ມອບ-ຮັບປະທານກອງປະຊຸມລັດຖະມົນຕີອາຊຽນ ວ່າດ້ວຍບັນຫາຢາເສບຕິດ

ທ່ານ ພັນເອກ ຈັນທອນ ເຮືອງຄໍາໄຊ ກ່າວວ່າ: ສປປ ລາວ ໄດ້ເປັນເຈົ້າພາບຈັດກອງປະຊຸມລັດຖະມົນຕີອາຊຽນ ວ່າດ້ວຍບັນຫາຢາເສບຕິດ ແລະ ກອງປະຊຸມປິ່ນອ້ອມທີ່ກ່ຽວຂ້ອງ ຄັ້ງທີ 8 ຜ່ານມາໃນປີ 2023 ແລະ ໃນຄັ້ງທີ 9 ແມ່ນປະເທດຟີລິບປິນຈະເປັນເຈົ້າພາບຈັດກອງປະຊຸມດັ່ງກ່າວ. ສປປ ລາວ ມີຄວາມຍິນດີ ແລະພາກພູມໃຈທີ່ໄດ້ຮັບກຽດເປັນເຈົ້າພາບ ແລະ ປະທານກອງປະຊຸມລັດຖະມົນຕີອາຊຽນ ວ່າດ້ວຍບັນຫາຢາເສບຕິດ ແລະ ກອງປະຊຸມປິ່ນອ້ອມທີ່ກ່ຽວຂ້ອງ (AMMD) ຊຶ່ງຜ່ານມາໄດ້ມີການປຶກສາຫາລື ແລະ ບັນລຸຈຸດປະສົງຕາມຄາດໝາຍທີ່ໄດ້ວາງໄວ້ ໂດຍມີເປົ້າໝາຍເພື່ອເພີ່ມທະວີ ແລະ ປ້ອງກັນບັນຫາຢາເສບຕິດ ໃນບັນດາປະເທດສະ ມາຊິກອາຊຽນ. ຄວາມພະຍາຍາມເຫຼົ່ານີ້ມີຄວາມສຳຄັນຕໍ່ການສ້າງປະຊາຄົມອາຊຽນເຂັ້ມແຂງ ເຮັດໃຫ້ເກີດເປັນຮູບປະທຳຕໍ່ປະຊາຊົນ. ໃນໄລຍະ 2 ປີຜ່ານມາ, ຫ້ອງການກວດກາ ແລະ ຄວບຄຸມຢາເສບຕິດ ກົມໃຫຍ່ຕຳ ຫຼວດ ກະຊວງ ປກສ ໄດ້ປະສານງານ ແລະ ຮ່ວມມືກັບກອງເລຂາອາຊຽນໃນການດຳເນີນກິດຈະກຳຕ່າງໆ ພາຍໃຕ້ແຜນງານອາຊຽນ ວ່າດ້ວຍການສ້າງປະຊາຄົມອາຊຽນຕ້ານຢາເສບຕິດປີ 2016-2025, ຊຶ່ງແບ່ງອອກເປັນ 7 ພາກສ່ວນຄື: ວຽກງານທົ່ວໄປ, ວຽກງານສຶກສາປ້ອງກັນຢາເສບຕິດ, ວຽກງານປະຕິບັດມາດຕະການກົດໝາຍ, ວຽກງານບຳບັດ, ປິ່ນປົວ ແລະ ຟື້ນຟູສຸຂະພາບຜູ້ຕິດຢາເສບຕິດ, ວຽກງານວິໄຈຢາເສບຕິດ, ວຽກງານພັດທະນາທາງເລືອກການປູກພືດທົດແທນການປູກຝິ່ນ ແລະ ວຽກງານຮ່ວມມື. ນອກຈາກຄວາມພະຍາຍາມໃນການໃຊ້ມາດຕະການດ້ານຕ່າງໆ ເພື່ອກວດກາ, ຄວບຄຸມ, ສະກັດກັ້ນ ແລະ ຕ້ານການລັກລອບຄ້າຂາຍຢາເສບຕິດຢູ່ພາຍໃນປະເທດແລ້ວ. ສປປ ລາວ ຍັງໄດ້ເພີ່ມທະວີການຮ່ວມມືກັບບັນດາປະເທດສະມາຊິກອາຊຽນ ແລະ ບັນດາປະເທດຄູ່ຮ່ວມມືພັດທະນາ ເພື່ອແກ້ໄຂບັນຫາຢາເສບຕິດ ແລະ ເພີ່ມປະສິດທິພາບຂອງວຽກງານກວດກາຄວບຄຸມ ແລະ ສະກັດກັ້ນຕ້ານຢາເສບຕິດ ແນໃສ່ປະກອບສ່ວນສ້າງອາຊຽນປອດຢາເສບຕິດ.

ໃນພິທີໄດ້ມອບ-ຮັບປະທານກອງປະຊຸມລັດຖະມົນຕີອາຊຽນ ວ່າດ້ວຍບັນຫາຢາເສບຕິດ ຄັ້ງທີ 9 ໃຫ້ປະເທດຟີລິບປິນ, ມອບໂດຍທ່ານ ພັນເອກ ຈັນທອນ ເຮືອງຄໍາໄຊ ຫົວໜ້າຫ້ອງການກວດກາ ແລະ ຄວບຄຸມຢາເສບຕິດ ຫົວໜ້າເຈົ້າໜ້າທີ່ອາວຸໂສ ສປປ ລາວ ແລະ ຮັບໂດຍທ່ານ ເອີລ໌ ພີສະເວດຣາ ຮັກສາການເຈົ້າໜ້າທີ່ອາວຸໂສປະເທດຟີລິບປິ່ນ.

ຂ່າວ: ປກສ