 |
ທ່ານນາງ ອາລີ ວົງໜໍ່ບຸນທໍາ ໄດ້ກ່າວເປີດພິທີວ່າ: ການປາຖະກະຖາ ທັດສະນະກ່ຽວກັບວຽກງານແມ່ຍິງ ຂອງສະຫາຍ ສີຈິ້ນຜິງ ເນື່ອງໃນໂອກາດສະເຫຼີມສະຫຼອງວັນແມ່ຍິງສາກົນ 2026 ຄົບຮອບ 116 ປີ ແລະ ງານສໍາມະນາ ແມ່ນໜຶ່ງໃນກິດຈະກໍາສະເຫຼີມສະຫຼອງວັນແມ່ຍິງສາກົນ ຊຶ່ງຈະໄດ້ພ້ອມກັນຮຽນຮູ້ ທັດສະນະກ່ຽວກັບວຽກງານແມ່ຍິງຂອງ ສະຫາຍ ສີຈິ້ນຜິງ ແລະ ຈະໄດ້ຮຽນຮູ້ວັດທະນະທໍາທີ່ຫຼາກຫຼາຍຂອງແມ່ຍິງຈີນ, ພ້ອມທັງຮັບຊົມການສາທິດປຸງແຕ່ງອາຫານ ແລະ ຊົງນໍ້າຊາໃນຮູບແບບຂອງຈີນ. ສໍາລັບ ສປປ ລາວ ແລະ ສປ ຈີນ ໄດ້ມີມູນເຊື້ອ-ສາຍພົວພັນມິດຕະພາບ ມາເປັນເວລາດົນນານ, ໃນປີ 2026 ກໍເປັນປີສະເຫຼີມສະຫຼອງສາຍພົວພັນການທູດ ຄົບຮອບ 65ປີ ແລະ ເປັນປີມິດຕະພາບລາວ-ຈີນ. ເວົ້າສະເພາະ ສະຫະພັນແມ່ຍິງລາວ ແລະ ສະຫະພັນແມ່ຍິງຈີນ ໄດ້ມີການພົວພັນຮ່ວມມືຢ່າງເປັນປົກກະຕິ, ໂດຍໄດ້ແລກປ່ຽນຂໍ້ມູນຂ່າວສານຊຶ່ງກັນ ແລະ ກັນ ກ່ຽວກັບວຽກງານການສົ່ງເສີມ ແລະ ພັດທະນາແມ່ຍິງ, ການກໍ່ສ້າງຊັບພະຍາກອນມະນຸດ, ການປົກປ້ອງສິດທິຂອງແມ່ຍິງ-ເດັກນ້ອຍ ແລະ ອື່ນໆ,ສະເພາະໃນປີຜ່ານມາ ໄດ້ພົວພັນຮ່ວມກັນຫຼາຍດ້ານເຊັ່ນ: ໄດ້ຕ້ອນຮັບຄະນະຄູຝຶກຈາກມູນນິທິພັດທະນາແມ່ຍິງຈີນ,ສະຫະພັນແມ່ຍິງທົ່ວປະເທດຈີນທີ່ມາຢ້ຽມຢາມ ແລະ ເຮັດວຽກຢູ່ ສປປ ລາວ, ໂດຍໄດ້ຈັດຊຸດຝຶກອົບຮົມຫັດຖະກໍາຈັກສານດ້ວຍໄມ້ໄຜ່ໃຫ້ສະຫະພັນແມ່ຍິງລາວ ແລະ ໄດ້ມີຊ່າງຫັດຖະກຳຈາກສະຫະພັນແມ່ຍິງ 5 ແຂວງເຂົ້າຮ່ວມ ແລະ ໃນໄລຍະເຂົ້າຮ່ວມກອງປະຊຸມສຸດຍອດຜູ້ນໍາແມ່ຍິງໂລກ ຕາມການເຊື້ອເຊີນຂອງສະຫະພັນແມ່ຍິງທົ່ວປະເທດຈີນ, ຄະນະນໍາ ສສຍລ ໄດ້ມີກອງປະຊຸມພົບປະສອງຝ່າຍຮ່ວມກັບ ຮອງປະທານສະຫະພັນແມ່ຍິງທົ່ວປະເທດຈີນ ຊຶ່ງຝ່າຍລາວໄດ້ສະແດງຄວາມຂອບໃຈຕໍ່ການສະໜັບສະໜູນ ຂອງສະຫະພັນແມ່ຍິງທົ່ວປະເທດຈີນໃນໄລຍະຜ່ານມາ ແລະ ຈະສືບຕໍ່ພົວພັນຮ່ວມມືກັນ ເພື່ອປະຕິບັດຜົນຂອງກອງປະຊຸມສຸດຍອດຜູ້ນຳແມ່ຍິງໂລກ ແລະ ຄຳເຫັນຂອງສະຫາຍ ສີຈິ້ນຜິງ ໃນການ “ເປັນຄູ່ຮ່ວມຊາຕາກຳ ການເສີມຂະຫຍາຍ ການພົວພັນຮ່ວມມືຮອບດ້ານ, ເລິກເຊິ່ງ”.
 |
ທ່ານ ນາງ ອາລີ ວົງໜໍ່ບຸນທໍາ ກ່າວຕື່ມວ່າ: ທາງ ສປ ຈີນ ໂດຍຜ່ານສະຖານທູດ ສປ ຈີນ ປະຈໍາ ສປປ ລາວ ໄດ້ໃຫ້ການສະໜັບສະໜູນ ໃນການຈັດປາຖະກະຖາ ທັດສະນະກ່ຽວກັບວຽກງານແມ່ຍິງຂອງສະຫາຍ ສີຈິ້ນຜິງເປັນຫົວຂໍ້ທີ່ມີຄວາມໝາຍສໍາຄັນທີ່ສຸດ ສໍາລັບເອື້ອຍນ້ອງແມ່ຍິງລາວ ໂດຍສະເພາະການນໍາເພດຍິງໃນແຕ່ລະຂັ້ນ ເພື່ອນໍາເອົາບົດຮຽນໄປໝູນໃຊ້ເຂົ້າໃນວຽກງານຕົວຈິງຢ່າງເໝາະສົມ ຕໍ່ການພັດທະນາແມ່ຍິງລາວ ແລະ ຍັງເປັນການແລກປ່ຽນວັດທະນະທໍາທີ່ສວຍງາມ ແລະ ອຸດົມຮັ່ງມີຂອງຈີນ ທີ່ສະແດງອອກຜ່ານແມ່ຍິງ.
ພັກ ແລະ ລັດຖະບານ ສປປ ລາວ ໄດ້ກຳນົດແນວທາງນະໂຍບາຍຕໍ່ການພັດທະນາ, ການປົກປ້ອງສິດຜົນ ປະໂຫຍດຂອງແມ່ຍິງ, ການສົ່ງເສີມຄວາມກ້າວໜ້າຂອງແມ່ຍິງ ແລະ ຄວາມສະເໝີພາບຍິງ-ຊາຍ ຢູ່ໃນລັດຖະທຳມະນູນ ແລະ ກົດໝາຍຫຼາຍສະບັບ. ໄດ້ສ້າງຕັ້ງບັນດາກົນໄກເພື່ອເປັນບ່ອນອີງໃນການຈັດຕັ້ງປະຕິບັດວຽກງານດັ່ງກ່າວ ຄື: 1) ສະຫະພັນແມ່ຍິງລາວ; 2) ຄະນະກໍາມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ; 3) ຄະນະສະມາຊິກສະພາແຫ່ງຊາດເພດຍິງ ໃນແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X (2026-2030) ໄດ້ກຳນົດໃນເປົ້າໝາຍທີ 3 ວຽກຈຸດສຸມທີ 3 ເຊັ່ນວ່າ: ສູ້ຊົນເຮັດໃຫ້ຄ່າດັດສະນີຄວາມບໍ່ສະເໝີພາບຍິງ-ຊາຍຫຼຸດລົງ; ດັດສະນີການພັດທະນາຄວາມສະເໝີພາບຍິງ-ຊາຍ ໃຫ້ເພີ່ມຂຶ້ນ; ຊຸກຍູ້ສ້າງເງື່ອນໄຂໃຫ້ແມ່ຍິງເປັນ ສສຊ-ສສຂ ກວມ 30% ຂຶ້ນໄປ; ເປັນການນໍາຂັ້ນສູນກາງກວມ 30% ຂຶ້ນໄປ; ເປັນການນໍາຂັ້ນແຂວງກວມ 20% ຂຶ້ນໄປ; ເປັນການນໍາຂັ້ນຕາແສງ, ບ້ານກວມ 10% ແລະ ເຫັນວ່າເປັນຄາດໝາຍສູ້ຊົນທີ່ສູງຫຼາຍສໍາລັບເອື້ອຍນ້ອງແມ່ຍິງ ຈະຕ້ອງພ້ອມກັນສູ້ຊົນບຸກບືນໃຫ້ບັນລຸໂຕເລກຄາດໝາຍທີ່ວາງໄວ້ ເພື່ອບັນລຸເປົ້າໝາຍດັ່ງກ່າວກໍບໍ່ອາດປາສະຈາກໄດ້ການໃຫ້ຄວາມຊ່ວຍເຫຼືອ, ຊຸກຍູ້ ຈາກທຸກພາກສ່ວນໃນສັງຄົມ ບໍ່ວ່າຈະເປັນທັງພາກລັດ, ອົງການຈັດຕັ້ງສາກົນ ແລະ ບັນດາຄູ່ຮ່ວມພັດທະນາ; ການສົ່ງເສີມແມ່ຍິງໃຫ້ມີບົດບາດໃນການນໍາພາແມ່ນສໍາຄັນຫຼາຍ ຕໍ່ການຊຸກຍູ້ຂະບວນການພັດທະນາໃນປະເທດ ກໍຄືທົ່ວໂລກ. ດັ່ງນັ້ນ, ບັນຫາຂອງແມ່ຍິງ ຈຶ່ງຖືກກໍານົດໃນເປົ້າໝາຍສະຫັດສະຫວັດດ້ານການພັດທະນາ ຫຼື SDG ໃນເປົ້າໝາຍທີ 5: ບັນລຸຄວາມສະເໝີພາບລະຫວ່າງຍິງ-ຊາຍ ແລະ ສ້າງຄວາມເຂັ້ມແຂງໃຫ້ແມ່ຍິງ ແລະ ໄວໜຸ່ມຍິງ.
ທ່ານ ນາງ ຟາງ ຫົງ ກ່າວວ່າ: ພາລະກິດຂອງແມ່ຍິງ ແມ່ນອົງປະກອບທີ່ສຳຄັນຂອງພັກ ແລະ ປະເທດຊາດ, ເປັນສັນຍະລັກທີ່ສຳຄັນຂອງຄວາມກ້າວໜ້າຂອງອາລິຍະທຳມະນຸດ ແລະ ເປັນກຳລັງທີ່ຂາດບໍ່ໄດ້ໃນການພັດທະນາໂລກ. ນັບຕັ້ງແຕ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 18 ຂອງພັກກອມມູນິດຈີນເປັນຕົ້ນມາ, ຄະນະກຳມະການສູນກາງພັກກອມມູນິດຈີນທີ່ມີສະຫາຍ ສີຈິ້ນຜິງ ເປັນແກນກາງ ໄດ້ໃຫ້ຄວາມສຳຄັນຕໍ່ວຽກງານຂອງແມ່ຍິງ ຈາກທັດສະນະໂດຍລວມຂອງການພັດທະນາພັກ ແລະ ປະເທດ ໄດ້ຈັດແຈງວຽກງານຂອງແມ່ຍິງ, ສົ່ງເສີມການໃຊ້ສິດທິປະຊາທິປະໄຕຢ່າງເທົ່າທຽມກັນຂອງແມ່ຍິງຕາມກົດໝາຍ, ການມີສ່ວນຮ່ວມຢ່າງເທົ່າທຽມກັນໃນການພັດທະນາເສດຖະກິດ-ສັງຄົມ ແລະ ການຊົມໃຊ້ໝາກຜົນຂອງການປະຕິຮູບ ແລະ ການພັດທະນາຢ່າງເທົ່າທຽມກັນ. ນອກ ຈາກນີ້, ລັດຖະບານຈີນ ຍັງເລັ່ງແກ້ໄຂບັນຫາຄວາມທຸກຍາກ ໂດຍມີເປົ້າໝາຍເຮັດໃຫ້ແມ່ຍິງສາມາດຊອກຫາວຽກເຮັດງານທຳຢູ່ໃກ້ບ້ານຂອງເຂົາເຈົ້າ ດ້ວຍການສະໜັບສະໜູນນະໂຍບາຍຕ່າງໆ ຊຶ່ງມີແມ່ຍິງ 8.7 ລ້ານຄົນ ໄດ້ເລີ່ມຕົ້ນທຸລະກິດຂອງຕົນເອງ ສາມາດເພີ່ມລາຍໄດ້ໃຫ້ເຂົາເຈົ້າ.
ຈີນ ແລະ ລາວ ລ້ວນແຕ່ຢຶດໝັ້ນເອົາປະຊາຊົນເປັນສູນກາງ, ລວມທັງສິດສະເໝີພາບລະຫວ່າງຍິງ-ຊາຍ ເຂົ້າໃນລະບົບຂອງປະເທດຊາດ ເພື່ອຮັບປະກັນສິດທິຂອງແມ່ຍິງຢ່າງເຕັມທີ່ ແລະ ສະໜັບສະໜູນການມີສ່ວນຮ່ວມຂອງແມ່ຍິງໃນທຸກຂົງເຂດ, ການເພີ່ມທະວີການແລກປ່ຽນ ແລະ ການຮ່ວມມືໃນຂົງເຂດວຽກງານແມ່ຍິງລະຫວ່າງຈີນ ແລະ ລາວ ເປັນອົງປະກອບທີ່ສຳຄັນຂອງມິດຕະພາບລະຫວ່າງສອງປະເທດ ແລະ ເປັນກຳລັງທີ່ສຳຄັນໃນການສົ່ງເສີມການພັດທະນາຮ່ວມກັນ.
ຂ່າວ-ພາບ: ບຸນອູ້ມ
ຄໍາເຫັນ