ນູແວນເຊລັງ ຜ່ອນຜັນກົດລະບຽບການອອກວີຊາ ເພື່ອດຶງດູດນັກລົງທຶນ

ຂ່າວຕ່າງປະເທດລາຍງານ ໃນວັນທີ 25 ມິຖຸນາ ຜ່ານມາວ່າ: ທ່ານ ມາເຊໂລ ເອບຣາດ ລັດຖະມົນຕີກະຊວງເສດຖະກິດຂອງເມັກຊິກ ກ່າວວ່າ: ເມັກຊິກ ແລະ ສະຫະລັດ ອາເມຣິກາ ໃກ້ຈະບັນລຸຂໍ້ຕົກລົງກ່ຽວກັບອັດຕາພາສີທີ່ສະຫະລັດ ອາເມຣິກາ ໄດ້ກໍານົດການນໍາເຂົ້າເຫຼັກ ແລະ ອາລູມິນຽມ.

ຂ່າວຕ່າງປະເທດລາຍງານໃນວັນທີ 25 ມິຖຸນາ ຜ່ານມາວ່າ: ອົງການສະຫະປະຊາຊາດ (UN) ກຽມຫຼຸດຈຳນວນພະນັກງານລົງ 20% ແລະ ພິຈາລະນາການປັບໂຄງສ້າງອົງການທີ່ກ່ຽວຂ້ອງຄືນ ໃໝ່ 140 ກວ່າອົງການ, ພາຍຫຼັງສະຫະລັດ ອາເມຣິກາ ຕັດງົບປະມານສະໜັບສະໜູນ.

ຂ່າວຕ່າງປະເທດລາຍງານ ໃນວັນທີ 24 ມິຖຸນາ ຜ່ານມາວ່າ: ກະຊວງກະສິກຳ, ປ່າໄມ້ ແລະ ການປະມົງຂອງຍີ່ປຸ່ນ ເປີດເຜີຍວ່າ, ລາຄາເຂົ້າສານຂາຍຍ່ອຍສະເລ່ຍໃນຍີ່ປຸ່ນ ໄດ້ຫຼຸດລົງເປັນ 3,000 ເຢນຕໍ່ 5 ກິໂລກຣາມ ຊຶ່ງຖືເປັນຄັ້ງທຳອິດໃນຮອບປະມານ 3 ເດືອນ.

ຂ່າວສານຊີອາໄອລາຍງານວ່າ: ກອງປະຊຸມປະຈຳປີຄັ້ງທີ 10 ຂອງຄະນະບໍລິຫານງານທະນາຄານການລົງທຶນພື້ນຖານໂຄງລ່າງອາຊີ ໄດ້ຈັດຂຶ້ນຢູ່ນະຄອນຫຼວງປັກກິ່ງ ປະເທດຈີນ ໃນລະຫວ່າງວັນທີ 24-26 ມິຖຸນານີ້, ໂດຍມີແຂກ ເຂົ້າຮ່ວມ 3.500 ກວ່າທ່ານ ທີ່ມາຈາກເກືອບ 100 ປະເທດ ແລະ ເຂດແຄວ້ນ.

ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 25 ມິຖຸນາ ຜ່ານມາ, ໃນການເຂົ້າຮ່ວມວາລະສົນທະນານະໂຍບາຍ ຫົວຂໍ້ “ສັງກາດໃໝ່ຂອງ ຫວຽດນາມ: ຈາກວິໄສທັດໄປສູ່ການກະທຳ”, ໃນຂອບເຂດເວທີປາໄສເສດຖະກິດໂລກ (WEF) ຢູ່ ນະຄອນທຽນຊີນ ປະເທດຈີນ, ທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ໄດ້ຕອບຄຳຖາມຫຼາຍຂໍ້ທີ່ກ່ຽວຂ້ອງເຖິງເສັ້ນທາງພັດທະນາຂອງ ຫວຽດນາມ ໃນສັງກາດໃໝ່. ວາລະສົນທະນາມີການເຂົ້າຮ່ວມຂອງທ່ານ ບອດ ເບຣດ (Borge Brende) ປະທານ ທັງເປັນຜູ້ອຳນວຍການໃຫຍ່ຝ່າຍບໍລິຫານ WEF ພ້ອມດ້ວຍຜູ້ແທນ 100 ກວ່າທ່ານ ຊຶ່ງເປັນຜູ້ຕາງໜ້າຂອງບັນດາລັດຖະບານ, ອົງການຈັດຕັ້ງ ແລະ ວິສາຫະກິດ.

ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 24 ມິຖຸນາ ຜ່ານມາ, ເນື່ອງໃນໂອກາດທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ເຂົ້າຮ່ວມກອງປະຊຸມ WEF ທຽນຊີນ ແລະ ເຮັດວຽກຢູ່ ຈີນ, ທ່ານ ຟ້າມມິງຈິງ ໄດ້ມີການພົບປະກັບທ່ານ ຫຼີສຽງ ນາຍົກລັດຖະມົນຕີຈີນ. ໃນການພົບປະ, ນາຍົກລັດຖະມົນຕີສອງທ່ານເຫັນດີຕີລາຄາການພົວພັນລະຫວ່າງສອງພັກ, ສອງລັດ ທີ່ໄດ້ມີບັນດາບາດກ້າວຫັນປ່ຽນຢ່າງແຮງ, ແທດຈິງ ດ້ວຍຈຸດເດັ່ນທີ່ຕັ້ງໜ້າຫຼາຍຢ່າງ ເຊັ່ນ: ຄວາມໄວ້ເນື້ອເຊື່ອໃຈດ້ານການເມືອງໄດ້ຮັບການປັບປຸງ, ມີຫຼາຍກົນໄກຮ່ວມມືໃໝ່ໄດ້ຮັບການສ້າງຕັ້ງຂຶ້ນ, ການຮ່ວມມືດ້ານເສດຖະກິດ - ການຄ້າ, ການລົງທຶນ, ການທ່ອງທ່ຽວຮັກສາທ່ວງທ່າເຕີບໂຕ; ການຮ່ວມມືໃນການສ້າງເສັ້ນທາງລົດໄຟ, ການບິນກໍໄດ້ຮັບການຍູ້ແຮງເຊັ່ນດຽວກັນ.

ຂ່າວຕ່າງປະເທດລາຍງານ ຫວ່າງມໍ່ໆມານີ້; ມະຫາວິທະຍາໄລຮິບຣູ ແຫ່ງເຢຣູຊາເລັມ ລາຍງານວ່າ: ນັກວິທະຍາສາດຂອງອິສຣາແອນ ໄດ້ຄົ້ນພົບກົນໄກຂອງສະໝອງທີ່ຊ່ວຍຄວບຄຸມອາການເຈັບປວດໄລຍະສັ້ນແຕ່ບໍ່ສາມາດຄວບຄຸມອາການເຈັບປວດຊໍາເຮື້ອໄດ້ ຊຶ່ງສາມາດນຳໄປສູ່ການປິ່ນປົວທີ່ມີປະສິດທິພາບຫຼາຍຂຶ້ນ.

ຂ່າວຕ່າງປະເທດລາຍງານ ໃນວັນທີ 24 ມິຖຸນາ ຜ່ານມາວ່າ: ກະຊວງສາທາລະນະສຸກກໍາປູເຈຍໄດ້ອອກຖະແຫຼງການກ່ຽວກັບການພົບຄົນເຈັບທີ່ເປັນໄຂ້ຫວັດສັດປີກ ສາຍພັນ H5N1 ຊຶ່ງເປັນເພດຍິງ ອາຍຸ 41 ປີ ອາໄສຢູ່ແຂວງສຽມຣຽບ ທາງພາກຕາເວັນຕົກສ່ຽງເໜືອຂອງປະເທດ.

ຂ່າວຕ່າງປະເທດລາຍງານໃນວັນທີ 24 ມິຖຸນາ ຜ່ານມາວ່າ: ປີ 2024 ເປັນປີທີ່ຮ້ອນທີ່ສຸດແບບບໍ່ເຄີຍມີມາກ່ອນ ຫຼື ເປັນປີທີ່ຮ້ອນທີ່ສຸດເປັນອັນດັບສອງເທົ່າທີ່ມີການບັນທຶກໄວ້, ລວມເຖິງຄື້ນຄວາມຮ້ອນທີ່ແຜ່ລາມ ແລະ ແກ່ຍາວເປັນເວລາດົນນານ ຊຶ່ງທ່າ​ອ່ຽງ​ຄວາມຮ້ອນ​ລະຫວ່າງ​ປີ 1991-2024 ​ເພີ່ມຂຶ້ນ​ເກືອບ​ສອງ​ເທົ່າ​ຂອງ​ໄລຍະ​ປີ 1961-1990.

ຂ່າວຕ່າງປະເທດລາຍງານ ໃນວັນທີ 24 ມິຖຸນາ ຜ່ານມາວ່າ: ທ່ານ ອິຊາຕິນີ ຫົວໜ້າຫ້ອງການຄວບຄຸມ ແລະ ກວດກາຄຸນນະພາບຜະລິດຕະພັນການປະມົງ ພາຍໃຕ້ກະຊວງກິດຈະການທາງທະເລ ແລະ ການປະມົງຂອງອິນໂດເນເຊຍ ໄດ້ເປີດເຜີຍວ່າ: ການສົ່ງອອກຜະລິດຕະພັນທາງທະເລ ແລະ ການປະມົງ ຈາກແຂວງສຸລາເວສີຕາເວັນອອກສ່ຽງໃຕ້ ສູ່ ສະຫະລັດ ອາເມຣິກາ ແລະ ໄທ ຈຳນວນ 98 ໂຕນ ມີມູນຄ່າຫຼາຍກວ່າ 28 ພັນຕື້ຣູເປຍ.