ທ່ານ ພັທ ເພັດສະຫວັນ ເຮືອງປັນຍາ ລາຍງານໃຫ້ຮູ້ວ່າ: ໂຮງຮຽນການທະຫານທ້ອງຖິ່ນ ນັບແຕ່ໄດ້ຮັບການສ້າງຕັ້ງໃນວັນທີ 15 ມີນາ 1985 ແມ່ນໄດ້ຈັດຕັ້ງປະຕິບັດການຮຽນ-ການສອນ ແລະ ເຮັດໜ້າທີ່ການເມືອງ ມີຜົນສຳເລັດຕາມລະດັບຄາດໝາຍເປັນຢ່າງດີ ແລະ ໃນປີ 2025 ນີ້, ກໍໄດ້ເປີດຮຽນກໍ່ສ້າງນາຍສິບ ເປັນຊຸດທີ 9 ຊຶ່ງມີຈຳນວນນັກຮຽນທັງໝົດ 70 ສະຫາຍ, ມາຈາກຕ່າງແຂວງ 16 ສະຫາຍ, ເປີດອົບຮົມທະຫານໄລຍະ 3 ເດືອນ ມີຈໍານວນ 34 ສະຫາຍ ຍິງ 10 ສະຫາຍ, ຄຽງຄູ່ກັບການສອນກໍ່ສ້າງທະຫານແລ້ວ. ໂຮງຮຽນການທະຫານທ້ອງຖິ່ນ ຍັງໄດ້ເປັນເຈົ້າການປັບປຸງ, ສ້ອມແປງອາຄານ, ສະຖານທີ່ພາຍໃນໂຮງຮຽນ ເພື່ອເຮັດໃຫ້ບ່ອນເຮັດວຽກຂອງອ້າຍ-ນ້ອງທະຫານ ມີຄວາມໝັ້ນຄົງ ແລະ ໃນຕົ້ນປີ 2025 ໂຮງຮຽນ ກໍໄດ້ຮັບຜົນກະທົບຈາກໄພພິບັດທາງທໍາມະຊາດ ເຮັດໃຫ້ອາຄານ ແລະ ບ່ອນປະຈໍາການ ບາງສ່ວນ ເກີດຄວາມເສຍຫາຍ.
ໂອກາດນີ້, ທ່ານ ເຫຼັກໄຫລ ສີວິໄລ ໄດ້ໃຫ້ທິດຊີ້ນຳຫຼາຍບັນຫາ ໂດຍສະເພາະ ໄດ້ຮຽກຮ້ອງໃຫ້ນາຍ ແລະ ພົນທະຫານ ຈົ່ງພ້ອມກັນສືບຕໍ່ເປັນເຈົ້າການເອົາໃຈໃສ່ຄົ້ນຄວ້າຮ່ຳຮຽນຍຸດທະວິທີ, ວິຊາສະເພາະຢ່າງຕັ້ງໜ້າ, ມີສະຕິລະວັງຕົວຕໍ່ກົນອຸບາຍຂອງສັດຕູຕະຫຼອດເວລາ, ມີຄວາມອຸ່ນທ່ຽງທຸ່ນທ່ຽງ ໜັກແໜ້ນ, ເຊື່ອໝັ້ນຕໍ່ການນຳພາຂອງພັກ, ປະຕິບັດລະບຽບວິໄນຢ່າງເຂັ້ມງວດ, ຝຶກຝົນຫຼໍ່ຫຼອມຕົນເອງ ໃຫ້ກາຍເປັນບຸກຄົນທີ່ມີຄວາມຮູ້ຄວາມສາມາດ ແລະ ນຳເອົາບົດຮຽນໄປນຳໃຊ້ເຂົ້າໃນການຈັດຕັ້ງປະຕິບັດໜ້າທີ່ວຽກງານຕົວຈິງ. ຂະນະດຽວກັນ, ທ່ານ ເຫຼັກໄຫລ ສີວິໄລ ຕ່າງໜ້າຄະນະກຳມະການຄຸ້ມຄອງໄພພິບັດຂັ້ນແຂວງ ມອບເຄື່ອງບໍລິໂພກ ແລະ ອຸປະກອນເຮືອນຄົວຈຳນວນໜຶ່ງ ພ້ອມເງິນ 60 ລ້ານກີບ ໃຫ້ໂຮງຮຽນການທະຫານທ້ອງຖິ່ນ ນໍາໃຊ້ເຂົ້າໃນການບໍາລຸງ, ສ້ອມແປງອາຄານໃຫ້ດີຂຶ້ນປົກກະຕິ.
(ພາບ-ຂ່າວ: ອັດສະວິນ)
ຄໍາເຫັນ