ແລະ ການຮ່ວມມື

ການພົບປະໄດ້ດຳເນີນໄປໃນບັນຍາກາດອັນອົບອຸ່ນ, ເຕັມໄປດ້ວຍໄມຕີຈິດ ແລະ ມິດຕະພາບ. ທັງສອງຝ່າຍໄດ້ຕີລາຄາສູງຕໍ່ສາຍພົວພັນ ແລະ ການຮ່ວມມື ອັນຍາວນານກວ່າ 52 ປີ (15 ມິຖຸນາ 1974 - 2026), ຊຶ່ງໄດ້ຮັບການເພີ່ມພູນຄູນສ້າງຢ່າງຕໍ່ເນື່ອງ ຈົນປະກົດຜົນເປັນຮູບປະທຳ ທັງໃນຂອບການຮ່ວມມືສອງຝ່າຍ ແລະ ຫຼາຍຝ່າຍ.

ໃນໂອກາດນີ້, ທັງສອງຝ່າຍໄດ້ຮ່ວມກັນກຳນົດທິດທາງການຮ່ວມມືໃນຕໍ່ໜ້າ ເພື່ອຍົກລະດັບສາຍພົວພັນໃຫ້ມີຄວາມແໜ້ນແຟ້ນ ແລະ ມີປະສິດທິຜົນຍິ່ງຂຶ້ນ, ໂດຍສະເພາະການຊຸກຍູ້ການຮ່ວມມືດ້ານການຄ້າ-ການລົງທຶນ ເພື່ອໃຫ້ຂະຫຍາຍຕົວສອດຄ່ອງກັບຄວາມກ້າວໜ້າດ້ານການເມືອງ. ພ້ອມກັນນັ້ນ, ເພື່ອເປັນການຕັ້ງໜ້າຜັນຂະຫຍາຍການຮ່ວມມືໃຫ້ເປັນຮູບປະທຳ, ທັງສອງຝ່າຍໄດ້ເຫັນດີເປັນເອກະພາບໃນການຊຸກຍູ້ໃຫ້ມີການຈັດກອງປະຊຸມປຶກສາຫາລືດ້ານການເມືອງ ລະດັບຫົວໜ້າກົມ ລະຫວ່າງ ສອງກະຊວງການຕ່າງປະເທດ ລາວ-ການາດາ ຄັ້ງທີ 5 ໃນໄວໆນີ້.

ໃນຕອນທ້າຍ, ລັດຖະມົນຕີທັງສອງທ່ານ ຍັງໄດ້ແລກປ່ຽນທັດສະນະ ແລະ ຄວາມຄິດເຫັນຢ່າງກົງໄປກົງມາ ກ່ຽວກັບສະພາບການພົ້ນເດັ່ນ ໃນພາກພື້ນ ແລະ ສາກົນ ທີ່ສອງຝ່າຍໃຫ້ຄວາມສົນໃຈຮ່ວມກັນ.

(ຂ່າວ: ກຕທ)