 |
ທ່ານ ນາງ ມະນີສາຄອນ ທໍາມະວົງໄຊ ໄດ້ກ່າວວ່າ: ປະເທດຈີນມີແຫຼ່ງທ່ອງທ່ຽວຄຸນນະພາບລະດັບໂລກຈຳນວນຫຼາຍ ເປັນຈຸດໝາຍປາຍທາງທີ່ນັກທ່ອງທ່ຽວທົ່ວໂລກປາຖະໜາຢາກໄປເຖິງ ຊຶ່ງປະເທດລາວ ກໍມີທັດສະ ນີຍະພາບທາງທຳມະຊາດທີ່ສວຍງາມ ແລະ ອຸດົມສົມບູນ ພ້ອມທັງມີຊັບພະຍາກອນການທ່ອງທ່ຽວແບບທຳມະຊາດທີ່ຍັງຄົງຮັກສາຂະນົບທຳນຽມ ແລະ ວິຖີຊີວິດອັນດີງາມຂອງຊົນເຜົ່າຕ່າງໆໄວ້ໄດ້ຢ່າງຄົບຖ້ວນ. ການແລກປ່ຽນດ້ານການທ່ອງທ່ຽວລະຫວ່າງລາວ-ຈີນມີຄວາມໃກ້ຊິດກັນຫຼາຍຂຶ້ນ. ໃນປີ 2025 ນັກທ່ອງທ່ຽວຈີນໄດ້ກາຍເປັນແຫຼ່ງນັກທ່ອງທ່ຽວສາກົນອັນດັບທີ 2 ຂອງລາວ. ຫວັງວ່າງານໂຄສະນາໃນຄັ້ງນີ້, ຈະຊ່ວຍສົ່ງເສີມການແລກປ່ຽນດ້ານວັດທະນະທໍາ ແລະ ການທ່ອງທ່ຽວລະຫວ່າງສອງປະເທດໃຫ້ເພີ່ມທະວີຂຶ້ນອີກໃນອະນາຄົດ.
 |
ທ່ານ ນາງ ສາຍຊິນ ຮອງຫົວໜ້າພະແນກໂຄສະນາການທ່ອງທ່ຽວ ແລະ ການແລກປ່ຽນສາກົນ, ພະ ແນກວັດທະນະທໍາ ແລະ ການທ່ອງທ່ຽວ ເຂດປົກຄອງຕົນເອງເຜົ່າເຫວິ້ຍອູເອີ ຊິ່ນຈ່ຽງ ໄດ້ນໍາສະເໜີຢ່າງລະອຽດ ກ່ຽວກັບວັດທະນະທໍາ-ພູມສາດ, ຊັບພະຍາກອນການທ່ອງທ່ຽວ ແລະ ຄວາມພ້ອມດ້ານການຮອງຮັບນັກທ່ອງທ່ຽວຂອງຊິ່ນຈ່ຽງ. ຊິ່ນຈ່ຽງ ຈະສືບຕໍ່ໃຫ້ບໍລິການທ່ອງທ່ຽວທີ່ມີຄຸນນະພາບສູງ ຕໍ່ນັກທ່ອງທ່ຽວທັງພາຍໃນ ແລະ ຕ່າງ ປະເທດຈາກທົ່ວທຸກມຸມໂລກ ດ້ວຍສິ່ງອຳນວຍຄວາມສະດວກທີ່ຄົບວົງຈອນ.
 |
ໃນພິທີຕົວແທນ 6 ບໍລິສັດທ່ອງທ່ຽວຈາກຊິ່ນຈ່ຽງ ໄດ້ນຳສະເໜີກ່ຽວກັບເສັ້ນທາງທ່ອງທ່ຽວຄຸນນະພາບຫຼັກ ແລະ ຈຸດເດັ່ນການບໍລິການຂອງແຕ່ລະບໍລິສັດຂອງຕົນ ພ້ອມທັງສະແດງອອກເຖິງຄວາມຕັ້ງໃຈໃນການເສີມສ້າງການຮ່ວມມືກັບຫົວໜ່ວຍສະມາຊິກຕ່າງໆ ຂອງສະມາຄົມທ່ອງທ່ຽວລາວ ເພື່ອຮ່ວມກັນຜັກດັນ ແລະ ພັດທະນາອຸດສາຫະກຳການທ່ອງທ່ຽວຂອງທັງສອງຝ່າຍໃຫ້ເຕີບໂຕຍິ່ງຂຶ້ນ. ພະນັກງານຈາກບໍລິສັດການບິນ China Eastern Airlines ນະຄອນຫຼວງວຽງຈັນ ໄດ້ນໍາສະເໜີກ່ຽວກັບສະພາບການດໍາເນີນງານ ແລະ ການບໍລິການຈຸດເດັ່ນຂອງສາຍການບິນ ໂດຍເນັ້ນເປັນພິເສດໃນການບໍລິການຕໍ່ຖ້ຽວບິນທັງພາຍໃນ ແລະ ລະຫວ່າງປະເທດ, ຜູ້ຮັບຜິດຊອບກ່າວວ່າ ສາຍການບິນດັ່ງກ່າວມີການດຳເນີນຖ້ຽວບິນຈຳນວນຫຼາຍພາຍໃນປະເທດຈີນ ແລະ ລະ ຫວ່າງລາວ-ຈີນ ຊຶ່ງສາມາດສະໜອງການເດີນທາງຕໍ່ເຄື່ອງໄປຍັງຊິ່ນຈ່ຽງໄດ້ຢ່າງສະດວກ ແລະ ເປັນແຮງສະໜັບສະໜູນທີ່ສຳຄັນໃຫ້ນັກທ່ອງທ່ຽວທີ່ຕ້ອງການໄປທ່ອງທ່ຽວຊິ່ນຈ່ຽງ.
ຂ່າວ: ພູວັນ
ຄໍາເຫັນ