ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ, ມີຄະນະນໍາ ອອປສ, ບັນດາກົມໃຫຍ່, ຫ້ອງວ່າການກະຊວງ, ນາຍ ແລະ ພົນທະຫານ ພ້ອມດ້ວຍພະນັກງານ-ລັດຖະກອນເຂົ້າຮ່ວມ.
ທ່ານ ພັນເອກ ຄໍາເພັດ ພົມມະກອນ ຮອງຫົວໜ້າອົງການໄອຍະການປະຊາຊົນສູງສຸດ ຫົວໜ້າອົງການໄອຍະການທະຫານໄດ້ກ່າວວ່າ: ອົງການໄອຍະການທະຫານ ແມ່ນອົງການຈັດຕັ້ງໜຶ່ງໃນລະບົບອົງການໄອຍະການປະຊາຊົນແຫ່ງສປປ ລາວ ມີພາລະບົດບາດ, ສິດ ແລະ ໜ້າທີ່ໃນການຕິດຕາມກວດກາການເຄົາລົບ ແລະ ປະຕິບັດກົດໝາຍຂອງນາຍ ແລະ ພົນທະຫານ, ກຳມະກອນ, ພາລະກອນປ້ອງກັນຊາດ ແລະ ສັ່ງຟ້ອງຜູ້ຖືກຫາຂຶ້ນສານທະຫານຕາມກົດໝາຍ. ຕະຫຼອດໄລຍະ 31 ປີພາຍໃຕ້ການຊີ້ນໍາ-ນໍາພາຂອງກະຊວງປ້ອງກັນປະເທດ ແລະ ອອປສ. ອົງການໄອຍະການທະຫານໄດ້ຮັບການພັດທະນາ ແລະ ເຕີບໃຫຍ່ຂະຫຍາຍຕົວເປັນກ້າວໆມາສາມາດເຮັດລ້ອນໜ້າທີ່ການເມືອງທີ່ພັກ-ລັດມອບໝາຍໃຫ້ເປັນຢ່າງດີ, ປະກອບສ່ວນອັນສໍາຄັນເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ ໂດຍສະເພາະເຮັດໃຫ້ການຄຸ້ມຄອງລັດ, ຄຸ້ມຄອງກອງທັບດ້ວຍກົດໝາຍນັບມື້ມີຄວາມຄ່ອງຕົວ ແລະ ສັກສິດຕາມລັດຖະທໍາມະນູນ ແລະ ກົດໝາຍເຮັດໃຫ້ກອງທັບມີຄວາມສະຫງົບ ແລະ ຍຸຕິທໍາເພີ່ມຂຶ້ນ, ສິດຜົນປະໂຫຍດຂອງກອງທັບ ແລະ ຜົນປະໂຫຍດອັນຊອບທໍາຂອງນາຍ ແລະ ພົນທະຫານ, ກໍາມະກອນ ແລະ ພາລະກອນປ້ອງກັນຊາດໄດ້ຮັບການປົກປ້ອງ, ຊີວິດການເປັນຢູ່ທາງດ້ານວັດຖຸ ແລະ ຈິດໃຈໄດ້ຮັບການພັດທະນາຢ່າງບໍ່ຢຸດຢັ້ງ. ໄລຍະຜ່ານມາ, ອົງການໄອຍະການທະຫານໄດ້ຍົກສູງພາລະບົດບາດໃນການຕິດຕາມກວດກາການປະຕິບັດກົດໝາຍ ໂດຍເຄົາລົບຫຼັກການຮອບດ້ານ, ຄົບຖ້ວນ ແລະ ພາວະວິໃສ ” ຢຶດໝັ້ນຫຼັກການ 4 ຮັບປະກັນຄື: ຮັບປະກັນຄວາມຖືກຕ້ອງ, ຍຸຕິທຳ, ໂປ່ງໃສ ແລະ ທັນຕາມກຳນົດເວລາ.
ອົງການໄອຍະການປະຊາຊົນສູງສຸດ ຍັງໄດ້ຊ່ວຍເຫຼືອຍົກລະດັບພະນັກງານອົງການໄອຍະການທະຫານເປັນຕົ້ນທຶນຮຽນທິດສະດີມາກ-ເລນິນລະບົບ 3 ເດືອນ ແລະ 45 ວັນຈໍານວນ 33 ສະຫາຍ, ຝຶກອົບຮົມວຽກງານໄອຍະການຜູ້ຊ່ວຍ, ພະນັກງານຂັ້ນ III, ຂັ້ນ II ຈໍານວນ 65 ສະຫາຍ, ຝືກອົບຮົມວຽກງານວິຊາສະເພາະຢູ່ສສ ຫວຽດນາມ, ສປ ຈີນລະບົບ 2 ເດືອນ ແລະ ໄລຍະສັ້ນ 15 ວັນຈໍານວນ 6 ສະຫາຍ ແລະ ຝຶກອົບຮົມວຽກງານຫ້ອງການຈໍານວນ 9 ສະຫາຍ.ໃນພິທີ, ທ່ານ ພົນໂທ ຄໍາລຽງ ອຸທະໄກສອນ ໄດ້ປະດັບຫຼຽນໄຊພິລະອາດຫານຊັ້ນ IIໃຫ້ທ່ານ ໄຊຊະນະ ໂຄດພູທອນ ແລະ ປະດັບຫຼຽນໄຊພິລະອາດຫານຊັ້ນ IIIໃຫ້ພະນັກງານຫຼັກແຫຼ່ງ 14 ທ່ານ.
ຂ່າວ: ບຸນອູ້ມ
ຄໍາເຫັນ