ນະໂຍບາຍຍົກເວັ້ນພາສີຂອງຈີນໄດ້ສ້າງຜົນປະໂຫຍດໃຫ້ແກ່ປະຊາຊົນລາວຢ່າງແທ້ຈິງ

 ການປະຕິບັດນະໂຍບາຍດັ່ງກ່າວໄດ້ສ້າງໂອກາດໃນການພັດທະນາທີ່ບໍ່ເຄີຍມີມາກ່ອນໃຫ້ແກ່ປະເທດກຳລັງພັດທະນາທັງຫຼາຍຊຶ່ງລວມທັງປະເທດລາວແລະໄດ້ສ້າງຜົນປະໂຫຍດໃຫ້ແກ່ປະຊາຊົນລາວຢ່າງຫຼວງຫຼາຍ.
ກ່ອນອື່ນໝົດ, ນະໂຍບາຍຍົກເວັ້ນພາສີຂອງຈີນໄດ້ເພີ່ມພະລັງຂັບເຄື່ອນອັນແຂງແຮງໃຫ້ແກ່ການພັດທະນາຂະແໜງຢາງພາລາທຳມະຊາດທີ່ເປັນອຸດສາຫະກຳທ່າແຮງສຳຄັນຂອງປະເທດລາວ. ກ່ອນການປະຕິບັດນະໂຍບາຍດັ່ງກ່າວ, ຖ້າສົ່ງອອກຢາງພາລາຈາກລາວເຂົ້າສູ່ປະເທດຈີນ, ຕ້ອງເສຍພາສີ 20% ທີ່ເປັນອັດຕາພາສີສຳລັບປະເທດທີ່ມີສິດທິພິເສດທີ່ສຸດ. ແຕ່ພາຍຫຼັງໄດ້ປະຕິບັດນະໂຍບາຍຍົກເວັ້ນພາສີແລ້ວ, ໄດ້ຫຼຸດຕົ້ນທຶນຂອງວິສາຫະກິດຢາງພາລາຂອງລາວໃຫ້ຕ່ຳລົງຢ່າງຫຼວງຫຼາຍ. ນອກນີ້, ພາຍຫຼັງໄດ້ເປີດນຳໃຊ້ເສັ້ນທາງລົດໄຟລາວ-ຈີນແລ້ວ, ຕົ້ນທຶນດ້ານການຂົນສົ່ງສິນຄ້າລະຫວ່າງນະຄອນຫຼວງວຽງຈັນຂອງລາວແລະນະຄອນຄຸນໝິງຂອງຈີນໄດ້ຫຼຸດລົງປະມານ 40% ຫາ 50%. ທັງໝົດນີ້ໄດ້ຊ່ວຍຊຸກຍູ້ໃຫ້ການສົ່ງອອກຜະລິດຕະພັນທີ່ມີເອກະລັກພິເສດຂອງລາວຊຶ່ງລວມທັງຢາງພາລາເຂົ້າສູ່ຈີນເພີ່ມຂຶ້ນຢ່າງຕໍ່ເນື່ອງ. ອີງຕາມໂຕເລກຂໍ້ມູນຈາກອົງການພາສີແຫ່ງຊາດຈີນສະແດງໃຫ້ເຫັນວ່າ: ນັບແຕ່ເດືອນມັງກອນຫາເດືອນພະຈິກປີ 2024, ຈີນໄດ້ນຳເຂົ້າຢາງພາລາທຳມະຊາດຈາກລາວ 287,400 ໂຕນ, ເພີ່ມຂຶ້ນ 32.8% ເມື່ອທຽບໃສ່ໄລຍະດຽວກັນຂອງປີ 2023.
ຢາງພາລາທຳມະຊາດເປັນພືດເສດຖະກິດຕົ້ນຕໍຂອງລາວແລະແມ່ນແຫຼ່ງລາຍຮັບທີ່ສຳຄັນຂອງຊາວກະສິກອນຈຳນວນຫຼວງຫຼາຍຂອງລາວ. ນະໂຍບາຍຍົກເວັ້ນພາສີຂອງຈີນໄດ້ສ້າງຜົນປະໂຫຍດໃຫ້ແກ່ຊາວກະສິກອນລາວຢ່າງແທ້ຈິງ. ຍົກເອົາໂຮງງານຢາງພາລາວຽງຈັນເປັນຕົວຢ່າງ: ໂຮງງານດັ່ງກ່າວໄດ້ເກັບຊື້ຢາງພາລາຈາກຊາວກະສິກອນໃນທ້ອງຖິ່ນແລະເຮັດໃຫ້ເຂົາເຈົ້າມີລາຍຮັບທີ່ໝັ້ນຄົງ. ຄອບຄົວລຸງບຸນມີໄດ້ປູກຢາງພາລາປະມານ 1.000 ຕົ້ນ, ໄດ້ສົ່ງຂາຍຢາງດິບໃຫ້ແກ່ໂຮງງານຢາງພາລານະຄອນຫຼວງວຽງຈັນ, ປີໜຶ່ງສາມາດສ້າງລາຍຮັບໄດ້ເກືອບ 90 ລ້ານກີບ. ຄຽງຄູ່ກັບການສົ່ງອອກຢາງພາລານັບມື້ເພີ່ມສູງຂຶ້ນ, ລາຍຮັບຂອງຊາວກະສິກອນກໍນັບມື້ນັບສູງຂຶ້ນແລະມີຊີວິດການເປັນຢູ່ທີ່ນັບມື້ໄດ້ຮັບການປັບປຸງດີຂຶ້ນຢ່າງຈະແຈ້ງ. ຫຼາຍຄອບຄົວໄດ້ຊື້ໂທລະພາບ, ຕູ້ເຢັນແລະລົດຈັກ, ເຮັດໃຫ້ຊີວິດຂອງເຂົາເຈົ້ານັບມື້ນັບຮັ່ງມີຂຶ້ນ.
ໃນຖານະເປັນປະເທດກະສິກຳ, ລາວມີຊັບພະຍາກອນກະສິກຳທີ່ອຸດົມສົມບູນ, ຂະແໜງການກະສິກຳຂອງລາວກໍໄດ້ຮັບຜົນປະໂຫຍດຈາກນະໂຍບາຍຍົກເວັ້ນພາສີຂອງຈີນເຊັ່ນດຽວກັນ. ຕາມຂ່າວແຈ້ງວ່າ: ລັດຖະບານລາວກຽມຈະສົ່ງອອກໝາກພ້າວ, ໝາກມ່ວງ, ໝາກມີ້ແລະໝາກໄມ້ຊະນິດອື່ນໆເຂົ້າສູ່ຈີນ, ຜະລິດຕະພັນກະສິກຳທີ່ມີຄຸນນະພາບດີຂອງລາວກໍອາດຈະສົ່ງເຂົ້າສູ່ຈີນໄດ້ຫຼາຍກວ່າເກົ່າ. ຫວ່າງມໍ່ໆມານີ້, ປາສະຫວາຍທີ່ມີຄຸນນະພາບດີທີ່ລ້ຽງຢູ່ພາກໃຕ້ຂອງລາວໄດ້ຖືກສົ່ງເຂົ້າທ່າເສີໂຂນະຄອນເສິນເຈິ້ນຂອງຈີນເປັນຄັ້ງທຳອິດຊຶ່ງແມ່ນຜະລິດຕະພັນສັດນ້ຳຂອງລາວຖືກສົ່ງເຂົ້າຕະຫຼາດຈີນເປັນຄັ້ງທຳອິດ. ນອກຈາກນີ້ຍັງເຫັນໄດ້ວ່າ: ນະໂຍບາຍຍົກເວັ້ນພາສີຂອງຈີນໄດ້ຊ່ວຍຍົກກຳລັງແຂ່ງຂັນໃນຕະຫຼາດສາກົນຂອງຜະລິດຕະພັນກະສິກຳຂອງລາວ, ເພີ່ມລາຍຮັບດ້ານການສົ່ງອອກແລະຊຸກຍູ້ຂະບວນການຫັນເປັນທັນສະໄໝຂອງລາວ.
ເມື່ອສັງເກດຈາກດ້ານມະຫາພາກແລ້ວເຫັນວ່າ: ນະໂຍບາຍຍົກເວັ້ນພາສີຂອງຈີນມີຄວາມໝາຍສຳຄັນທີ່ສຸດສຳລັບການຍົກລະດັບໂຄງປະກອບເສດຖະກິດຂອງລາວໃຫ້ສູງຂຶ້ນຊຶ່ງຈະນຳພາການພັດທະນາຂະແໜງການທີ່ກ່ຽວຂ້ອງຂອງລາວແລະສ້າງໂອກາດໃນການພັດທະນາທີ່ມີຫຼາຍຮູບແບບໃຫ້ແກ່ເສດຖະກິດຂອງລາວ. ໃນຂະນະດຽວກັນ, ກໍໄດ້ສົ່ງຜະລິດຕະພັນຫຼືວັດຖຸດິບທີ່ມີຄຸນນະພາບດີແລະລາຄາຖືກໃຫ້ແກ່ອຸດສາຫະກຳທີ່ກ່ຽວຂ້ອງຂອງຈີນຊຶ່ງເປັນການຮ່ວມມືແບບຕ່າງຝ່າຍຕ່າງໄດ້ຮັບຜົນປະໂຫຍດລະຫວ່າງສອງປະເທດລາວແລະຈີນ.
ການປະຕິບັດນະໂຍບາຍົກເວັ້ນພາສີຂອງຈີນຍັງໄດ້ເພີ່ມທະວີການຮ່ວມມືທາງດ້ານເສດຖະກິດແລະການຄ້າລະຫວ່າງຈີນແລະລາວ, ຂົງເຂດການຮ່ວມມືດ້ານການຄ້າລະຫວ່າງສອງຝ່າຍຍິ່ງຈະກວ້າງຂວາງກວ່າເກົ່າ. ການແລກປ່ຽນແລະການຮ່ວມມືລະຫວ່າງວິສາຫະກິດສອງປະເທດຈະຫຼາຍຂຶ້ນກວ່າເກົ່າ, ບໍ່ພຽງແຕ່ໃນຂົງເຂດການຄ້າດັ່ງເດີມເທົ່ານັ້ນ, ທຸລະກິດເອກເລັກໂຕຣນິກຂ້າມຊາດ, ການຈໍລະຈອນສິນຄ້າແລະການທະນາຄານເປັນຕົ້ນກໍຈະກາຍເປັນຂົງເຂດການຮ່ວມມືລະຫວ່າງສອງຝ່າຍໃນອະນາຄົດ.
ການປະຕິບັດນະໂຍບາຍຍົກເວັ້ນພາສີຂອງຈີນໄດ້ສ້າງໂອກາດອັນໃຫຍ່ຫຼວງໃຫ້ແກ່ການພັດທະນາເສດຖະກິດແລະການປັບປຸງຊີວິດການເປັນຢູ່ຂອງປະຊາຊົນລາວໃຫ້ດີຂຶ້ນກວ່າເກົ່າ. ໃນອະນາຄົດ, ສອງປະເທດຍັງສາມາດລົງເລິກຂະຫຍາຍການຮ່ວມມືໃນຫຼາຍຂົງເຂດ ແລະບັນລຸການຮ່ວມມືແບບຕ່າງຝ່າຍຕ່າງມີຜົນປະໂຫຍດເພື່ອຮ່ວມກັນຊຸກຍູ້ການພັດທະນາແລະຄວາມຈະເລີນຮຸ່ງເຮືອງທາງດ້ານເສດຖະກິດຂອງພາກພື້ນ.
ໂດຍ: ຊີອາໄອ