ປະທານຄະນະກວດກາສູນກາງພັກຢ້ຽມຢາມບໍລິສັດ ຊີໂນ-ອາກຣີ ໂປຕາສ

ທ່ານ ຄໍາພັນ  ພົມມະທັດ ປະທານຄະນະກວດກາສູນກາງພັກປະທານອົງການກວດກາແຫ່ງລັດ ແລະ ຫົວໜ້າອົງການຕ້ານການສໍ້ຫຼາດບັງຫຼວງຂັ້ນສູນກາງ ພ້ອມດ້ວຍຄະນະ ໄດ້ລົງເຄື່ອນໄຫວເຮັດວຽກຢູ່ບໍລິສັດ ຊີໂນ-ອາກຣີ ໂປຕາສ ຢູ່ບ້ານດົງໃຕ້ ເມືອງທ່າແຂກ ແຂວງຄໍາມ່ວນ ເມື່ອບໍ່ດົນມານີ້, ໂດຍມີທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນຮ່ວມຕິດຕາມນຳ.
ທ່ານ ຈູ່ ຊຽງລີ່ ຮອງອຳນວຍການບໍລິສັດຊີໂນ-ອາກຣີ ໂປຕາສ ໄດ້ລາຍງານສະພາບລວມການເຄື່ອນໄຫວຈັດຕັ້ງປະຕິບັດ ແລະ ດຳເນີນໂຄງການ ຊຶ່ງບໍລິສັດດັ່ງກ່າວແມ່ນເປັນບໍລິສັດລະດັບສາກົນທີ່ດຳເນີນການຂຸດຄົ້ນ, ປຸງແຕ່ງ ແລະ ຈໍາໜ່າຍ ເກືອໂປຕາສ. ໃນປີ 2021 ໄດ້ຜະລິດທົດລອງ ແລະ ກາຍເປັນໂຄງການເກືອໂປຕາສລະດັບ 1ລ້ານໂຕນແຫ່ງທຳອິດໃນຂົງເຂດໃໝ່ຂອງການຜະລິດເກືອໂປຕາສໃນໂລກ ຊຶ່ງຜະລິດຕະພັນເກືອໂປຕາສຂອງບໍລິສັດຊີໂນ-ອາກຣີ ໂປຕາສແມ່ນໄດ້ສົ່ງອອກຈໍາໜ່າຍໃນຫຼາຍປະເທດເຊັ່ນ: ຈີນ, ຫວຽດນາມ, ໄທ, ອິນໂດເນເຊຍ, ມາເລເຊຍ, ອິນເດຍ, ນິວຊີແລນ ແລະ ຍີ່ປຸ່ນ,  ໄດ້ພົ້ນເດັ່ນໃນຕະຫຼາດສາກົນ ໂດຍສະເພາະແມ່ນຕະຫຼາດອາຊີຕາເວັນອອກສ່ຽງໃຕ້. ປັດຈຸບັນກຳລັງການຜະລິດບັນລຸ 3 ລ້ານໂຕ່ນຕໍ່ປີ, ໃນປີ 2025 ຈະໃຫ້ບັນລຸ 5 ລ້ານໂຕນຕໍ່ປີ ແລະ ອະນາຄົດຈະບັນລຸ 7-10 ລ້ານໂຕ່ນຕໍ່ປີ, ເພື່ອຕອບສະໜອງການບໍລິການຜະລິດຕະພັນທີ່ມີຄຸນນະພາບສູງໃຫ້ແກ່ອາຊີ ແລະ ທົ່ວໂລກ ຊຶ່ງໄດ້ຊຸກຍູ້ການສ້າງວຽກເຮັດງານທຳໃຫ້ແກ່ທ້ອງຖິ່ນ, ບໍລິສັດຍັງໄດ້ຈັດຕັ້ງດຳເນີນຫຼາກຫຼາຍກິດຈະກຳ, ວິສາຫະກິດ ເພື່ອເສີມສ້າງທີມງານທີ່ສາມັກຄີກົມກຽວ ເພື່ອພ້ອມກັນພະຍາຍາມສູ້ຊົນໃຫ້ບັນລຸຄາດໝາຍ ໂຄງການປອດໄພ, ສີຂຽວ, ເປັນມິດກັບສິ່ງແວດລ້ອມ ແລະ ພັດທະນາຍືນຍົງ. 
ນອກນີ້ໃນເຂດດັ່ງກ່າວຍັງຈະໄດ້ສ້າງເປັນນິຄົມອຸດສາຫະກຳໝູນວຽນອັດສະລິຍະ ອາຊີໂປຕາສ ສາກົນ ໂດຍຈະແບ່ງອອກເປັນ 3 ພາກສ່ວນໃຫຍ່ຄື: ສວນອຸດສາຫະກຳໂປຕາສ, ສວນອຸດສາຫະກຳອະໂປຕາສ ແລະ ເມືອງອັດສະລິຍະ, ມີເນື້ອທີ່ລວມປະມານ 2.000 ເຮັກຕາ, ຄາດຄະເນການລົງທຶນທັງໝົດ 4,31ຕື້ໂດລາ. 
ຮອງຜູ້ອຳນວຍການບໍລິສັດຍັງໄດ້ສະເໜີຕໍ່ທ່ານປະທານຄະນະກວດກາສູນກາງພັກຜ່ານໄປຍັງລັດຖະບານ ຊ່ວຍພິຈາລະນາອອກນະໂຍບາຍພິເສດໃຫ້ແກ່ນິຄົມອຸດສາຫະກຳ ເພື່ອສ້າງໂອກາດໃຫ້ແກ່ວິສາຫະກິດທີ່ຈະມາລົງທຶນໃນເຂດດັ່ງກ່າວ, ພິຈາລະນາການຮັກສາທາງດ້ານອາກອນ ໂດຍບໍ່ໃຫ້ມີການປ່ຽນແປງ ສະເພາະໂຄງການທີ່ໄດ້ມີການກໍ່ສ້າງເປີດທຳການຜະລິດ ແລະ ໄດ້ເຊັນສັນຍາກັບລັດຖະບານແລ້ວ, ພິຈາລະນາໃນການຍົກເວັ້ນອາກອນກຳໄລ ແລະ ມີໄລຍະໃນການເກັບອາກອນກຳໄລ ໃນໂຄງການພາກຂະຫຍາຍຂອງເກືອໂປຕາສ ເພື່ອຊຸກຍູ້ໃຫ້ບໍລິສັດມີການຂະຫຍາຍຕົວໄວຂຶ້ນ, ສະເໜີລັດຖະບານຊ່ວຍຄົ້ນຄວ້າໃນການກໍ່ສ້າງໂຮງງານໄຟຟ້າໃນເຂດໂຄງການ ເພື່ອຜະລິດໄຟຟ້າຮັບໃຊ້ໃຫ້ພຽງພໍກັບຄວາມຕ້ອງການຂອງບໍລິສັດ ແລະ ສະເໜີໃຫ້ລັດຖະບານຊ່ວຍຕິດຕາມ ແລະ ສະໜັບສະໜູນ ອຳນວຍຄວາມສະດວກທາງດ້ານຕ່າງໆໃນຂັ້ນຕໍ່ໄປ.
ໃນໂອກາດນີ້, ທ່ານປະທານຄະນະກວດກາສູນກາງພັກ ໄດ້ຕີລາຄາສູງຕໍ່ຜົນງານການເຄື່ອນໄຫວດຳເນີນທຸລະກິດຂອງໂຄງການ ໂດຍສະເພາະແມ່ນການຊຸກຍູ້ສົ່ງເສີມການສ້າງວຽກເຮັດງານທຳໃຫ້ແກ່ແຮງງານລາວໃນທ້ອງຖິ່ນ ລວມເຖິງການປະກອບສ່ວນຊ່ວຍເຫຼືອສັງຄົມໃນດ້ານຕ່າງໆ ແລະ ໂຄງການເກືອໂປຕາສ ແມ່ນມີຄວາມສຳຄັນໃນການປະກອບສ່ວນທາງດ້ານລາຍຮັບ ເຮັດໃຫ້ລັດຖະບານ ກໍຄືແຂວງຄໍາມ່ວນ ມີລາຍຮັບທີ່ສູງຂຶ້ນ. ຄຽງຄູ່ກັບການຂະຫຍາຍ ແລະ ພັດທະນາ ໃຫ້ບໍລິສັດສືບຕໍ່ເສີມຂະຫຍາຍບົດບາດໃນການປະກອບສ່ວນທາງດ້ານການພັດທະນາ ສປປ ລາວ ກໍຄືແຂວງຄໍາມ່ວນໃນດ້ານຕ່າງໆ, ເອົາໃຈໃສ່ເພີ່ມທະວີໃນການຮັກສາຄວາມປອດໄພ ມີການປະສານສົມທົບ ແລະ ປຶກສາຫາລືກັບຂະແໜງການກ່ຽວຂ້ອງຂອງພາກລັດເພື່ອວາງແຜນໃນການກຳນົດການຄຸ້ມຄອງຄວາມເປັນລະບຽບຮຽບຮ້ອຍທາງສັງຄົມ, ຄຸ້ມຄອງຄວາມປອດໄພຈາກອຸບັດໄພຕ່າງໆ. ສຳລັບບັນຫາທີ່ທາງບໍລິສັດສະເໜີ ລວມເຖິງດ້ານນະໂຍບາຍຕ່າງໆແມ່ນຈະໄດ້ນຳໄປສະເໜີຕໍ່ຄະນະລັດຖະບານ ເພື່ອຄົ້ນຄວ້າຊອກຫາວິທີທາງແກ້ໄຂຢ່າງເໝາະສົມໃນຕໍ່ໜ້າ. 
ຂ່າວ-ພາບ: ກອງຄຳ