 |
ການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ດ້ວຍຄຸນນະພາບສູງເປັນມາດຕະການທີ່ເປັນຮູບປະທຳໃນການຊ່ວຍຊຸກຍູ້ການພັດທະນາຂອງບັນດາປະເທດເຂດໂລກໃຕ້. ປັດຈຸບັນ, ປະເທດເຂດໂລກໃຕ້ທີ່ໄດ້ກວມປະຊາກອນ 2 ສ່ວນ 3 ຂອງໂລກ ໄດ້ກາຍເປັນຫົວຈັກສຳຄັນຕົ້ນຕໍໃນການຊຸກຍູ້ການເຕີບໂຕຂອງເສດຖະກິດໂລກ, ແຕ່ຍັງຜະເຊີນໜ້າກັບສະພາບຄວາມຫຍຸ້ງຍາກດ້ານການພັດທະນາຍ້ອນສະພາບພື້ນຖານໂຄງລ່າງອ່ອນແອ ແລະ ກຳແພງການພັດທະນາອ່າວສູງ. ສ່ວນການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ທີ່ນັບມື້ຂະຫຍາຍຕົວກ້າວສູ່ລວງເລິກພວມແກ້ໄຂບັນຫາຄວາມຫຍຸ້ງຍາກດັ່ງກ່າວ. ຕົວຢ່າງ: ເສັ້ນທາງລົດໄຟລາວ-ຈີນ ໄດ້ຂົນສົ່ງຜູ້ໂດຍສານຫຼາຍກວ່າສິບລ້ານເທື່ອຄົນຕໍ່ປີ, ປີ 2025 ຂະບວນລົດໄຟທີ່ແລ່ນຕາມເສັ້ນທາງລົດໄຟຈີນ-ເອີຣົບ ແລະ ຈີນ-ອາຊີກາງ ມີຫຼາຍກວ່າ 20.000 ຂະບວນ, ການສ້າງພື້ນຖານໂຄງລ່າງທາງບົກ, ທາງທະເລ, ທາງອາກາດແລະ ທາງອິນເຕີເນັດ ໄດ້ຕາບຈູນຄວາມບົກຜ່ອງຂອງຫຼາຍປະເທດເຂດໂລກໃຕ້; ໂຄງການຮ່ວມມືລາວ-ຈີນ ເຊັ່ນ: ເຂື່ອນໄຟຟ້ານ້ຳຕົກ ແລະ ໂຄງການຜະລິດໄຟຟ້າດ້ວຍພະລັງງານລົມເປັນຕົ້ນໄດ້ຊ່ວຍແກ້ໄຂບັນຫາການຂາດພະລັງໄຟຟ້າຂອງລາວ, ຍິ່ງໄດ້ບຳລຸງສ້າງກຳລັງເຕັກໂນໂລຊີຂອງລາວ ແລະ ເຮັດໃຫ້ໝາກຜົນແຫ່ງການພັດທະນາສ້າງຜົນປະໂຫຍດໃຫ້ແກ່ປະຊາຊົນທ້ອງຖິ່ນ. ສິບກວ່າປີຜ່ານມາ, ຜົນງານດ້ານການຮ່ວມມືໄດ້ສ້າງຜົນປະໂຫຍດໃຫ້ແກ່ 150 ກວ່າປະເທດ. ປີ 2025, ມູນຄ່າການຄ້າຂາເຂົ້າ-ຂາອອກລະຫວ່າງຈີນ ແລະ ປະເທດທີ່ຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ໄດ້ກວມເອົາຫຼາຍກວ່າເຄິ່ງໜຶ່ງຂອງຍອດມູນຄ່າການຄ້າຂາເຂົ້າ-ຂາອອກຂອງຈີນ ຊຶ່ງໄດ້ສະແດງໃຫ້ເຫັນວ່າ: “ໜຶ່ງແລວໜຶ່ງເສັ້ນທາງ” ແມ່ນກຳລັງສຳຄັນທີ່ຊ່ວຍຊຸກຍູ້ການພັດທະນາຂອງບັນດາປະເທດເຂດໂລກໃຕ້.
 |
ການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ດ້ວຍຄຸນນະພາບສູງແມ່ນແຜນການຂອງຈີນໃນການແກ້ໄຂສະພາບຄວາມຫຍຸ້ງຍາກດ້ານການຄ້າທົ່ວໂລກ. ປັດຈຸບັນ, ການປະຕິຮູບລະບຽບການດ້ານເສດຖະກິດການຄ້າຫຼາຍຝ່າຍກຳລັງປະສົບຄວາມຫຍຸ້ງຍາກ, ປະເທດເຂດໂລກໃຕ້ຜະເຊີນໜ້າກັບກຳແພງພາສີ ແລະ ກຳແພງທີ່ບໍ່ແມ່ນພາສີຫຼາຍຢ່າງ, ສະພາບແວດລ້ອມການພັດທະນານັບມື້ນັບສັບສົນ. ຈີນ ໄດ້ເປີດພື້ນທີ່ການພັດທະນາໃໝ່ໃຫ້ແກ່ບັນດາປະເທດທີ່ຮ່ວມກັນສ້າງ “ໜຶ່ງແລວໜຶ່ງເສັ້ນທາງ”: ນັບຈາກສັນຍາການພົວພັນຄູ່ຮ່ວມເສດຖະກິດຮອບດ້ານຂອງພາກພື້ນ ຫຼື RCEP ມີຜົນບັງຄັບໃຊ້ຮອດການຍົກລະດັບເຂດການຄ້າເສລີຈີນ-ອາຊຽນ 3.0 ແລະ ຈີນໄດ້ເຊັນສັນຍາການຄ້າເສລີ 24 ສະບັບໄດ້ອຳນວຍຄວາມສະດວກໃຫ້ແກ່ການຄ້າ ແລະ ການລົງທຶນ; ນັບແຕ່ເດືອນພຶດສະພາປີ 2026 ເປັນຕົ້ນໄປ, ຈີນຈະຍົກເວັ້ນພາສີຕໍ່ສິນຄ້າທີ່ນຳເຂົ້າຈາກ 53 ປະເທດໃນອາຟຣິກາທີ່ໄດ້ສ້າງຕັ້ງສາຍພົວພັນທາງການທູດກັບຈີນ ຊຶ່ງໝາຍຄວາມວ່າຈີນຈະສູນເສຍລາຍໄດ້ຈາກພາສີນຳເຂົ້າປະມານ 1.4 ຕື້ໂດລາຕໍ່ປີ ຊຶ່ງແຕກຕ່າງກັບບາງປະເທດໃຫຍ່ທີ່ໄດ້ປະຕິບັດລັດທິປົກປ້ອງການຄ້າ. ມາດຕະການເປີດປະຕູສູ່ພາຍນອກແບບນີ້ທີ່ເນັ້ນໃສ່ຕ່າງຝ່າຍຕ່າງໄດ້ຮັບຜົນປະໂຫຍດຫຼາຍກວ່າການຕອບແທນຊຶ່ງກັນ ແລະ ກັນບໍ່ພຽງແຕ່ໄດ້ທັບມ້າງສິ່ງກີດຂວາງທີ່ຈຳກັດສິນຄ້າຂອງປະເທດເຂດໂລກໃຕ້ເຂົ້າສູ່ຕະຫຼາດຈີນເທົ່ານັ້ນ, ຍັງໄດ້ເຕົ້າໂຮມກຳລັງການຮ່ວມມືເພື່ອແກ້ໄຂປັດໄຈທາງລົບທີ່ຝືນກັບຂະບວນການໂລກາພິວັດອີກດ້ວຍ.
 |
ການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ດ້ວຍຄຸນນະພາບສູງຍິ່ງໄດ້ເປີດກວ້າງການຮ່ວມມືໃນຂົງເຂດຈະເລີນໃໝ່. ຈາກການພັດທະນາຕາມທິດສີຂຽວຮອດເສດຖະກິດດີຈີຕອນ, ຈາກການຮ່ວມມືດ້ານກະສິກຳຮອດປັນຍາປະດິດ, ການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ໄດ້ຢວ່າງບາດກ້າວໄປສູ່ການຮ່ວມມືດ້ວຍຄຸນນະພາບສູງ ແລະ ມີຫຼາຍຮູບຫຼາຍແບບ. ໃນໄລຍະປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ 14 ຂອງຈີນ, ຈີນໄດ້ເຊັນບົດບັນທຶກຄວາມເຂົ້າໃຈໃນຂົງເຂດດີຈີຕອນ ແລະ ສີຂຽວກັບຫຼາຍກວ່າ 50 ປະເທດ, 36 ປະເທດຄູ່ຮ່ວມ “ທຸລະກິດເອເລັກໂຕຣນິກເສັ້ນທາງສາຍໃໝ” ໄດ້ເຮັດໃຫ້ການຄ້າຂ້າມຊາດມີຄວາມສະດວກສະບາຍກວ່າເກົ່າ; ແຜນການສ້າງຍີ່ຫໍ້ “ເຂດໂລກໃຕ້ແບບດີຈີຕອນ” ຂອງຈີນໄດ້ຈັດຊຸດຝຶກອົບຮົມເສດຖະກິດດີຈີຕອນ ແລະ ປັນຍາປະດິດ 200 ຊຸດ, ໄດ້ຊ່ວຍຊຸກຍູ້ໃຫ້ຂະແໜງການກະສິກຳມີຜົນຜະລິດເພີ່ມຂຶ້ນ, ເຜີຍແຜ່ການສຶກສາໃຫ້ທົ່ວເຖິງ ແລະ ຕາບຈູນຊ່ອງວ່າງດ້ານດີຈີຕອນເໜືອ-ໃຕ້ດ້ວຍເຕັກໂນໂລຊີ. ການສ້າງສູນການຮ່ວມມືການປະຍຸກໃຊ້ປັນຍາປະດິດຈີນ-ລາວ, ການສ້າງພື້ນຖານໂຄງລ່າງດ້ານດີຈີຕອນຢູ່ພາກພື້ນອາຊີຕາເວັນອອກສຽງໃຕ້ ແລະ ໂຄງການອື່ນໆເຮັດໃຫ້ໂຄງການຮ່ວມມືໃນຂົງເຂດຈະເລີນໃໝ່ໄດ້ບັນລຸຜົນເປັນຈິງ, ເຮັດໃຫ້ການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ທັນຍຸກທັນສະໄໝ ແລະ ສ້າງໂອກາດໃໝ່ໃຫ້ແກ່ການພັດທະນາຂອງປະເທດຕ່າງໆ.
ທະນາຄານໂລກຄາດຄະເນວ່າ: ເມື່ອຮອດປີ 2030, ການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ຈະຊ່ວຍຊຸກຍູ້ໃຫ້ປະຊາຊົນຫຼາຍສິບລ້ານຄົນຫຼຸດພົ້ນອອກຈາກຄວາມທຸກຍາກ. ຈາກສະພາບການປ່ຽນແປງທີ່ບໍ່ເຄີຍມີມາກ່ອນໃນຮອບຮ້ອຍປີຄືປັດຈຸບັນນີ້, ພຶດຕິກຳດັ່ງກ່າວບໍ່ພຽງແຕ່ໄດ້ຊຸກຍູ້ຂະບວນການຫັນເປັນທັນສະໄໝຂອງບັນດາປະເທດເຂດໂລກໃຕ້ເທົ່ານັ້ນ, ຫາກຍັງໄດ້ສະແດງໃຫ້ເຫັນເຖິງນ້ຳໃຈຮັບຜິດຊອບຂອງຈີນໃນການຊຸກຍູ້ການເສີມສ້າງການພົວພັນສາກົນແບບໃໝ່ ແລະ ຊຸກຍູ້ການພັດທະນາຮ່ວມກັນຂອງໂລກ, ເຮັດໃຫ້ປະເທດຕ່າງໆໄດ້ຮັບຜົນປະໂຫຍດຈາກການຮ່ວມມື ແລະ ຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດໃນການເຊື່ອມໂຍງເຊື່ອມຈອດກັນ.
ໂດຍ: ຊີອາໄອ
ຄໍາເຫັນ