 |
ໃນພິທີ, ສະຫາຍ ບຸນທັນ ບຸນທະວິໄລ ຮອງເລຂາຄະນະບໍລິຫານງານພັກ ຮອງຫົວ
ໜ້າ ອອປສ ໄດ້ໃຫ້ກຽດເຜີຍແຜ່ເນື້ອໃນສໍາຄັນໂຄງການການເມືອງ ແລະ ລາຍງານການເມືອງ ຂອງກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ ແລະ ກອງປະຊຸມໃຫຍ່ສະມາຊິກພັກ ຄັ້ງທີ VI ຂອງອົງຄະນະພັກ ອົງການໄອຍະການປະຊາຊົນສູງສຸດ.
ໃນກອງປະຊຸມໃນຄັ້ງນີ້, ສະຫາຍ ຄໍາເພັດ ສົມວໍລະຈິດ ຄະນະປະຈໍາພັກ ຮອງຫົວໜ້າ ອອປສ ໄດ້ເຜີຍແຜ່ເນື້ອໃນຈິດໃຈສໍາຄັນມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ, ມະຕິກອງປະຊຸມໃຫຍ່ສະມາຊິກພັກ ຄັ້ງທີ VI ຂອງອົງຄະນະພັກ ອົງການໄອຍະການປະຊາຊົນສູງສຸດ, ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ X (2026-2030) ຕິດພັນກັບແຜນພັດທະນາວຽກງານໄອຍະການໄລຍະ 5 ປີ.
ຕໍ່ເນື້ອໃນເອກະສານທີ່ໄດ້ເຜີຍແຜ່ ແລະ ເຊື່ອມຊຶມ ທີ່ກ່າວມາຂ້າງເທິງນັ້ນ ສະຫາຍ ນາງ ລີວົງ ລາວລີ ໄດ້ຮຽກຮ້ອງໃຫ້ບັນດາສະຫາຍຄະນະພັກ, ສະມາຊິກພັກ ແລະ ພະນັກງານຫຼັກແຫຼ່ງ ຂອງ ອອປສ ຈົ່ງພ້ອມກັນຍົກສູງຄວາມຮັບຜິດຊອບການເມືອງ, ເອົາໃຈໃສ່ຄົ້ນຄວ້າເຊື່ອມຊຶມ ແລະ ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ສະມາຊິກ ທົ່ວປະເທດ ຄັ້ງທີ XII ຂອງພັກປະຊາຊົນ ປະຕິວັດລາວ ແລະ ມະຕິກອງປະຊຸມໃຫຍ່ສະມາຊິກພັກ ຄັ້ງທີ VI ຂອງອົງຄະນະພັກ ອອປສ ເຂົ້າສູ່ວຽກງານຕົວຈິງ ໃຫ້ເປັນຮູບປະທໍາ ພ້ອມກັນຍູ້ແຮງການຜັນຂະຫຍາຍ ແລະ ຈັດຕັ້ງປະຕິບັດຕົວຈິງ, ເຮັດໃຫ້ກາຍເປັນຂະບວນການອັນກວ້າງຂວາງຂອງມະຫາຊົນ, ຂອງທົ່ວສັງຄົມ ເພື່ອນໍາເອົາຜົນປະໂຫຍດຕົວຈິງມາໃຫ້ປະເທດຊາດ ແລະ ປະຊາຊົນ ກໍຄືເຮັດໃຫ້ການນໍາພາປົກປັກຮັກສາ ແລະ ພັດທະນາປະເທດຊາດໄປຖືກຕ້ອງຕາມທິດທີ່ໄດ້ກໍານົດໄວ້ຢ່າງໜັກແໜ້ນ. ນອກຈາກນີ້, ສະຫາຍຍັງໄດ້ເນັ້ນໜັກບາງບັນຫາສໍາຄັນທີ່ເປັນວຽກງານຈຸດສຸມໃນຕໍ່ໜ້າດັ່ງນີ້: ສຸມໃສ່ວຽກງານສຶກສາອົບຮົມການເມືອງນໍາພາແນວຄິດໃຫ້ຖັນແຖວສະມາຊິກພັກ, ພະນັກງານຢູ່ໃນຄວາມຮັບຜິດຊອບຂອງຕົນ ທັງຢູ່ສູນກາງ ແລະ ທ້ອງຖິ່ນໃຫ້ເຊື່ອມຊຶມກໍາແໜ້ນ ແນວທາງນະໂຍບາຍມະຕິຕ່າງໆຂອງພັກ ຢ່າງເລິກເຊິ່ງ; ເອົາໃຈໃສ່ວຽກງານກໍ່ສ້າງພັກ ໃຫ້ມີຄວາມເຂັ້ມແຂງໂດຍສຸມໃສ່ການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນບົນພື້ນຖານການສ້າງພັກໃນ 4 ດ້ານໃຫ້ມີຄຸນນະພາບສູງຂຶ້ນຕາມລໍາດັບ, ສຸມໃສ່ປັບປຸງກົງຈັກການຈັດຕັ້ງໃຫ້ເຂັ້ມແຂງ ແລະ ໃຫ້ເປັນລະບົບຄົບຊຸດ, ສືບຕໍ່ວຽກງານການກໍ່ສ້າງຮາກຖານການເມືອງ ຕາມທິດ 3 ສ້າງ, ນໍາພາ-ຊີ້ນໍາວຽກງານຕິດຕາມກວດກາການປະຕິບັດກົດໝາຍ ແລະ ການສັ່ງຟ້ອງຜູ້ຖືກຫາຂຶ້ນສານໃຫ້ບັນລຸຄາດໝາຍ 95% ຂຶ້ນໄປຂອງການແກ້ໄຂຄະດີ ແລະ ຮັບປະກັນໃຫ້ສານພິຈາລະນາເອົາຕາມຄໍາຖະແຫຼງບັນລຸ 95% ຂຶ້ນໄປໃນແຕ່ລະປີ, ເພີ່ມທະວີການນໍາພາ-ຊີ້ນໍາວຽກງານ ຕິດຕາມກວດກາການປະຕິບັດກົດໝາຍ ຂອງອົງການສືບສວນ-ສອບສວນ, ການກວດກາຄ້າຍຄຸມຂັງ-ດັດສ້າງ, ການປະຕິບັດຄໍາຕັດສິນຂອງສານ ໃຫ້ຖືກຕ້ອງຕາມກົດໝາຍຢ່າງເຂັ້ມງວດ ແລະ ກ້າວເຂົ້າສູ່ຄຸນນະພາບດີຂຶ້ນກ່ວາເກົ່າ, ການຫັນເປັນທັນສະໄໝໃນວຽກງານໄອຍະການປະຊາຊົນ, ການປັບປຸງ ແລະ ພັດທະນາຖານຂໍ້ມູນທີ່ທັນສະໄໝ ແລະ ການພັດທະນາພື້ນຖານໂຄງລ່າງຢ່າງມີຈຸດສຸມ,ສືບຕໍ່ສ້າງກົດໝາຍ, ນິຕິກໍາໃຕ້ກົດໝາຍຈໍານວນໜຶ່ງ ເປັນຕົ້ນແມ່ນປັບປຸງກົດໝາຍວ່າດ້ວຍການດໍາເນີນຄະດີອາຍາ, ສ້າງກົດໝາຍວ່າດ້ວຍຫຼັກຖານ, ປັບປຸງລັດຖະບັນຍັດຂອງປະທານປະເທດວ່າດ້ວຍການໃຫ້ອະໄພຍະໂທດ ແລະ ນິຕິກໍາອື່ນໆທີ່ຈໍາເປັນຈໍານວນໜຶ່ງ. ພ້ອມທັງເອົາໃຈໃສ່ໂຄສະນາເຜີຍແຜ່ກົດໝາຍ ແລະ ນິຕິກໍາໃຕ້ກົດໝາຍທີ່ກ່ຽວຂ້ອງໃຫ້ທົ່ວເຖິງ ແລະ ເລິກເຊິ່ງກ່ວາເກົ່າ, ເພີ່ມທະວີການພົວພັນຮ່ວມມືກັບຕ່າງປະເທດ ໂດຍສະເພາະແມ່ນບັນດາປະເທດເພື່ອນມິດຍຸດທະສາດຄື: ສສ ຫວຽດນາມ, ສປ ຈີນ ໃຫ້ກ້າວສູ່ລວງເລິກ, ເສີມຂະຫຍາຍການພົວພັນຮ່ວມມືກັບ ສ ຣັດເຊຍ, ສ ກູບາ, ອາເຊັກບາຍຊານ ໃຫ້ແໜ້ນແຟ້ນຂຶ້ນກ່ວາເກົ່າ, ສືບຕໍ່ພົວພັນຮ່ວມມືກັບບັນດາປະເທດອາຊຽນ, ບັນດາປະເທດຕ່າງໆໃນໂລກ ແລະ ອົງການຈັດຕັ້ງສາກົນຈໍານວນໜຶ່ງ ບົນພື້ນຖານຕ່າງຝ່າຍຕ່າງມີຜົນປະໂຫຍດ, ສືບຕໍ່ຊີ້ນໍາວຽກງານ 3 ອົງການຈັດຕັ້ງມະຫາຊົນ, ນໍາພາ-ຊີ້ນໍາວຽກງານກວດກາພັກ-ລັດ ແລະ ເພີ່ມທະວີວຽກງານກວດກາພະນັກງານໃຫ້ມີຄວາມເຂັ້ມງວດກວ່າເກົ່າ ດ້ວຍການບໍາລຸງສ້າງພະນັກງານທີ່ເຮັດວຽກງານກວດກາໃຫ້ມີຄວາມເຂັ້ມແຂງ, ເດັດຂາດ ແລະ ມີຄວາມຮັບຜິດຊອບສູງ ຕໍ່ຄະນະບໍລິຫານງານພັກ, ເປັນໃຈກາງໃນການສະກັດກັ້ນ ແລະ ຕ້ານປະກົດການຫຍໍ້ທໍ້ທີ່ຈະເກີດຂຶ້ນໃນຖັນແຖວພະນັກງານ, ສະມາຊິກພັກ, ເກັບກໍາສະພາບຂອງພະນັກງານຢ່າງເລິກເຊິ່ງ.
(ຂ່າວ: ອອປສ)
ຄໍາເຫັນ