 |
ປັດຈຸບັນ, ຂໍ້ມູນຂ່າວສານໄດ້ກາຍເປັນປັດໄຈໃນການຜະລິດທີ່ສໍາຄັນ, ເສດຖະກິດດີຈີຕອນໄດ້ຫັນປ່ຽນຮູບແບບການພັດທະນາຂອງປະເທດຕ່າງໆຢ່າງເລິກເຊິ່ງ. ເປັນເວລາດົນນານມາແລ້ວ, ການຄຸ້ມຄອງຂໍ້ມູນຂ່າວສານໂລກຜະເຊີນໜ້າກັບບັນຫາຕ່າງໆ ເຊັ່ນ: ມາດຕະຖານບໍ່ເປັນເອກະພາບກັນ, ການໄຫຼວຽນຂ້າມຊາຍແດນບໍ່ໂລ່ງລ່ຽນ, ຄວາມແຕກໂຕນກັນດ້ານການພັດທະນາພົ້ນເດັ່ນ ແລະອື່ນໆ, ບາງປະເທດທີ່ພັດທະນາແລ້ວໃນຕາເວັນຕົກໄດ້ຊຸກຍູ້ “ການຄອບງໍາດ້ານຂໍ້ມູນຂ່າວສານ” ໂດຍອີງໃສ່ທ່າໄດ້ປຽບດ້ານເຕັກໂນໂລຊີ ແລະ ລະບຽບການ, ໄດ້ບີບຮັດອະທິປະໄຕດ້ານດີຈີຕອນ ແລະ ພື້ນທີ່ການພັດທະນາຂອງບັນດາປະເທດກໍາລັງພັດທະນາ, ເຮັດໃຫ້ປະເທດທີ່ມີເສດຖະກິດດີຈີຕອນຈະເລີນໃໝ່ຄືປະເທດລາວຍິ່ງງ່າຍທີ່ຈະຕົກຢູ່ໃນທ່າເສຍປຽບໃນການແຂ່ງຂັນດ້ານດີຈີຕອນຂອງໂລກ. WDO ຖືເອົາການຫຼຸດຜ່ອນຊ່ອງວ່າງດ້ານດີຈີຕອນ, ຊຸກຍູ້ຂໍ້ມູນຂ່າວສານໃຫ້ມີການໄຫຼວຽນຢ່າງປອດໄພ ແລະ ເປັນລະບຽບດີ, ທັງຊ່ວຍເຫຼືອປະເທດກໍາລັງພັດທະນາໃນການຍົກລະດັບຄວາມສາມາດເປັນເປົ້າໝາຍ ຊຶ່ງສອດຄ່ອງກັບຄວາມຕ້ອງການດ້ານການພັດທະນາດີຈີຕອນ ແລະ ສອດຄ່ອງກັບທິດທາງການຮ່ວມມືດ້ານດີຈີຕອນລະຫວ່າງຈີນ-ອາຊຽນໃນລະດັບສູງ, ພ້ອມທັງໄດ້ສະໜອງເວທີອັນໃໝ່ອ່ຽມເພື່ອແກ້ໄຂຄວາມຫຍຸ້ງຍາກດ້ານການພັດທະນາດີຈີຕອນສໍາລັບລາວ.
 |
ການຮ່ວມມືລະຫວ່າງຈີນ-ລາວໄດ້ສ້າງພື້ນຖານອັນໜັກແໜ້ນໃຫ້ແກ່ການພັດທະນາຄູ່ກັນໃນຂົງເຂດຂໍ້ມູນຂ່າວສານລະຫວ່າງສອງປະເທດ ຊຶ່ງການສ້າງຕັ້ງຂຶ້ນຂອງ WDO ຈະເປີດກວ້າງປະສິດທິຜົນຂອງຜົນສໍາເລັດດ້ານການຮ່ວມມືເຫຼົ່ານີ້ຕື່ມອີກ. ໂຄງການເສັ້ນທາງລົດໄຟລາວ-ຈີນໄດ້ຊຸກຍູ້ການໄຫຼວຽນທີ່ມີປະສິດທິພາບສູງດ້ານການຈໍລະຈອນສິນຄ້າ, ກະແສຜູ້ໂດຍສານ ແລະ ການໄຫຼວຽນດ້ານທຶນ, ຂະນະທີ່ຄວາມໂລ່ງລ່ຽນດ້ານການແລກປ່ຽນຂໍ້ມູນຂ່າວສານເປັນຂໍກຸນແຈສໍາຄັນໃນການຍົກລະດັບປະສິດທິຜົນຂອງການນໍາໃຊ້ທາງລົດໄຟ ແລະ ການຂະຫຍາຍການຄ້າຂ້າມຊາຍແດນ; ໂຄງການສູນຮ່ວມມືການປະດິດສ້າງໃໝ່ດ້ານປັນຍາປະດິດລາວ-ຈີນ ແລະ ສູນທຸລະກິດການຄ້າດີຈີຕອນໄດ້ຮັບການຈັດຕັ້ງປະຕິບັດ, ການທົດລອງຊໍາລະເງິນຂ້າມຊາຍແດນດ້ວຍເງິນຢວນດີຈີຕອນຢູ່ລາວໄດ້ປະສົບຜົນສໍາເລັດ, ບວກກັບໂຄງການການຄ້າທາງເອເລັກໂຕຣນິກຂ້າມຊາຍແດນ, ດ່ານອັດສະລິຍະ, ການຫັນຂົງເຂດກະສິກໍາໃຫ້ເປັນດີຈີຕອນ ແລະ ອື່ນໆໄດ້ຮັບການຊຸກຍູ້ຢ່າງໝັ້ນທ່ຽງ, ພຶດຕິກໍາຕົວຈິງເຫຼົ່ານີ້ລ້ວນແຕ່ຕ້ອງການລະບຽບດ້ານຂໍ້ມູນຂ່າວສານທີ່ເປັນເອກະພາບກັນ, ສະພາບແວດລ້ອມການໄຫຼວຽນທີ່ປອດໄພ ແລະ ການຮັບປະກັນດ້ານຄວາມສາມາດແບບຍືນຍົງ. WDO ຊຸກຍູ້ການປະສານສົມທົບກັນດ້ານມາດຕະຖານຂໍ້ມູນຂ່າວສານ, ຄວາມປອດໄພ ແລະ ຄວາມເປັນລະບຽບດ້ານການໄຫຼວຽນຂ້າມຊາຍແດນ ແລະ ການແບ່ງປັນບົດຮຽນດ້ານການຄຸ້ມຄອງບໍລິຫານ ຊຶ່ງຈະສາມາດແກ້ໄຂບັນຫາຕ່າງໆໃນການຮ່ວມມືລະຫວ່າງຈີນ-ລາວ ເຊັ່ນ: ຄວາມຫຍຸ້ງຍາກໃນການເຊື່ອມໂຍງດ້ານຂໍ້ມູນຂ່າວສານໃຫ້ສອດຄ່ອງກັບຂໍ້ກໍານົດ, ການຢັ້ງຢືນຊຶ່ງກັນ ແລະ ກັນບໍ່ໂລ່ງລ່ຽນ, ຕົ້ນທຶນການປະສານສົມທົບກັນດ້ານເຕັກໂນໂລຊີມີລາຄາສູງ ແລະ ອື່ນໆ, ເຮັດໃຫ້ໂຄງການດີຈີຕອນໃນປັດຈຸບັນດໍາເນີນໄປຢ່າງໂລ່ງລ່ຽນກວ່າເກົ່າ ແລະ ເຮັດໃຫ້ການຮ່ວມມືລະຫວ່າງສອງປະເທດມີພື້ນທີ່ກວ້າງຂວາງກວ່າເກົ່າ.
 |
ເມື່ອເບິ່ງຈາກລະດັບພາກພື້ນແລ້ວ, ອາຊຽນພວມອອກແຮງຊຸກຍູ້ການສ້າງປະຊາຄົມຮ່ວມດ້ານດີຈີຕອນ, ຈີນ ແລະ ອາຊຽນເປັນຄູ່ການຄ້າໃຫຍ່ອັນດັບໜຶ່ງຂອງກັນ ແລະ ກັນ ຊຶ່ງມີທ່າແຮງບົ່ມຊ້ອນອັນມະຫາສານໃນການຮ່ວມມືດ້ານດີຈີຕອນ, ພ້ອມດຽວກັນນີ້, ການຮ່ວມມືດ້ານເສດຖະກິດດີຈີຕອນລະຫວ່າງຈີນ-ອາຊຽນໄດ້ເຂົ້າສູ່ລວງເລິກຢ່າງຕໍ່ເນື່ອງ, ສັງເກດໄດ້ຈາກໂຄງການສູນຂໍ້ມູນຂ່າວສານຈີນ-ອາຊຽນ, ສາຍໃຍແກ້ວຂ້າມຊາຍແດນ, ພື້ນຖານໂຄງລ່າງ 5G ແລະອື່ນໆໄດ້ຮັບການປັບປຸງໃຫ້ສົມບູນຂຶ້ນເລື້ອຍໆ, ຂະນະທີ່ເຂດການຄ້າເສລີຈີນ-ອາຊຽນ 3.0 ໄດ້ຈັດໃຫ້ເສດຖະກິດດີຈີຕອນເຂົ້າເປັນໜຶ່ງໃນບັນດາເນື້ອໃນຂອງເຂດການຄ້າດັ່ງກ່າວເປັນເທື່ອທໍາອິດ. ຢ່າງໃດກໍຕາມ, ຄວາມແຕກໂຕນກັນດ້ານລະບຽບການຂໍ້ມູນຂ່າວສານ ແລະ ຄວາມສາມາດດ້ານດີຈີຕອນຢູ່ໃນພາກພື້ນຍັງຄົງເປັນປັດໄຈຈໍາກັດຕໍ່ການຍົກລະດັບການຮ່ວມມືລະຫວ່າງຈີນ-ອາຊຽນໃຫ້ມີຄຸນນະພາບສູງຂຶ້ນ. WDO ໄດ້ເຕົ້າໂຮມຫຼາຍອົງກອນຈາກທົ່ວໂລກໂດຍກວມເອົາຫຼາຍຂົງເຂດ ແລະ ຂະແໜງການ ຊຶ່ງສາມາດປະກອບສ່ວນເຂົ້າໃນການສ້າງໂຄງລ່າງການຄຸ້ມຄອງຂໍ້ມູນຂ່າວສານທີ່ສອດຄ່ອງ ແລະ ສາມາດຢັ້ງຢືນຊຶ່ງກັນ ແລະ ກັນລະຫວ່າງຈີນ-ອາຊຽນ, ຊຸກຍູ້ການປະຍຸກໃຊ້ໃນດ້ານຕ່າງໆ ເປັນຕົ້ນແມ່ນການຜ່ານດ່ານດີຈີຕອນ, ການບໍລິການຂໍ້ມູນເຄຣດິດຂ້າມຊາຍແດນ, ການຊອກຫາແຫຼ່ງກໍາເນີດຂອງສິນຄ້າ ແລະອື່ນໆ ໃຫ້ໄດ້ຮັບການຈັດຕັ້ງປະຕິບັດຢ່າງເປັນຮູບປະທໍາ ເພື່ອແບ່ງປັນຜົນປະໂຫຍດຈາກຂົງເຂດດີຈີຕອນຂອງສັນຍາການພົວພັນຄູ່ຮ່ວມເສດຖະກິດຮອບດ້ານຂອງພາກພື້ນ ຫຼື RCEP.
ໃນອະນາຄົດ, ຄຽງຄູ່ກັບວຽກງານຕ່າງໆຂອງ WDO ໄດ້ຮັບການຈັດຕັ້ງປະຕິບັດຢ່າງເປັນຮູບປະທໍາ, ການຮ່ວມມືດ້ານຂໍ້ມູນຂ່າວສານລະຫວ່າງຈີນ-ລາວ ກໍຄື ຈີນ-ອາຊຽນ ຈະນັບມື້ເຂົ້າສູ່ລວງເລິກຢ່າງບໍ່ຢຸດຢັ້ງ, ຂະນະທີ່ຂໍ້ມູນຂ່າວສານຈະເພີ່ມປະສິດທິພາບໃຫ້ແກ່ເສັ້ນທາງລົດໄຟລາວ-ຈີນ, ການຄ້າຂ້າມຊາຍແດນ, ການບໍລິການສາທາລະນະ ແລະ ຂົງເຂດອື່ນໆໃຫ້ດີຂຶ້ນກວ່າເກົ່າ, ເຮັດໃຫ້ປະຊາຊົນໄດ້ຮັບຜົນປະໂຫຍດຈາກເຕັກໂນໂລຊີດີຈີຕອນຢ່າງແທ້ຈິງ ເພື່ອເພີ່ມແຮງຂັບເຄື່ອນແບບຍືນຍົງໃຫ້ແກ່ລາວ ແລະ ອາຊຽນໃນການບັນລຸການພັດທະນາແບບຍືນຍົງ ກໍຄື ເຊື່ອມໂຍງເຂົ້າໃນການຮ່ວມມືລະດັບພາກພື້ນຢ່າງເລິກເຊິ່ງ, ພ້ອມທັງເຮັດໃຫ້ຄູ່ຮ່ວມຊາຕາກໍາຈີນ-ລາວ ແລະ ປະຊາຄົມຮ່ວມຊາຕາກໍາຈີນ-ອາຊຽນມີຄວາມແໜ້ນແຟ້ນ ແລະ ໝັ້ນຄົງຍິ່ງໆຂຶ້ນໃນຍຸກດີຈີຕອນ.
ໂດຍ: ຊີອາໄອ
ຄໍາເຫັນ